A Nu, Bei Hle Hle….!!!

– Zokunga
Secretary, NYMA

Nu in a fa hmangaih tak mai puak mut tum a “Mate, bei hle hle…” ti a a awi darh darh hi a hlutzia nautein a hrethiam lo mai thei. Thalai nu leh pa la nei mekte pawh hian kan nausen laia kan nute min awih mut thin hlutzia kha kan ngaihtuah khat khawpin a rinawm. He thu ziaktu ngei pawh hian nu leh pate’n mual min liam san hnuin “Mate, bei hle hle…” tih hlut dan te kan la hre chho dawn chauh anih hi maw.

Tin, heti hi a ni a… Aizawl Civil Hospital, Out Patient Department-ah chuan Doctor hmuh tum damlo tam tak an pungkhawm a. Natna khirhkhan hmel tak te, kang-lang deuh hmel te, hausak hmel tak leh retheih hmel takte an kat nuk mai. Hmel en reng reng pawha rethei tih hriat ngawih ngawih, keini ang bawka Private-a Doctor rawnna tur neih hmel loh ve tak, damdawi leina tur pawh ngaihtuahpui ngaih hmel tak tlangval pakhat hian kum 70 vel awm nu pakhat arawn paw phei tawng tawng a. Dim leh duat taka ka bula a rawn nghah hnua an ti ti dan atangin a hringtu nu ngei a ni tih hai rual a ni lo. Chu tlangvalin damlo (a nu) a rawn puak phei lai chuan “A nu, bei hle hle…!!!” a tih leh tih loh chu ka hre hauh lo. Kei, ngun taka lo thlirtu rilru-ah pawh “A nu, bei hle hle…!!!” tih ala awm bik chuang bawk hek lo.

Mahse, ka’n ti hluai teh ang. Ka bula an rawn thuta, a hringtu nu ani tih ka hriatchhuah tak hnu khan thlarau mite tawngkam takin “A nu, bei hle hle…!!!” tih hi fiah em em maiin ka rilruah a rawn lang thawi ruai ruai a. Hemi chungchang ngaihtuaha zan tam ngaihtuahna ka sen hnuah he thuziak tlawm tak hi pekin ka lo awm ta a ni.

Ti hian ka ngaihtuah ta vak vak thin a…. Mi thenkhatin fa Officer lian tak tak an nei a, an dam loh nikhuaah pawh an fa-te Driver leh an awmpuite’n a tul angin hringtu nu leh pa damlo te an buaipui zung zung a. Damdawi In lama riahluh a ngaih thulhah pawh awmpui nulate’n atul angin an buaipui mai thin. Hemi phena thil in zepru atam zia hi kan ngaihtuah ngai em? Driver leh Awmpui nula chuan hlawh hmuhna atan hmangaih taka hnute tui nena min chawiliantu, kan tlin loh leh fel loh lai ber pawha min phatsan chu sawi loh, nasa leh zuala min hmangaihtu kan nu leh pa te kha eizawnna atan min lo hman sak thin anih chu. Sermon sawi thin te phei chuan sawi se “A VA RAPTHLAK EM!!!” an tih ngei ngei tur zinga mi anih hmel.

Chu tlangval berh ve takin hmangaih taka anu a pua ka hmuh khan vawiin thlengin ka nunah thu ala sawi ta reng mai. Hun liam tawh hnu hi koh kir theih ni ngat se, ka nu emaw ka pa emaw kha vawikhat na reng reng chu hmangaih taka paw chung a “A nu/a pa, bei hle hle…!!!” han tih ka va han chak tak em! Chu ka duhthusam chu lo tihlawhtling thei ta tehreng pawh ni ila, ka tana an lo tih tawh zawng zawng te ka la rulh zawh chuan loh tur zia ka ngaihtuah thin erawh hi chuan vawiin thlengin min la tibuai hle thin a ni.

Hetiang ka’n sawikual duahna chhan pawh hei hi a ni… Kan nu leh pa te hian an theihna zawng zawng kan tan an hlan zo thak a. Nunna chan ngai pawh nise, an fate’n kan nun kan chan ai chuan an nunna hial pawh an pe phal chiang a ni. Hei hi nula tlangval, fa la nei lote tan chuan hmuh thiam a har mai thei. Mi pangngai kan nih chuan nakin lawkah nupui pasal neiin, fanau pawh kan la chawi ve ngei ang. Chumi hun, thil kan hriatthiam hunah chuan a tlai palh theih avangin tun atang ngei hian nu leh pa te kan hmangaih thiam angai a ni. Nausen buchip kan nih laia hmangaihtu kan mamawh ang chiah khan, kan nu leh pa, upa lam tawhte hian hmangaihtu an mamawh ve tho a ni. Thalaite hi chhan let loh hmangaihna hlan nat zia hretute kan ni lawm ni kha?

“A nu, bei hle hle…!!!” ti chunga khawlaia in puak ut ut erawh kan nu leh pate hian an beisei hauh lo. Mahni inchhung khurah ngei hian an thu zawm ila, kan tih theih a tam leh tlem lamah min teh dawn reng reng lo tih hre chungin kan phak tawk ang ang an tana tihsak ve mai hi a tawk em em a ni. Chutiang taka kan nu leh pa te tana kan ti thei anih chuan Officer lian tak nih emaw, Sumdawng hausa tak nih emaw, hmeltha tak nih emaw ai pawha hlu zawk, HMANGAIHNA tak tak dawngah an inngai hmiah ang. Ngun takin han ngaihtuah ve mah teh, i bawrhsawm lai ber pawha hmangaih taka lo enkawl thintu che, i nu emaw i pa emaw khan, sawi sawi lo mah se i hmangaih let hi an beisei ve reng a. Nausen buchip i nih lai atanga tun thlengin, mi fate aia that bikna riau i nei lo chung pawhin i nih ang ang khan an hmangaih tawp mai che a ni.

Nang pawh, i nu emaw i pa emaw kha mi nu leh pa te aiin an ropui bik lo emaw, an lo nep zawk deuh emaw anih pawhin iai bik reng reng suh. Pathianin i nu leh pa atana a pek che an ni tih pawm tawp la, an nih ang ang khan hmangaih ve tawp mai rawh. A tlai hma ngei hian khawlaia “A nu/a pa, bei hle hle…!!!” ti kher lovin in inchhung khurah ngei khan i nu leh pa i hmangaihna han lantir ve teh le. Thlarau leh tisa lamah malsawmna i dawng ngei ngei ang a, engtikah mah i inchhir ngai lovang.

Leave a Reply