73rd YMA GENERAL CONFERENCE NEIH A NI

Ni 16.12.2021 (Ningani) khan R. Dengthuama Indoor Stadium, Mualpui, Salem Veng, Aizawl ah YMA General Conference Vawi 73-na Rorel Inkhawm leh kum 2021-2023 chhung CYMA hruaitu thlanna neih a ni. Chairman Pu Vanlalruata, President, Central YMA chuan a kaihruai a, hunserh hmang tura ruat Pu J. Lalsangliana CEC-in Bible chang Genesis 12:1-2 chhiarin tawngtainain Rorel Inkhawm Pathian hnenah a hlan a ni. Chairman-in YMA General Conference Palaite lawmna thu sawiin, Palaite chu thahnemngai tak leh taima taka rorel turin a chah a, YMA tan leh ram leh hnam tan mahni awmna theuhva thawk zui zel turin a chah bawk.

Chairman kaihhruainain kum 2019-2021 chhunga YMA member thi mi 1834-te sunna hun hman a ni a, member thite hriatreng nan minute khat (1) ngawi rengin kan ding a, Chairman-in tawngtaina hun a hmang zui nghal bawk. Member sun zingah CYMA OB leh CEC, Group leh Branch Office Bearers lo ni tawhte an tel bawk. Kan member boralte hi kan ui hle a ni. Prof. Lalnuntluanga, General Secretary hnen atangin kum 2019-2021 chhunga YMA dinhmun leh hmalakna tlangpui (Annual Report) kan ngaithla a, palai ten report hi ziakin kan dawng bawk a, lawmawm kan ti hle.

CYMA BUDGET 2021-2022 RUAHMANNA:

Pu Fabian Lalfakawma, Treasurer hnen atangin, kum 2021-2022 chhunga Central YMA Budget ruahmanna Rs. 1,68,75,400.00 (Cheng nuai za sawmruk pariat singsarih sangnga zali) kan ngaithla a, palai ten lawm takin kan pawm.

THURELTE :
A. YMA KHAWIH :
i. “Ruihhlo chungchangah Sawrkar/Kohhran/Pawl dangte sawmin inzirtirna nasa zawka kalpui ni rawh se” tih chu kan sawihova, lungrual takin kan pawm.

ii. “YMA Member tinah Endowment Fund Rs 5/- khawn nise” tih chu kan sawihova, kan sawihona hi a tawk e kan ti.

iii. “Central YMA Building sak mek chhunzawmna atan YMA member ten Donation thawhkhawm ni rawh se” tih chu kan sawihova, lungrual takin kan pawm.

iv. “Zirtirtu mahni post-a awm tha duhlo te hi an post-a an awm theih nan Central YMA-in hma la rawh se” tih chu kan sawihova, lungrual takin kan pawm.

B. SAWRKAR KHAWIH :
i. “Mizoram ramri hi Sawrkarin a rang lama chinfel dan ngaihtuah rawh se” tih chu kan sawiho hnuah lungrual takin kan pawm.

ii. “Zirna School-ah Mizo hnam lam zirtir a nih theih nan Sawrkarah thlen ni rawh se” tih chu kan sawiho hnuah lungrual takin kan pawm.

iii. “Kan ramchhung thei phun uar tura Sawrkar nena tangduna hmalak ni rawh se” tih chu kan sawiho hnuah lungrual takin kan pawm.

C. “YMA Dan Bu ennawn ni rawh se” tih chu lungrual takin kan pawm a, nakum (2022) YMA Rorel Inkhawm-ah ennawn ni se kan ti.

D. KUM 2021 – 2023 KUMPUAN RAWTNA :
Kum 2021-2023 chhung atan Kumpuan neih leh tha kan ti a, kumpuan atan rawtna lo lut pahnih:-

1) Ram leh Hnam Humhalh

2) Zirna Uar – te kan sawihova, kum 2021-2023 chhunga kumpuan atan “Ram leh Hnam Humhalh” tih chu lungrual takin kan thlang.

E. KUM 2023 YMA GENERAL CONFERENCE VAWI 74-NA THLENG TUR :

Kum 2023 YMA General Conference vawi 74-na thleng turin Manipur Group YMA (Churachanpur-ah) lungrual takin kan thlang.

VI. PALAI CHHIARNA :
YMA General Conference vawi 73-na Rorel Inkhawm hi chawhma chauh ruahman a nih avangin, palai inchhiar dan pawh tihdanglam a ni a, palai kal zawng zawng zat inchhiar a ni a, palai 1484 kan kal.C hairman-in, Pu Lianzuala Ex-President tawngtai turin a sawm a, Rorel Inkhawm kan tin.

Sd/-
Prof. LALNUNTLUANGA
Gen. Secretary, Central YMA

Leave a Reply