A NAKA ZEN

– M.C. Lalruatfela

Lockdown tan tir lamah kha chuan A Biak in hung chhung kawtlai ngaiin kan rum a. “Thu hriltu leh zaipawl zawng zawng an lo reh thuap tawh ang” tih chu mi tam tak thinlung luahtu hla a ni. Thla khat a tlin meuh chuan A Biak in hung chhung kawt laite chuan kan lung a len ta mang hauh lo va. Thu hriltu leh zaipawl zawng zawng an reh tih pawh kan hre tawh lo.

“Aw, Nang kan Lal kan Pathian…” tia veng hrang hrang khawk ruih ruih khawpa hla play thin kha tunah chuan thei reh takin a reh ta a. Chhum lo chat lo a Task Force thupuan hriat tur awm thin pawh thehmeh ang a ni ta. Mipui chawk hlimtu au thiam tak tak ten an thiam an theihnghilh zo ta.

Home Crusade nise a a rei tawlh tawlha kan ngai ho tulh tulh a. Crusade hmasaa kan vuak khuangtê chu vawtu awm loin kil khatah a let reng a. TV hmaa chhungkuaa lama inzui kawi duah duahte pawh ti peih kan awm ta lo. Crusade hmasa a speaker thusawi zawh rual ruala Social media lama fakna au thawm awm chhiar sen loh awm thinte pawh a vawi hnihna ah meuh chuan hmuh tur a awm tawh lo. Kan aupui ruih ruih harhna in a tuam khua leh veng tam tak pawh thla khat a ral meuh chuan an muhil leh ta.

Mahni in chung zawl leh balcony-a rimawi leh zai play-a thiam taka lam thinten an thiam an theihnghilh a. Information centre atanga Pathian thu sawitu tur pawh an vang ta pharh mai.

Heng zawng zawng hi mak angin lang mah se Mizoramah thil mak a ni lo. Mizote nunah chuan thil nihphung pangngai a ni. A tirah kan tihhluai a, kan phur surh a, kan phi cheng zel a, rei kan daih lo. Ar bawm chhe hal an sawi ang lek kan ni.

CORONAVIRUS ngei pawh kan hlau ta lo emaw tih tur a ni a. A tir lama tul tawpa khawlai chhuah pawh inthlahrunawm khawp ni thin kha tunah chuan khawlai chhuah loh chu a mawi lo emaw tih tur hialin kan awm leh mai a. Kha leh chen kan mamawh leh tul bik ngawih ngawih ni lo theite kha tunah chuan a ni ta lo. Kan rilru danglam zung zungin kan zia thlak thin teh mah ila Coronavirus lahin inthlak danglam a tum der si lo a. A hlauhawm ngaiin a la hlauhawm reng si.

Isua zirtir Thoma khan zirtir dang, a thianten, Isua an hnena inlara an hmuh thu an hrilh kha a ring thei mai lo a, “A kuta thir khenna serte kha ka hmuh a, thir khenna serahte chuan ka kutzung ka khawih luh a, a naka ka zen meuh loh chuan ka ring lo vang,” tiin a chhang a. Ni riat (8) hnuah chuan ina an awm laiin a zirtirte hnenah Isua a rawn inlar leh a. A inlar hmasak a ring lo tih a hriat avangin Thoma hnenah chuan, “I kutzungin han khawih la, ka kutte en rawh; i kut han ban la, ka nakah zen rawh; ring lovin awm suh la, ring rawh,” a ti a. Chutah zet chuan Thoma pawh harh ta kawk mai. “Ka Lalpa leh ka Pathian i ni,” tiin a chhang a. Chutah Isuan a hnenah “Nang chuan mi hmuh avangin i ring a ni; hmu lova ring apiang te chu an eng a thawl e,” a ti ta a ni.

Mizote hi Thoma kan ang riaute hian a hriat nia. Coronavirus hri lengin kan ram a rawn run a, natna vei kan awm a, thihpui te hial kan awm hnuah chauh a hlauhawmzia kan hre dawn chauh niin a lang a. Thoma anga a naka zen kher kan tum a nih chuan a dik lo. A nakah zenin, kan ramah a natna vei awmin thihpui kher lo mah ila he COVID-19 hi a awm ngei a, a inlar ngei a, mi tam takin an thihpui ngei a ni tih hi rin a ngai a ni. A taka tawn kher a ngai lo. Kuta khawih kher phut tur a ni lo. A nakah zen tum kher loh tur. Natna hrik te lutuk tak mai a ni a. Kuta khawiha a naka zen chi pawh a ni lo. Hmu kher lo, tawng kher lo, a naka zen kher loa Coronavirus a awm ngei tih hi rin tur a ni. Fimkhur taka awm a, sawrkar thupekte zawmtu apiang an eng a thawl mai dawn a ni.

COVID-19 hi a naka zen phut kher suh. I zen meuh chuan khua a tlai tawh dawn si. Tun hi hun lawmawm chu a ni a. Tun hi Coronavirus laka himna hun duhawm chu a ni.

Inah tawm la, inveng fimkhur la, mi dang nen inchiahpiah loin awm la, lo him zel ang che.

Leave a Reply