2019 YMA KUM PUAN – RAM LEH HNAM HUMHALH

Ni 05.02.2019 (Thawhlehni) zan dar 7:00 khan Vanapa Hall-ah YMA Kumpuan (Ram leh Hnam humhalh) hawnna neih a ni. Kumpuan hawnna inkhawm hi Pu R. Lalngheta, Vice President, CYMA in a kaihruai a, branch tinte dingin inhmelhriatna neih a ni. Aizawl City Branch 100 awmah Branch YMA 95 zet kalin member kalkhawm zat hi mi 780 zet an ni.

Vice President, CYMA chuan, “Chief Electoral Officer (CEO), Citenzenship Amendment bill(Act), 2016 leh CADC, etc., chungchanga hnam tanrual hunlaia, Media chi hrang hrang; Whatsapp, Facebook etc., tih vela mawilo tak taka YMA, hnam tanrualna ti chhe zawnga thu chhuah ching kan awm hi a pawi tak zet a, atawpah ngaihdam anrawn dil leh tho si thin a ni. CYMA hruaitute hi Sir kan nilo a, YMA-ah Sir tumah kan awm lo” a ti.

Pu Peter Chhakchhuak, Assistant Secretary, CYMA hnen atangin report kimchang ngaihthlak a ni a, CYMA in a Branch YMA te hmalakna tur a chhawpchhuah chi reng rengte ngaihpawimawh a that thu leh Budget leh Annual Fee etc. a hun bi takah theh luh thin nise, CYMA kal tlang lo a lehkha hmuh reng rengte YMA hminga bawhzui loh tur a ni. CYMA chakna ber chu Branch YMA/Sub Hqr’s/Group te hi a ni tih leh hruaitute infuihna tha tak tak ngaihthlak a ni.

Pu Lalrochuanga Pachuau, Treasurer, CYMA hnen atangin infuihna tha tak tak ngaihthlak a ni bawk a, YMA hruaitute tih tur leh tih loh tur hrang hrang a sawi a, ‘Zu’ ruihhlo an ti tur a nilo, insum theilo chu ban mai tur a ni insum theihna kan nei tur a ni. Hruaitute chu kawng engkimah hma hruaitu kan ni tur ani a, tlawm hunah te kan tlawm ngam tur a ni, a tul hunah chuan thinlung huaisenna kan hmang tur a ni, mi tihah dahlo in keinin kan tihloh chuan tu nge ti ang, tlawmngaihna inpumpekna a pawimawh hle, YMA hi kohhran naute a ni a, kohhran kan zahthiam tur a ni, tih te a hnen atangin kan ngaithla a ni.

Kumpuan hawngtu Pu Vanlalruata, CYMA President thusawi; YMA Kumpuan ‘Ram leh Hnam Humhalh” hi kum 1998 atangin kan lo hmang tan tawh a. A hlawhtlin leh zual nan a hnuaia mi ang hian hmalak chhunzawm ni se.

1. Zu leh Ruihhlo Do chungchang:
Zu leh ruihhlo avanga nunna chan tam tawh zia sawi rik fo hi a ninawm hle nachungin a tul miau si a, kum 2017-ah Zu leh Ruihhlo avangin Mipa 54, Hmeichhia 11, kum 2018-ah Mipa 46, Hmeichhia 10, kum 2019-ah(5.2.19 thleng) Mipa 4, Hmeichhia 1, tun kum 2 leh thla 2 pawh tling lovah hian mi 126 zet an thi thawh. Kan ramah mitthi an tam viau laiin piang erawh an tam em em kan hre bawk si lova, Ruihhlo hi kan do lo a ni lova, a man pawh kan man hnem na rawh e, mahse a rem zel chu sawi loh a pung tual tual a, tuna kan SRS 8th Batch kal mekah hian thlakhat vel chhung lekin Heroin ringawt pawh hawng 79 zet man a lo ni leh ta reng mai. Kum naupang zawk thalai ruihhlo ti thar an pun belh zel zawk niin a lang, a mangan thlak tak zet a ni. Kumin pawh hian tih tak zetin Ruihhlo do beihpui kan thlak chhunzawm zel a tul takzet a ni. Tin,Sawrkar-in Zu pawh a khap leh dawn tak avangin a theih chin chinah na takin kan dovin, a that loh zia uar takin kan zirtir tur a ni ang. Zu leh ruihhlo do hi Central YMA/SRS leh Thuneitute kutah chauh kan dah chuan kan tu leh faten min la rawn dem lutuk palh ang e. Chuvangin, Branch YMA pawhin tun aia nasa zawka hma kan lak a pawimawh hle a ni.

2. Ramdang leh Hnamdangte in luahtir loh tura chak taka hmalak chungchang:
Kan ram khawpui ber Aizawl Sipai Lammual ah Sakhaw pakhat be pungkhawm tam thin zia leh an zavai hian man chawiin Hotel-ah chuan an thlen a rinawm si lova. Vai ho phei chuan kawng hrang hrangin Mizote hi an thuhnuaiah min dah a, an hlawh thlengin an in chhiar dan danin pe lo thei lo dinhmunah min dah ta anih ber hi maw. Kan Mizopui ngei khawpuia in luah tur mamawh tam tak an awm reng tih hriain, Mizo chauh in luah tira tun aia tan kan lak uar deuh a tul hle mai a. In luah tur ber an hmuh loh chuan ramdang leh hnamdang mite hi kan ram ah an awm rei thei hauh lovang le.

3. Sumdawnna chungchang:
Kan ramah hian hnamdang non-tribal ten sumdawnna dan kan nei loh chu sawi loh a lo lut tur ringawt pawhin ILP nung neih a ngai chungin kan ramah hian ramdang leh hnamdang sumdawng an tam ve ta hle mai a, Sumdawnnain a ram leilung fate a chimral nasatna ram in min hual deuh vek a, tan lak a tul khawp mai. Tunah phei chuan GST khawvelah kan lut tawh a, Mizoram Merchant Association (MIMA) hotute sawi danin, GST hmangin kan ramah hian hnamdang sumdawng 810 lai an inziak lut tawh a ni, theihtawp kan chhuah a tul ta hle a ni. Kan mamawh huna thisen min petu, thlan min laihsaktu, kan dam loh huna min kan thintu, kan YMA leh khawtlang, Kohhrana thawhlawm thawh thintu ngeite hre reng chungin duhsak thin ila. Sumdawnna kawng hrang hrangah hnamdang hming hawh tir lova, dawr pawh luah tir loh a,lirthei khaltute thlengin Mizote chauh i chhawr hram hram ang u.

4. Mikkhual Chamrei te chungchang:
Ruikukten an thiam tawpin a theihna apiangah min hek reng a, Supreme Court a min hek avang ringawt pawh hian Rs. 5 lakh dawn chu kan seng tawh a, Kum 20 liam hnuah pawh chhuanlam hrang hrang siam a, kawhmawh bawl rengtute hian kan ram roreltu thlannaah hian ram pawn atangin vote an thlak tawh tur a ni lo, theih tawp chhuahin kan dan zel ang. Vawi tam tak lo haw tura ruahmanna zawm duh si lo, kan ram rorelna atana intlanna vote erawh thlak tum leh lawi site hi engtikawng pawha kan tihtawp a hun ta. Tin, chutihrualin Mizorama Chakma cheng an pung chak lutuk leh Mizote min do reng avang hian khawmpuiah pawh kan lo rel tawh angin hautak deuh mah sela, CADC hi thiah a nih theih nan hma lak mek zel a ni.

5. Ramngaw leh Nungcha Humhalh chungchang:
Mizoram hian ramngaw tha a nei ta meuh lova, thenkhat sawi danin khawi report buah emaw chauh ram ngaw kan la nei tha a nih hmel a. Chutiang bawkin nungcha heng ramsa leh lui a nungcha kan suasam nasat dan hi in enfiah kan ngai, Aizawl mite bawk hi hmanraw nei tha kan nih avangin a tichhe nasa ber bertu kan ni tlat a, luhlul chhuah a silai tha leh hmanraw dangte hmang a diriam taka lui leh ramngaw leh nungcha suasam chingte hi na takin lo zilh ngam thin ni se.

6. Mizo nun zemawi vawn nun zel chungchang:
Ram leh hnam humhalh kawngah kan hmaih hauh loh tur chu Mizo nun zemawi a bik takin, tlawmngaihna vawn nun zel hi a ni. Pathianin Mizo-ah min siam a, Mizo tan lo chuan vawn nun zel theih pawh a ni lo. Duhamna, itsikna leh in rel te kan uar ta lutuk mah mah emaw, a tih theih a, awlsam tak a thil tha neih leh midangte ngaih pawimawh lohna a sang tual tual bawk hi vei tham a tling ta. Sem sem dam dam ei bil thi thi ti thin, a thlum a al ei za Mizo te khan a va liam teuh tawh em! Hawh u, thenawmte nen a chawhmeh in suah tawn i uar thar leh ang u.

Kan Mizo hnam incheina te, hnam lam te leh kan Kut te hi kan chawisang zel tur a ni a, Mizo tawng humhalh a hman uar a tul hle bawk. Kan Mizo nun zemawi tak tlawmngaihna kan tih fo zing a heng hnatlang,thlanlaih,mitthi lumen, khawhar lenpui, riahpui thin hi midang kutah dah lovin YMA hruaitu kan nih angin hma hruaitu kan ni thin tur a ni. Hawihawmna, aia upa zah leh thisen pek te hi inzirtir uar zel ni bawk se.

A tawp ber ah chuan YMA hi kan ramah hian dinhmun pawimawh tak a luah chho mek zel a, a chang chuan Sawrkar pawhin a tih theih loh hmachhawn zel a tul thin a, chuvangin YMA hruaitu kan nih chuan huaisen, rinawm leh taimak angai a. YMA hruaitu hna chelh duh tho si hmalakna khirh deuh a awm a chhuanlam siam a tlanchhe reng bik nih hi a zahthlak khawp mai. Tute emaw dap dawna chhuanlam siam fo bik hruaitu ( Safe place leh safe time hre em em hruaitu) hi kan mamawh lem lo. Edmund Burke chuan “Sual punlun chhan chu mithaten engmah an tih duh loh vang a ni (The only necessary things for the triumps of Evils is a good man to do nothing)” a ti tawp mai. Chuvangin YMA leh Mizo mipuiten kan mamawh ber chu hruaitu huaisen, rinawm leh taima a ni, Chhuanlam siam duah lova sual leh ruihhlo do a, mipui mamawh hrang hrang heng Gas lo thleng a piang buk chat chat ngam a, ration buhfai leh thil dangte buk leh teh dik tak mipuiin an dawn ngei theih nan hma la ngam hruaitu huaisen hi a ni kan nghahlelh em em chu ni.

Midangin kan ram hi min siam that sak dawn lova, YMA chak lohna veng/khua a nuam ngai lo an tih thin angin, Mizoram neitu YMA ten theihtawp i chhuah zel ang u.

YMA VUL ZEL RAWH SE

Leave a Reply