76th YMA DAY TLUANGTAKA HMAN A NI

Ni 15.6.2011 (Nilaini) khan YMA Day vawi 76-na chu tluang taka hman a ni a. Zing karah YMA Day lawmna tur hmun singsain YMA Member leh YMA Chhang Member mi thahnem takin Middle School kawtah hnatlang neih a ni. Zing kar hnatlang a thawh tura ruahman khawlai tihfai leh leivung paih fai hna erawh khuain min bumro avangin thawh theih a ni ta lo a ni.

Chhun Programme chu Bungkawn leh Bungkawn Vengthar Branch YMA-te nen Middle School kawt zawlah zing dar 10:00 atangin hlimtaka hmanho a ni a. He huna Khual-tha Pu Lalchungnunga, Central YMA President chuan YMA Day Chhun Programme hawnna hun hmangin Branch pathum atanga YMA Day vawi 76-na hmang tura kalkhawm zawng zawng te duhsakna a hlan bawk. Khual-tha chuan thusawiin Mizo thalaite hmasawnna rahbi rap tura kan taima tawk lo chu pawi a tih thu a sawi a, nu leh pa te pawh sum leh pai duhamna avanga Bank him leh himlo pawh ngaihtuah lova a pung tam tur nia kan hriat apiang kan bawh huam huam thin chu ram tan a thil pawi tak a niin mi tamtakin an lo chetsual phah tawh a ni a ti.

Chhun Programme-ah hian Kawikah (hmeichhia), Musical Chair (hmeichhia), Volley ball final (mipa & hmeichhia) leh Basketball final (mipa)-ah te Branch pathumin intihsiakna neih a ni a. Branch aiawha intihsiaknaa tel ten theih tawp chhuah a anmahni Branch YMA aiawha infiamna an bei chu mipui kalkhawmin hmuhnawm an ti hle. Heng intihsiakna hrang hrangah hian a pumpui a point hmuh belhkhawmin Bungkawn Branch in an ti tha ber a, Nursery Veng Branch chu pahnihna niin Bungkawn Vengthar Branch chu pathumna an ni. Branch tin ten lawmman tha tak an dawng theuh a ni.

Chhun Programme-ah hi Pu V.L.Zamlova, Organising Committee Chairman, Bungkawn Branch YMA President-in hneh takin a kaihruai a, Upa R.K.Rohluna, Bungkawn Vengthar-in hunserh a hman hnuin Nursery Veng Branch YMA Zaipawl-in Programme tanna atan hla mawi tak an sa a, announcers Pu Romawia Royte, Bungkawn, Nl. Janet Remtluangpuii, Nursery Veng leh Nl. Lalmalsawmi, Nursery Veng a mite kaihhruaiin hun hman chhunzawm a ni a. Mizo lam chi hrang hrang (Cheraw, Tlanglam leh Chawnglaizawn) leh zaithiam zaite ngaihthlak a ni bawk. YMA Day lawmna a kalkhawm hi kan tam lai berin mi 1,000 vel kan ni. YMA Day Vawi 76-na hman lai hian Branch pathum huam chhungah chhiattawk te kan awm loh avangin Branch pathum YMA hruaituten lawmawm an ti a, kum dangah pawh la hman chhunzawm leh an chak thu hahipin an sawi hlawm a ni.

Leave a Reply