BE A MAN…!

– Lalchhuanawma (Pute-a)
A – Section

(He thu hi July 31,2018 zana JAC inkoh khawm a Pu Lalchhuanawma thusawi a ni a, Kan ngenna anga Nursery Aw a chhuah tura min siamrem sak avangin a chungah kan lawm e – Ed.)

Zanin Programme-a 15 mins thusawi tura kan hruaituten min rawn ruat ve tlat mai hi lawm tur nge lawm loh tur pawh ka hrethiam lova, sawi awm ka nih pawh ka hre chuang hek lo; mahse min beiseina tihhlawhchham ka duh loh vangin theih tawp chhuahin ka rawn inbuatsaih ve tawp mai a ni. Thu ropui leh ril tak sawi tur ka hre dawn lova, tuna hmana chhawr nghal mai theih, mimaltinin kan neih vek si, hman tangkai nachang kan hriat loh vanga kan chhiatpui fo thil tlemte sawi kan tum dawn a ni.

Mi Puitling (Be a Man…!) : Indian Constitution ang chuan kum 21 tling chuan VOTE a nei thei a, Puitlinga ngaih a ni. Mahse kum 21 tling, PUITLING LO tih in nei nual ang. Anih NANGMAH kha kum 21 i tling tawha PUITLING i inti em…? I rualpui, Chhungkaw enkawl leh Kohhran leh Khawtlangah rintlak tak tak i hre nual ang. Chu’ngte vang chuan i nun dan nin leh sim duh chang i nei fo ang. Engvanginnge chu i duhna chu i hlenchhuah mai thin loh le…?
Tuna kan sawi duh ber leh hrilh che u kan duh ber chu, tuna Puitling riaua i hriatte nih ang ni ve tur khan NANGMAH-ah Pathianin THEIHNA (POTENTIAL) a dah ve tho tih hi a ni. Chu Theihna chu ti chaka hmang tangkai mai turin kan sawm tak meuh che a ni.

Chhia leh tha hriatna leh thliar theihna : Pathianin min siam hian CHHIA leh |HA hria leh thliar hrang thei turin theihna min pe vek. Mahse a tha zawk hre reng chung sia a thalo zawk kan thlang tlat thin hi a pawi lai tak chu a ni.
Chu kan duh thlan chu engtinnge kan control/tih danglam theih ang? Har hle mah se theih loh chu a ni miah lo. A chhan chu Pathianin nangmahniah THEIHNA a dah tlat a lawm.

Hun hman tur i la neih theih chhut rawh : Tunah chuan i dam chen tur chhut lawk teh ang. Tunah kum engzatnge i nih…? Bible-in ‘mihring dam chen chu kum 70 a ni a, chakna avangin kum 80 pawh a ni thei e’ a ti a, kum 80 dam turah inngai la, kum engzatnge i la neih theih le. (entirnan- tunah kum 21 i nih chuan 80 tling tur chuan kum 59 ila nei tihna a ni ang) Chu hun ila neih chu ruihtheihthil tih nan nge, nunphung pangngaia nunga Puitling taka nun nan…?

Tuna I nun anga zing thawh veleh atanga No 4/Zu leina tur ngaihtua reng renga puk/hralh ruk tur zawn emaw, i suffer dawn ruaiah leina tur pawisa i la nei si lo, i rilru hah thin zia kha. A tawp a tawpah pawisa i nei ta, i va lei, tihna tur hmun fianrial zawn leh a ngai, JAC/Duty an hrang si… Chutianga hun hman leh chu i thlang anih chuan, sawi tur dang a awm lo. Ti chhunzawm zel la, JAC-in kan man che chuan vua-in hrehawm thei ang berin kan hrem thin che anga, Home, Centre, Jail tih velah kan dah leh thin che anga, kum 2/1 a ral meuh chuan i hun tawp i thleng nge nge mai ang.

Chumi chu thlang lova hlim leh zalen taka chhungkua, khawtlang leh Kohhran tana tangkai ve duhna i nei a nih erawh chuan nangmaha theihna awm kha i tihchak a, Suffer hrehawm eng ang pawh tuar chhuah huama i duh thlanna hmanga i beih a ngai dawn. Mahse zam suh nangmahah THEIHNA a awm chiang lutuk a nia.

Thil 5 pawimawh deuh mai chu :
a) ‘Pangpar hian midang a el lova, Mawi takin a par chhuak mai a ni.’ – Tumah el lo leh intehna atan hmang lovin nangma nun kha mawi takin i par chhuahtir thei.

b) ‘Thil tih sual hi mihring zia a ni a, Ngaihdam hi Pathian zia a ni.’ – Mihring i nia thil tisual thei i ni e, i zia ani tlat a. Mahse ngaidam theitu che Pathian a awm tih hria la, sima inchhira a hnena ngaihdam i dil phawt chuan lo ngaihdam che kha a zia ani tih i hre thung dawn nia.

c) ‘Hlimna chu tuarna pumpelhah ni lovin Tuar chhuahnaah hian a awm.’ – Hlim duh lo tumah kan awm lovang, mahse chu hlimna chu harsatna leh hrehawm tuar pumpelhah ni lovin pumpelh lova tuarchhuahah alo awm zawk thin.

d) ‘Zalenna leh hlimna hi midang atang ni lovin Nangma thawhchhuah atanga i neih tur a ni.’ – I nun a zalenin i hria em, hlauh ruk, vei ruk, zawn ruk nei reng chung chuan hlim a har ngawt ang. Zalenna leh Hlimna nei tur chuan i hlauh ruk thinte hlau lo tura sim ngai nangma’n i sim phawt a ngai. Harsa mah se pumpelh zawng lova i thawhchhuah a ngai a nih chu.

e) ‘I hun kal tawh vangin beidawng suh I kalkawng tur ani tawh si lova.’ – I nun leh hun kal tawhah thil tha lo leh sual i ti tawh thin ang, chu’ng vang chuan beidawng duh suh. A chhan chu chu kawng chu i zawh nawn theih tawh miah loh turin hunin a liampui daih tawh. Tunah chuan hun thar, kawng thar hlak I zawh tawh dawn a, tisual nawn leh tawh lo mai rawh.

Rin tur leh rin ngam pakhat chiah : Ruihhlo bawiha tang a, ralti reng renga awm a, ruihna tur sum zawng a mi bum, rukruk leh Ruihhlo vek vawrh thin te, sim tuma midang a in nghata Camping, Centre leh Jail thlenga i awm thin chunga ila sim loh ah te khan Nangmah i pawimawh ber. I thiante, i chhungte, campinga speaker te ngei pawh i bum theih mihring vek an ni, rin leh innghahna tlak anni lo. Mahse Pathian Engkimtithei chauh rinchhanin ruihhlo bawih atang hian i chhuak thei, nangmah leh i duhthlanna chiah a pawimawh ta anih chu.

Awle, khang zawng kha kan sawi lan hman point-te chu nih rih mai se. Tunah chuan Ruihhlo bawih atanga chhuak tura i duhthlanna thiang tak hmanga NGHEI HMAK i thlang hlauh a nih a, i hmaa hrehawm leh harsa i tawrh chhuah ngai, rawn inchhawp tur kan sawi leh lawk ang.

Suffer : Mittui tla reng, hnap tawlh, kawthalo, thling za leh na, kut leh ke control theih loh, kal theih loh, zawi leh engmah ei theih loh, darkar 72 aia tlem lo tawrh a ngai.

Lunglen : Darkar 72 a ral chuan Suffer zualpui a zia a, taksa a rawn chak tanin thil tlem tlem a ei theih a, kal pawh a kal theih tan – hetiang a chhuah vah theih chiah hian thiante leh tihpui thinte hmuh chuan Lunglen tuar chhuah rual a ni lo, chuvangin kar 2/3 chhung chu tumah dang hmu leh kawm lo tura ina inkhung a ngai.

Pathian auh : Heng hreawm tawrh lai hi Pathian tanpuina mamawh hun lai ber a ni.
Ani thlamuanna leh tanpuina tel lo chuan tuarchhuah rual a ni lo. Chuvangin thinlung leh tih tak zeta sima, engmah i nih loh zia hria a Pathian i auh eih a ngai.

Kan tih miah loh tur : Rilru ti no va, chhungte bum nana Doctor-a in entir a EDNOK emaw AP emaw NEP10 emaw inchawhtira, mahni leh mahni inbum duhna rilru put miah loh tur a ni. Tin, chhungte bum nan emaw tia zu rim intih nam kha tu tan mah a pawi lova, nangma tan chiah a pawi tih hriat reng tur a ni.

Awle, I duhthlanna thiang tak hmangin ruihhlo bawih ata chhuak turin Nangmaha theihna awm chu huaisen takin hmang tangkai rawh le. I theihna phak bakah Pathian rawn chuang turin sawm la. Nun phung pangngai zawh leh a, Kohhran, Khawtlang leh chhungkuaa hlim leh zalen taka mawhphurhna te hlen a i dam chhung hmang turin inbuatsaih rawh le…..

BE A MAN…!! KA LAWM E.

Leave a Reply