Aizawl Municipal Corporation Chungchang

Kan hriat angin ni 16.2.2021 (Thawhlehni) khan Aizawl Municipal Corporation inthlan chu tluang taka neih a ni a, ni 18.2.2021 chawhma dar 10:00 atangin Pachhunga University College (PUC) ah vote hi chhiar tan niin chawhnu dar 1:00 velah ah vote hi tluang takin an chhiar zo thei a ni.

AMC Area hi Ward 19 ah then a ni a, heng ward tin aiawh a thlanchhuah te hi Councillor tiin vuah a ni. Councillor thlanchhuah te hian Mayor tur leh Deputy Mayor tur an thlang leh thin a, chu chu Aizawl Mayor, Deputy Mayor an ti. Tin, anmahni atanga vek hian Executive Councillor tur mi 3 danin a phal angin an ruatchhuak leh ang.

Heng Councillor thlanchhuah te hi AMC Legislator an ni a, session te neiin AMC hmalak dan tur hrang hrang an rel thin ang. The Mizoram Municipalities Act, 2007 (as amended on 2015) behchhanin hna an thawk thin a ni. Heng Municipal Corporation hnuaia dan siam zawng zawng te hi State Sorkar in a pawmpui vek thin a ni tih kan hriat tel a tha awm e. MM Act, Rules & Regulations reng reng hi Sorkar gazzeted vek a ni. Amendment siam dawn pawhin Sorkar pawmpui a ngai a ni. Tin, heng dept. hrang hrang te hi tun dinhmuna AMC hnuaia awm te an ni. IT Cell, Establishment, Finance & Account, Engineering, Building Regulations, Property tax, Shop Licensing, Registration of Births & Death, Hoarding & Advertisement, Solid Waste Management.

Municipal Ward 19 ah hian Local Council 83 awmin Ward tina veng awm zat erawh a in zat vek lem lo va. Ward thenkhat ah Local Council 3 an awm laiin a thenah chuan Local Council 8 lai te a awm bawk. AMC area hi a zau ang reng hle a, kan hriatthiam dan awlsam deuh turah chuan chhim lamah Hlimen, hmar lamah Selesih, chhak lamah Zemabawk (Berawlui) leh thlang lamah PTC thlengin a huam a ni.

AMC Councillor term hi kum 5 zel a ni a, kan hriat angin tun tum inthlan hi AMC dintirh atanga a vawi 3 na chiah a ni.

Leave a Reply