AN NI LEH KEI NI

– Zokunga
Secretary, NYMA

Pu Siamkima’n “An ni” sawinana American ho a hman laiin keini ang duang chuan Silchar Vai ngalfim rilrel zinga mi 6/7 vel mai hi “An ni” kan ti ve chawm mai a niang chu. Tunlai thangthar lehkhathiam zawk leh hmun hrang hrang tlawh a zinkual hrep tawh ho tan chuan Silchar zin thu mai mai han thaikawi duah chu a nuihzat thlak deuh maithei. Mahse, chutiang thil ho deuh anga lang ziak tura tlema huaisenna min petu a awm ve bawk. NYMA-a ka sangawi zawnpui ho hi “Dholai nge hla Bagha?” tiin zawt thut ila, 50% hi chuan min chhang dik bik hauhin ka ring lo. Kan President meuh pawh hian “A tehna a zir aniang chu” tih na chang a hre ngut emaw chu…

Hriat nialnual chu buaina mai a ni..

India ram a khawpui mawi leh tourist hip lut nasa a an sawi lan ngai reng reng loh Silchar khawpui chu nikir thla tahrik ni 8, chhun dar 12-ah kan lut hlawl mai. Hre zik tluak si lova thil hre ve nial nual ang a lan hian harsatna min siam nasat theih zia chu atakin ka tawng chiang leh pek hle. Keini ang khualzin duhdak lo tanpui thei tur Mizoram House lamah mifel tak tak an kuh tul laia vawi 2/3 kan lo tlawh ve tawh avang maia midang hruai ngai lova thleng ve mai thei tura in ngaihna sual leh chapona lo thawk chuan min tibuai pherh ta er mai. Mizoram House atanga 2 K.M vel a hla, minute 5 vel emaw lek a thlen theih tura ngaih chu Dar 12:30-ah kan pan ve rawih a, dar 1:30-a appointment nei khan hma-taka thlen tum chungin dar 1:20 a rik pawhin “Income Tax Office kaha he?” kan la ti lauh lauh mai. A tawp a tawpah dar 1:30 a lo rik meuh chuan kan bo dan a thui ta lutuk deuh a in hriain kan zawng buai peih tawh lo law law ringawt.

Ar talh dan chikhat chauh a awm lo..

“Khawnge ni Vai tawng te mai mai min thlahtute atangin kan tih theih ve zawng tak anih kha mawle” tih tur awm chuang lo mah se, Auto Rickshaw lak dan chu ka lo la thiam ve tlat a, Gypsy Hardtop- in min rawn guard chu ni chiah lo mah se, hnung lamah min rawn zui a, in ti thei fe a darkar chanve zet Auto Rickshaw-a ka khik vur vur hnuah tluangtak leh tlai tak chungin kan tum ram kan thleng ta hlawl mai. Min lo hau hrep dawn nge min lo welcome dawn tih hre chiah lo mah ila, kan tum ram kan thlen tak avangin a lawmawm ve hrim hrim tho mai.

Harsatna atangin thil tam tak a zir theih thin..

Chutia harsatna eng eng emaw kan tawh tak avang chuan he Article hi ka dawn phah avangin ka lawm tho tho mai. Kawng bo avanga mi 6/7 vel kawng chin kan zawh kualna lamah thil tamtak ka zir chhuak ve in ka hria. Mizo mipui tam ber thinlungah hian Silchar vai ho chu kan hmelma en deuh tlat hian ka hre thin. Mahse, tanpui ngaite tanpui tura mi an lo that zia ka hmuh hian keini Kristian ram a mite hian engemaw zir tur kan neih ka ring tlat a ni. Kan ar khual hawi hu hu atang mai pawhin mi pangngai tan chuan tanpui kan ngai tih chu hriat a harsa lo tawp ang. Kan kal tumna atanga kan hlat tak deuh avanga min ngaihtuah em em tu vai ngalfim pakhat phei chuan inkawh hmuh satliah mai duh tawk lovin dar a in kuah meuhin engemaw chen min han hruai peih te kha a ropui hle mai. Vai ngalfim pakhat Pick-up khalhin kan motor wheel-cap a chhar min pek leh tum a nui sang chunga min um paha a rawn vai lauh lauh te kha “a mawiin ava Vai YMA tak em” tih loh rual a ni lo.

Mi pakhat avang mai hian veng a mawiin a mawilo thei thin Silchar vaiho hi an vaiin an fel vek lovang tih chu hriat sa a ni. Mahse, mi 6/7 vel kan tawn ve chhunte an fel em avang khan keini thian dun tan chuan “Silchar mipui chu an fel in an tlawmngai hle mai” tih loh theih a ni tlat lo.

Hei hi mizo mipui pawhin kan hriat a pawimawh khawp mai. India ram hmun hrang hrang leh foreign atang te pawhin Mikhual an lo kal fo thin a.

Heng mite lakah hian that kan lo chhuah a an mamawh ang a kan tanpui hian “Mizote chu an fel hle mai” tih kan hlawh mai thin a lo ni. Chutih rualin tuten emaw kan mikhualte kut kan lo thlak emaw pawisa kan lo laksak emaw anih chuan “Mizote chu an sual hle mai” tih kan hlawh lo thei thin lo. Chutiang mikhual lo tawng fuh mi 2/3 avang mai chuan kan mikhual ten an ram a an haw leh huna kan chanchin an sawi dan tur a in nghat thui hle tih kan hriat reng a tha awm e.

YMA Member-te tih mahmawh Tanpui ngaite tanpui….

Kei ni YMA Member-te hian kan thuvawn “YMA chu tanpui ngaite tanpuitu a ni” tih hi kan theihnghilh mai ang tih hi ka hlau ve thin. Kan hnathawhnaah emaw, kan lenvahnaah emaw khawi hmunah pawh tanpuingai kan lo tawng palh thei. Chumi hunah chuan an ni (Silchar vai ngalfim) pawhin mi an tanpui peih lai hian kei ni (YMA Member), thuvawn atana mi tanpui hmangtute hian kan thuvawn hi a takin kan hmang lo palh ang tih hlauhawm tak a ni.

A theih ang ang a midang tanpui hi a YMA mai a ni lo, Krista hnungzuitute tan chuan kan tih mahmawh, kan Bible-in min phut tlat a ni. Hlimna leh lawmna te pawh hi kan dawn lamah ni lovin, midang hnena kan luanchhuahna lamah hian a awm zawk fo thin tih hriain kan phak tawk theuhah midang tanpui turin tunaia thuk deuh zawkin i in pe leh teh ang u.

Leave a Reply