BRANCH KUMPUAN ‘KAWNGPUI SIAL’ BAWHZUI ZEL A NI

Branch Kumpuan ‘Kawngpui sial” chu furpui kan tawn mek avangin hmalak chak hleih theih a ni rih lova. Mahse sawrkar hmalakna zara Maubawk to Nursery Veng kawng Black Topping hna kal mekah kan veng huamchhunga Pu Vanlalthanga leh Pi Tanpuiite khawmthlang zawna kawng ulh lai te chu Black Top anih hma ngeia tih ngil thaa hriat avangin ram neitute be rawnin kawngkawi ulh laite siam rem hnatlang neih a ni ta a ni.

Hnatlanga thawkchhuakte hi Pu R.Rallianzuala te chhungkua chuan ei tur min hlui a, an ram duhlai Pu Vanlalthanga leh Pi Tanpuii te’n veng tan an pe phal bawk a. Hetianga mi inphalte chungah hian Branch YMA chuan lawmthu a sawi tak meuh meuh a ni.

Hetianga vengin hmasawnna rahbi a rah mek lai hian vengchhung mitinin mawhphurhna kan nei theuh a ni tih kan hriatreng a tha awm e. A bik takin kawng siamna bul hnaia awmte’n a remchan dan anga hnathawktute lo tawiawm te, a theih phei chuan thingpui ilo lo hlui te pawh hi ui lovin, kan veng hmasawn zelna atana thil pawimawh a ni tih hriaa a nachang kan hriatreng a pawimawh hle a ni.

YMA Kumpuan hmalakna te, Local Council leh vengchhunga NGO hrang hrang tanrualna leh veng mipuite inpekna a zarah vengchhung hmun hrang hrangah Kawngpui kan la sial belh zel turah ngai ila. Chutih hunah pawh chuan a tul anga kan ram sahthlak hlek te, hnatlanga thawhchhuah leh thilpek hmang te a tan kan lak thar sauh sauh hi veng miten kan zavaia kan mawhphurhna a ni tih hria ila. Chutiang taka kan in pe thei anih phawt chuan kan hma hun hnaivai te ah hian veng nuam, kawngpui tha tak nei kan lo ni ang a, kawng hrang hrangah hmasawnna rahbi kan rap chho zel thei dawn a ni.

Kan Nursery Veng hi Veng dang mi tumahin min rawn siam nawmsak ngawt dawn lo, keimahni a neitute hian kan siam thiam leh a nuam anga, kan thiam loh leh a hreawm mai dawn a ni.

Leave a Reply