BEISEINA

Thil dik a ni nain awih har tak a ni. Mihring hi ni 70 chhung chaw tel lovin a nun theih a, ni 10 dawn lai chu tui tel lovin a nun theih bawk. Boruak awm lohna hmunah pawh minute 7 lai a dam theih a ni.

A tel lova kan nun theih miah lohna thil pakhat chu beiseina hi a ni.

America rama lung natna lam specialist doctor pakhat chuan, “Beiseina hi damdawi dang zawng zawng aia ka hman tangkai zawk a ni a, engkim deuhthaw hi a tidam thei a ni,” a ti a. Doctor dang pakhat chuan, “Beisei tur nei lo khawpa mi i siam chuan a kuangah perek pakhat i kilh belhah inngai rawh,” a ti bawk.

Leslie B.Flynn
Alexander the Great khan tum khat chu ram dang bei tura a chhuah dawnin a thian thate hnenah a thil neih a sem chiam mai a, a neih zawng zawng deuh thaw a sem chhuak a. Pakhat chuan, “Ka pu, heti te chuan chan tur i nei ve tawh nang,” a ti a. Alexander-a chuan, “Ka nei alawm, ka beiseina neih hi ka la sem chhuak hlei nem,” tiin a chhang hmiah.

Alexander Solzhenitsyn-a chu politics avangin Russia ramah a tang a. Chaw kaw puar ei tur pe si lovin nitin hah takin darkar 12 chhung hna an thawhtir thin a. A tawpah chuan natnain a tlakbuak a, doctorte chuan a thihpui ngei dawn tih an hrilh bawk a. Nikhat chu chhun nisat vawl vawl lai hian suahdurin lei a thehsawn a, a nuna beisei tur a neih tawh lohzia a ngaihtuah avangin a hna thawh lai chu a tawpsan thut mai a. Tang vengtu a lo kal anga, na takin
– thih thleng pawh a ni maithei, a rawn vaw hrep dawn tih pawh a hria; mahse a thawk chhunzawm thei tawh miah si lova. A Kristian nihpui tang pakhat hian a rawn hmu a, rang takin a mau ken lai nen chuan a lo tlan a, leiah Kros lem a ziak zauhva, tang vengtute hmuh hmain a thai chhe leh nghal mai a. Hun rei lo tea rei lo te chhung Kros lem a hmuh zawk chuan Isua Krista Chanchin |ha avangin a nunah beiseina thar a rawn siam leh ta tlat mai a. A hma baka thil thleng turte huai taka hmachhawn zel turin beiseina nung a nei leh ta! Chu beiseina avang chuan tan in hrehawm taka nghaisakna tinreng chu a tuar chhuak a, a tawpah chuan hlim takin tan in chu a chhuahsan ta a ni.

East Harlem khuaa sikul naupang thiam thei lo zual bik mi 59, zirtirtuten beisei bo ni a an ngaih te zinga thusawi turin millionaire pakhat, Eugene Lang chu an sawm a. Chutiang naupang cho chhuak tur khawp thu sawi tur a hre si lo, a huphurh hle mai a; an rilru a kaih thawhsak loh chuan school atangin rei lo te-ah an chhuak mai dawn tih a hre thiam bawk si. Chu’ng beisei bo rual chu mihang leh Puerto Rican hlir an ni a, an nun chawk tho turin a inngaihtuah nasa hle mai a; a tawpah chuan a he thu hi a sawi ta a ni.

“School-ah hian lut chhunzawm zel ang che u, in zinga College kai chho apiang chu College in kal chhung zirna man zawng zawng ka tum sak vek ang che u.”

Chu tawngkam tawite chuan an rilru a thlak danglam zo ta a. Beiseina an neih hmasak ber a ni ta. Naupang pakhat chuan, “Ka hmabak ah min hmuaktu thlir theih tur ka nei tih ka inhria chu ka tana hun rangkachak a ni,” a ti a. Beisei bo rual zinga zaa 90 chuan B .A. an pass theuh asin!

Leave a Reply