“Arkaiden zan”

– Lalrinzuala Chawngthu

Khuangchawi thla a lo her chhuah tawh hi chuan eng phur phur emaw hi chuan kan phur hlawm chu a nih hi maw! Zep nak emaw, October ni 12, 2011 (Nilaini) zan kher phei kha chuan thianpa Mazawna’n Rulchawm khua atanga min rawn biain ‘arkaiden zan” thla eng no ngulh mai lungleng taka a thlir thu min rawn hrilh lo se kei pa haihawt tak hian ka hre leh pek lo ang. Ka awmna hmun biru angreng tak atanga ka’n thlir ve nak chuan a lo eng na meuh mai! Hla pawisawi lo deuh deuh (pawisawite pawh hrut tel thoin) ka ngaithla vang vang a.

Suangtuahna a vak kual nasa hle. Tlangval kan hriat tak tak hma deuh, thingtlanga kan awm ve lai nun ho te te mitthlaah a lo lang nghal iarh iarh a. Tute leihkapui dai huh depah emaw tingtang nen kan han lawn chilh te te a, tinzawn bik nei rana a kel-rawl-a-kel-rawla thiam chhuak mang lo hla hril chawpa Vanlalruati hla “Pari zun” kan han
sak khum ral ral ten inngaihbel nachang hre map loa min han kal pel thuak thuak thin leh a tuka inhmuh pawha min en dan danglam ta chuang reng reng lo te khan tun hnua han inhmuh nikhua changin “nei ve tawh rawh,” a phuk-a-phak hre hauh loin min han ti thla ngawt zel a (hre lawk ni ila lo sak khum bik lek loh tur).

1996-97 chhoa u RC Sawma hoa Pu Hmangaihthanga (M-Section) in rel laiah u Ralzuala mitthla rana Valtea hla “Chhuihthlangvala” kan sakho rawl rawl laia hotupa berin ding thlek ang ber bawra “Chhuihthangvala, âr ang a vaih hi” tih lai uar mang khenga a’n lak nawn leh a’n bass nghal chher chher te, Tv. Muankima (Tlawng Rd) te in bul kawngsira mi’n awm lo an tih hnu thlenga u H.L. Rinawma tleirawl kawikhawmte nen hla hriat zawng zawng kan sak zawk thak tum te leh Pu C.T. Zakhuma (A-Section) in chunga zanlai thleng rawka Bungkawn lam thlir paha Pu Dingngheta te nen tingtang inkuah chhawk zuta kan zai ral ral tum te kha engtikah mah a her chhuak tawh lo ang.

Khatih hunlaite khan leihkapui zai tih tawngkam hi hman a la ni ngai lo, mahse, leihkapui zai dik takin kan zai ve tak rawl rawl a. Music genre hrang hrang kan hmelhriat chhoh hnua kan chawhpawlh chhoh nawk nawk laiin Mizo thinlung fan ngak leihkapui zai kan hlamchhiah theih lohzia kan lantir zel a. A ni, heng hlate hi arkaiden zan nen a inhmeh bik em em a, genre dangte hi zawngin lunglen a lo hnem ve tak tak lo e.

Khawi lai laiah emaw he arkaiden zan ngei hian leihkapui zai dik taka lungleng taka lo zai vang vang pawh awm mah se tu’n i dem lul lo ang u. Mizo lunglenna hi arkaiden zan tel loin a famkim meuh lo a, nula tlangval inlemna thawnthu leh hla tha tak takte hi arkaiden zan nen tun thlengin a la inkaihhnawih reng. He arkaiden zan hian a ni lo’m ni kan theihngilh then tawh nunhlui min hrilhnawna kan thinlunga pindan khawhar tak, a awm tih pawh kan hriat mang loh luhkhunga suangtuahna rama min hruai thin? Kei zawng tui tla thi mai turin an nun zawng zawng an hmu zut zut thin an tih anga ka nunhlui ualau leh kumkar zawng zawng khawn khawma suangtuahna hmaichhana min hluitu, mihring ka nih anga lunglenna min kaih chhuahsak hnua min hrem a, min tinui lehtu a nih miau avangin ka nunah awmze nei tak niin ka hre thin.

2.30 am 14.10.2010

Leave a Reply