A VA LAWMAWM EM

R.L. MANGKHUMA

Kan hriat theuh sa „Thawnthu hlui a thar reng a ni‟ tih angin, kum sawm hma lam atanga kan lo thlir tawh, Khatla Thlanmual mawng Tlawng road peng atanga Approach Road to Nursery, Pu RL Mangkhuma in bul kawr RCC bridge kaltlanga Pu RC Vanlalsawma kawt thlenga PCC, 407 Truck kal theiha phah zawh a nih hnuin, kumin 2016 kum bul khan Pu RC Vanlalsawma in atanga Pu C Darthankima in bul thlengin PCC, pick-up motor kal theihin phah zawh a lo ni leh ta a. Pu C Darthankima, Local Council Chairman in ama ram a pekah motor turning point tha tak siam nghal a ni bawk a. A va lawmawm em. Vantlang tana mahni ram pek phalte hi intihhmuh atan a tha ngawt mai. Lawmthu kan sawi e.

He kawng hi CT Road tih a nih angin kan veng pa, Pu CT Zakhuma AMC Chairman Fund hmanga siam a ni a, a va lawmawm em, kan theihnghilh ngai tawh lovang. Lawmthu kan sawi e. Hmasawnna reng reng hi mi zawng zawng lungawina ang thlapa kutchhuak puitling taka thawh hi a har a. Eng pawh ni se , Nursery Vengthlang, hnuchhawn ram‟ kan lo tih thin chu tunah hian a eng ve tan det det ta a, a va lawmawm em. Lawm nachang i hria ang u.

He kawng hi kum 40 lai liam ta kum 1975-ah Pu L Kawlhmingthanga Revenue ASO I a nih laia Maubawk H/S bula chhuak tura plan tawh a ni a. Kum 1994-1996 Congress leh MNF Combine VC ten plan survey dung zuiin feet 8 laia zauvin Pu Lalnuntluanga (RIP) in bul Bungkawn H/s veng thlengin an lai a. Mahse master plan la ngai tur a ni a, tunah chuan a hnim leh zo tawh rih a ni. Pu Lalnuntluanga (RIP) Bungkawn VC thin chuan, “Maubawk H/s bula chhuahtir aiin Luangmual Govt. Complex ah chhuak se, a kawng a zalin a remchang zawk daih a sin,” a ti nghe nghe a. He kawng hi a puitlin hun chuan H/S leh Primary Sikul te tan kawng pawimawh a nih rualin Maubawk Tamdo ramte a paltlang ang a, sum chang thlai thiar velna remchang a nih piah lamah Aizawl khawpui zauhna remchang tak a ni nghal dawn a ni. A lo hlawhtlin theih nan chuan political party te leh khawtlang hruaitute leh mipui tanrual a ngai a, tin, sorkar chak kan mamawh lehzual dawn a ni.

A tawp berah chuan mipuite leh khawtlang hruaitute‟n khawtlang hmasawnna hna kan thawh reng rengin kan Kristianna tibawrhbang lo turin mahni hmasialnate dah bo ila, mahni hlep tur ringawt thlir lovin dikna leh rinawmna vawng tlat zelin chung lam malsawm tlaka hna te emaw lian emaw pawh nise sawisel bo thaka thawh hi i zir ve tawh ang u tiin kan inngen a ni.


“I thuin thiam a chantir ang chia, I thu vek chuan thiamloh a
chantir bawk dawn che a sin.” (Mat. 12:37)

Leave a Reply