NUPUI/PASAL NEI TUR LEH NU LEH PA TE TAN

Published / by Nursery Veng YMA / Leave a Comment

Martin Luther-a chuan, “Nupui hi neih leh ngai ka nih chuan lungpui atangin ka thuawih deuh tur ka ker ngat ngat tawh ang” a tih laiin, thuhriltu ropui dang Billy Graham-a chuan, “Vanram chu Ruth-i neih ang maia nuam leh hlimawm anih ka ring” a ti ve mauh mai!

Anni pahnih hian, “A nuam leh hrehawm, bawrhsawm lai ber pawhin, tiam tlat e……Kumkhua atan, thih hma zawng” ti a Pathian leh Kohhran hote hriatpuia an lo tiampui tawh an nupui chungchanga an thusawi han ngaihtuah hian, nu ho hian an pasalte’n engangin nge an ngaih ang aw, tih in ngaihtuah a, an lo in enfiah ve mai maina atan heng mi ropui pahnihte thusawi hi ka han tarlang a ni. (more…)

Editorial 19.09.2021

Published / by Nursery Veng YMA / Leave a Comment

He khawvela kan awm chhung hian mi tu pawn ngaihsak nih kan duh veka, ngaihsak kan hlawh theih nan engemaw ti taka awm dân pawh kan thiam thin. Kan mihringpuite ngaihsak na dawn hi a nuama, an tan hlutna kan nei tih a chianga, chu chuan kan rilru ah hlimna min pe a ni. Tin, nun a ti phûrawma, beiseina neiin hmalam pan turin min nawr kal bawk thin. Chutihrualin, ngaihsaktu neilo nih chu a hrehawmin, khawvela mi vanduai ber nihna a tling si.

Mite ngaihsakna chauh hi phût leh beisei tur kan ni lo, mi dangte ngaihsaktu nih kawngah tan kan la thar zawk tur a ni.

Khawvela kan awm chhung hi chuan chêngho tur kan nia, mahse, thenkhat hi chuan an duh dân têa khawsa zel turin kan inngai a ni mahna, thenawm khawvengte bân phâk tur leh tih buai ngam khawpin kan awm meuh ta lo.
Chutihlaiin, inchênchilha, nun ho tur kan nih zia hre chiang apiang chu, mi dangte tanpui turin, miten an tihbuai ngam leh an mamawh hun apianga an beisei ngam khawpin an awm thung a. Chung mite chu, an hausa emaw rethei emaw vang lam a ni lo, Pathianin ang khat vekin min siam ziate, in mamawh tawn vek kan nih ziate, mihringin kan hmalam hun kan hriat lawk miah loh thu te an hriat chian vang a ni thei ang. A tawi zawngin, Pathian thu an awih vang a ni ber awm e. (more…)

CENTRAL YMA THUCHHUAK

Published / by Nursery Veng YMA / Leave a Comment

Myanmar ram buaina avanga kan unaute raltlan buaipuina kawnga Sub-headquarters/Group/ Branch YMA te hmalakna ah lawmthu kan sawi e. Mahni sahimna tura lo tlan kan unaute kan theih leh phak tawka lo tuam hlawm theuh turin Mizo mipuite YMA chuan a ngen a ni. Raltlan te thlamuang taka an awm theih nan leh buaipui mekna kawngah Sub-Headquarters/Group/Branch YMA ten theih tawp i chhuah zui zel ang u.

1. Branch YMA te raltlan tanpuina pe thei tura beisei kan ni a, kan huamchhunga tanpuina pe thei an awm chuan lo bawhzui ni se.

2. Raltlan tanpuina pe duh mimal, pawl, kohhran kan awm anih chuan Central YMA Office ah emaw Central YMA Account Number-97003624845(Mizoram Rural Bank) IFSC- SBIN0RRMIGB ah hian pek theih a ni se. Tanpuina hi 15th October, 2021 ral hma a pek theih ni se.

3. Myanmar raltlan tanpuina pe duh ten Sub-headquarters/Group/ Branch YMA kaltlanga tanpuina pek hram ni se.

4. Raltlante enkawlna kawnga kan awlsam tlan nan Sub-headquarters/Group/Branch YMA ten felfai taka chhinchhiah ni se.

5. Tanpuina hi a sumfai a pek theih hram ni se. Account kaltlanga tanpuina pe ten hming leh veng chiang tak a ziak tel hram ni se.

Sd/-
Prof. LALNUNTLUANGA
General Secretary,
Central YMA.

CENTRAL YMA CHETVELNA

Published / by Nursery Veng YMA / Leave a Comment

1. Myanmar Raltlan chungchang Chief Minister sawipui a ni. Raltlante chhawmdawlna hrang hrang State Sorkar atangin ngaihtuah thui tura ngen a ni. Tin, raltlan lo lut te Covid-19 test na hmanrua ngaihtuahsak tura ngen a ni bawk. Mizoram sawrkar hotute leh YMA hruaituten raltlante mamawh sawiho a hmalak hman hmawh ngaite hmalak tha tih a ni.

Myanmar raltlan chungchangah sawrkar laipui hotute hmala ngei tura sawipui turin ngen a ni.

2. Mizoram chhunga kawngpui siam/laih mekte tha taka thawh anih theih nana hmalak dan tur sawiho a ni bawk.

3. Mizoram CEO Pu Jawahar, P IAS chu a office ah hmuh niin Special Summary Revision of Electoral Roll chungchang sawipui a ni. E- Roll dik leh fel tak kan neih theih nan hmalak kan duh thu sawiin thawhhopuiah YMA te min sawm bawk.

Tuikuk mahni duh thu a Tripura lama chhukte E- Roll atanga paih an nih theih nan hmalak a tul thu sawipui a ni bawk.

4. Chief Secretary kaihhruainain Mizoram chhunga dan lo a khaw din chungchang sawiho a ni. Aizawl, Lunglei leh Mamit District a dan lova khaw dinte zir chiana, a tul dan anga hmalak tum a ni a. District hrang hrangah te village record enfeltu turte ruahmanna siam a ni bawk.

CENTRAL YMA HRUAITUTE LEH ASSAM RIFLES HOTUTE INKAWM

Published / by Nursery Veng YMA / Leave a Comment

Mimkut thla ni 16, 2021 (Ningani) chawhma dar 10:30 A.m khan Central YMA OB te leh 2nd Assam Rifle Mizoram a lo awmthar te nen inkawmna hun tha tak hman a ni. Assam Rifles ten an hmachhawp hrang hrangte sawlangin, CYMA hruaitute pawhin hmalakna tura ngaih pawimawh zawngte tarlan a ni bawk. Inkawmhona hun tha tak hman a ni.

Covid 19 hrileng mek a ziaawm deuh hunah hetiang hian hmalakna tur sawiho a ni :-

1. Hindi Spoken Class : Mizo thalaite tan hindi tawng zirna buatsaih.

2. Mizo thalaite tan Army Pre Recruitment Rally buatsaih/huai hawt.

3. Thiam thil hrang hrang (Skill development) Mizo thalai ten an training theih nana hma lak.

4. Ruihhlo dona kawnga tan lak.

Assam Rifles hotute hi an Colonel Rajesh Kumar Nayak, Commandant Aizawl Battalion in a ho a ni.

FISHERIES DEPART MENT LEH CENTRAL YMA TEN THUTHLUNG ZIAK

Published / by Nursery Veng YMA / Leave a Comment

Ni 06.09.2021 (Thawhtanni) khan Mizoram chhunga luidung nungchate tha zawk leh awmze nei zawka humhalh a nih theihna turin Fisheries Department leh Central YMA ten Fisheries Minister Pu K.Lalrinliana pisa-ah Thawhhona Thuthlung an ziak a ni.

He Thawhhona Thuthlung hi kum hnih chhung atan a ni a, a tul anga pawhsei a ni ang. He thuthlung hian behchhan pathum a nei a, chungte chu – The Mizoram Fisheries (Amendment) Act, 2016; The Mizoram Fisheries Rules,
2019 leh The Fisheries Conservator Reward Scheme 2019 te a ni. First Party-ah Fisheries Department aiawhin Pu F. Vanlallawma, Director, Department of Fisheries leh Second Party-ah CYMA aiawhin Pu Vanlalruata, President, CYMA ten an ziak a. Witness ah Pi Laltleipuii, Jt. Director, Department of Fisheries, Prof. Lalnuntluanga, General Secretary, CYMA ten an ziak bawk a ni. (more…)

Edtorial 12.09.2021

Published / by Nursery Veng YMA / Leave a Comment

He khawvel kan cham chhung reilo te ah hian midangte tana malsawmna thlentu kan nih a pawimawh takzet a ni. Kan Lal Isua kha mihring a chan lai khan thil siam tinrengte tana malsawmna thlentu a ni.

Vawiin ah hian Isua zuitu inti te hi mite tana malsawmna thlen tu nge kan nih a, mite harsatna siamtu. Abrama (Abrahama) kha Pathian in a koh chhuah dawn khan “Nang malsawmna ni ang che..” a ti a ni. Keini vawiin a ringtu intite pawh hi kan Pathian hian mite tana malsawmna thlentu ni turin min duh ngei a rinawm. Tunlai kan boruak avangin sawrkarin veng tin leh khaw tin ah Task Force a rawn din a, anni chuan veng mi te tan an hrehawm pawisa lovin theih tawp tak meuh an chhuah a, mipui tan malsawmna an ni tak meuh a ni. (more…)

COVID ATANG HIAN I DAM CHIANG TAWH EM?

Published / by Nursery Veng YMA / Leave a Comment

– Dr. C. Lalchhandama, Pathologist,
Civil Hospital, Aizawl.

Mizoram ah hian Covid-19 hripui len tirh atanga positive zawng zawng chu mi 23,000 kan chuang ta. Hmuh chhuah lemloh, dam zui ve ta mai eng zat tak awm ang maw? Heti zat positive kan awm tawh laiin vanneihthlak takin mi 19,000 chuang kan dam chhuak thung. Dama chhuak te hi kan dam chiang tak tak em? Nge ni a, kan negative ringawt? Taksa lamah harsatna kan la nei em? I neih loh chuan vannei tawp ah lo in ngai rawh, covid vei hnua taksa a khawih zui dan hi khawvel buaipui a ni leh ta tlat. “Covid test negative hnua kan taksa leh awm danah ngai kan la awh mai theihloh hi Covid hri ina a ken tel a ni zawk thei em?” tih zawhna pawimawh tâk hi mithiamte zinga inhnialna thar chu a lo ni leh ta zel a. Chutiang a awm te chu “Post Covid Syndrome” emaw “Long Covid” ti a koh an lo ni ta hial.

Covid virus hian kan taksa bung hrang hrang a khawih nasa em em a, a bikin kan lung (heart), chuap, kal, thin leh hriatna thazam lamte, kan taksa pum a khawih ti ila a sual awm love. Hote anga ngaih theih sam tla leh rei tak chhung aw lâwi atangin lungphuchawl thleng a thlen thei a ni tih hmuhchhuah zel a ni. (more…)

PATHIAN IN KAN RAMRI A VEI

Published / by Nursery Veng YMA / Leave a Comment

– R. Nelsona

State kan niha, Assembly hmanga mahnia ro kan inrel pawh kum 35 lai a lo ni ta. Remna lo thlena kan ram leh hnam tana rammu te’n an salu rawn hawn atana an hauh, ramri tih fel lah chu an rawn hawn thei ta bawk si lo.

Roreltu lahin an ngaihsak zui hek lo. Thalai ten hma an lak pawhin, roreltute chu a dodaltu leh an hma lakna tihchhiatsaktu mai an ni ta zel a. Mahse, ram min petu kan Pathian ngaih dan a ni ta lo. Tufingte 21:31-ah Ram chu LALPA ta a ni, tih a nih miau vangin a ta chhan turin a rawn che chhuak ta a ni. (more…)

ZALENNA HLA MAWI!

Published / by Nursery Veng YMA / Leave a Comment

– C. Lalbiaknunga

Vângpui chhaih hun, hun thengthaw lo thleng tur inthoh thâwmin mi a han hrût a. Kawl êng, khawvar hmahruaituin mi a han hnêk dek dek tawh chinah hi chuan nun hi eng emaw ti tak hian a insang mar vek hial thei. Hleilubial hêl rah hmin hmasa váiin huamhauh taka zâr tin thunun tuma a bawh ruak ruak kâra pît rual an teh hek hekte chuan kan tel ve lohna khawvel an dai dar bîk hial emaw tih tur a ni.

Tlaiberh pui no hrâm hruai, a no buchip enkawl vanga thawhrimna zualpui kal san, hlimtaka favang kawl êng an han chhaih har harte hi chuan dâi ngai loh ram tha bawh tur hian min hruai luih ngar ngar an tum zawk ni hian ka hria. A ni, hlimna ruama lu lam leh mawng lam hre lêk loa boruak thar duhawm a thlawna chêna chhek turin!

Kawng chhuatte chu a hnawm chiap a, dâi nge ruahtui hnuhnung hnuhma tih hriat hran rual ni lo mah se, ngalvapual hram thawveng ta lutuk chuan favang lo thleng tur hmuah a hun tih erawh a puang mêk a ni. Vabêk-in khâm thlí an chhaih a, daikatin kawldâi buk kar atangin nizung chhuak mar at mai an chhaih thung. An hlimna chu an zai rimawi atanga teh a ngai a. Thutlukna siam sual theih tak tur niin-khawi zawk nge tuipui fâl chi ang tih hriat hran theih a ni lo! (more…)