ANLO THLENG TAN TA

Kan unau hmun danga (State Pawn) a awmte Sawrkar hmalakna in Mizoram an rawn pan a, hripui leng karah thlawhna a hman theih loh avangin lei lam ah rel (Train) leh lirthei (Motor) hmang in an ram neihchhun an rawn pan khawm a ni. Hetih lai hian heng kan unau lehkhazir leh hnathawka ram danga awmte lo haw tur hi thenkhat chuan kan lo huphurh em em a, hri hlauhawm tak leng mek chu an rawn hawn kan hlau a ni, a dik reng mai.

Heti lo zawng deuh hian i ngaihtuah ang u hmiang, mi ramah awm in, hri avangin an awmna hmun ah thihna nitin deuh thaw a thleng reng a, thlaphang reng reng in hun an hmang a ni. In lama an chhungte rilru pawh thlamuangin a awm thei bik lo ang. Sawrkar hmalakna lawmawm tak avangin tluang taka anlo haw hi fimkhur takin lo lawm ila, sawrkar in ruahmanna tha tak a siam hi i ring tawk ang u. Felhlel lai alo awm a ni pawhin mitin te “A chhe lai siamtha tu” kan ni thei tih hria in sawrkar kaiza vengtu ah tang vek turin kan rilru i siam ang u hmiang.

A hmunthu a lo awmte pawhin lo haw thar te lo lawm dan tawk thiam ila, hun engemaw chen chu a theih chin chin ah hnaih lo ila, chhungte pawh kan in ngai in kan inthlahlel tawh viau in a rinawm, mahse kan ram, kan hnam damna tur a ni tih hria in thupek i zawm hram hram ang u.

“Rinnain Mosia chuan a lo puitlin hnu khan Pharaoa fanua fapaa vuah a duh lo va; rei lo te atan sual nawmna hlimpui ai chuan Pathian mite nena tihduhdah tuar a thlang ta zawk a; Krista an hmuhsitna chu Aigupta ram rote ai chuan sum ropui zawkah a ruat a; lawmman pek tur chu a thlir thin avangin.” Lo haw thar te leh an chhungte pawh in sawrkar thupek zawm hram hram ila, inkhunghran hi sual nen chuan tehkhin chi chu a ni miahlo, mahse reilo te chhung kan inkhunghranna kha nakin zel a kan damna leh kan himna tur a ni tih hria in, chhel takin i tuar hram hram ang u.

Sawrkar thupek angin hun engawm chen Lockdown/Curfew kan hmang ta, thu kan awihna avangin Pathian zarah tun thleng chuan kan la him a, hun engemaw chen chu kan la chhunzawm a ngai dawn. Thuawihna bawk kan dampui leh dawn a ni tih hria in thupek i zawm leh hram hram ang u, hun rei tak kan tawrh tawh hi engmah lohah kan chantir palh ang e. Fimkhur takin i kal zel ang u.

A tawp berah chuan kan unau lo haw te, lo haw mek leh lo la haw leh tur te kan lo lawm che u a, tluang taka inlo haw zel theih nan duhsakna kan hlan a che u. Chutihrualin kan ramah he hri leng mek pu darhtu in nih loh nan rawn rawn fimkhur ula, in lo thlen hun ah pawh Sawrkar thupek tha taka zawm turin kan lo beisei dawn che u a ni.

Leave a Reply