BRANCH YMA AUDIO ALBUM TLANGZARH A NI TA

Hun rei tawh tak atanga kan lo sual tawh, kan puitlin tak tak thei ang em tih suangtuah chang a kan thin ti phu dup dup thin, han pamtul mai dawn a kan phal bawk siloh Khawvel awmtirh ata Nursery Veng Branch YMA Audio Album hmasaber “Rualtin Khumtu YMA” tih chu Ni 15.10.2010 (Zirtawpni) chawhnu dar 2:00 khan ropui takin MHIP Hall-ah a tlangzarh a ni ta.

Hip….hip….hu…reih….

He Album tlangzarh hi Pu Roneihthanga, Vice President, NYMA leh Zaipawl Sub-Committee O/B in-charge ni bawkin hnehsawh takin a kaihruai a. Pu R.C. Lalzarzova, Zaipawl Sub-Committee Chairman-in urhsun taka hunserh a hman hnuin, Zaipawl Conductor Pu Hmingthansanga’n zangkhai tak si, over bawk si lovin Album siam tura hma kan lak chhoh dan tawi-kim-fiah-fel-fai takin a report a, kan vengpa chhuanvawr leh Bialtu MLA ni bawk Pu R.Selthuama’n ropui takin Nursery Veng tana MELLUNG pawimawh ni kumkhua tawh tur Nursery Veng YMA Audio Album chu ropui takin a tlangzarh a, CD pakhat Rs. 1,000/- ngawtin a leizui nghal. Kan MLA zahawmtak chungah kan va lawm tak em!

Album tlangzarh zawhah Rampum huap Zaipawl intihsiakna a kan hla chuam “Turnipui Kan Dodai” tih hla Sound System duhthu sama thain kan tlangzarh tak Album a mi ngei mai chu play zui nghal a ni a, kan Adviser Pu K. Zoliana meuh pawhin a hming bula thilawm (Upa) tih thlawn lawk a 15 years back vel a han chen leh a chak tih a hmelah hai rual a ni lo. A va mawi tehlul em! Zaipawl-in kumin YMA General Conference-a sak an tum, kan chhuanvawr Pi Lalsangzuali Sailo (fam) hla phuah “Lalnu Ropuiliani” tih a live ngat mai a an han sa zui zet chu, YMA thlirna tlang atanga First Lady Pi Maduhi leh Second Lady Pi Rini ten han hmu ve ta se engtin ngai ang maw? Ngaihmelh hi uire anih tak tak ngai chuan kan Zaipawl nula te lakah khan kan hotu lian pahnih, an pum chhunga naute nghing lawih khawp a zai ngaithlatu te hi an va uire nasa dawn veleh… Chilthli tla lo chauh a kan YMA sum enkawltu te pahnihin kan nula te an thlir lai hmel tak mai kha Pi Ruati leh Pi Mazawmi te hian han hmu hlauh mai se chuan… sawi zui tawh lo mai ang… conference kal theih loh phah te kan awm palh riau riau ang e. Engpawh nise, an zai kha a ROPUI a ni tawp mai!!!

He Album-ah hian hla 11 zet dah a ni a, hla 10 hi Zaipawl sak a niin hla 1 chu a thiam theihnghilh chu sawi loh, a la thiam belh deuh deuh tih hriat tak chunga Nl. Lalhruaitluangi Hmar solo a ni. Heng hla 11 zingah hian hla 8 chu YMA hla anih laiin hla 3 chu Pathian fakna hla a ni thung. He Album-a hla tam zawk chu Zoram-Khawvel deng chhuak khawp a hla lar tawh sa, a lar tirh aia mawi zawk fe a Nursery Veng Branch YMA Zaipawl-in an sak thar a ni a. Kan Conductor chhuanvawr Pu Matea hla phuah thar, mi tam takin sak chhawn an la dil leh luai luai tur hla ruah-tham-loh mawi tak tak te pawh telh a ni bawk.

NURSERY BRANCH YMA MEL LUNG PAWIMAWH TAK MIN THLEN TUTE KAN VA CHHUANG EM.

Nursery Veng VC aiawh a Album tlangzarh hun min rawn hmanpuitu Pu C.T. Zakhuma’n thutawi sawi a hun a hman hnuin Pathian hnena lawwmthu sawiin tawngtaina hun a hmang a, CD pakhat Rs. 500/- in min leisak nghal bawk. Kan VC Member chungah kan va lawm leh pek em!

CD Album pakhat hi tlangzarh ni in Rs. 80/- a zawrh nghal a ni a, vengchhung mi tlawmngai ten engemaw zat Rs. 500/- & Rs.100/- te in an lei nghal zut zut mai. YMA General Conference-ah Rs. 100/- a va zawrh a ni ang a, Conference zawhah vengchhungah zawrh zui a ni dawn a, veng mi zawng zawng ten tlawmngaih chhuah a CD pakhat tal lei ngei turin kanin ngen a. Veng pawn lam leh Office lamah te pawh la zawrh zui a ngai maithei a, a tul ang a piang a tlaawmngaih chhuah a zawrh hna thawk tur pawhin veng mite kan in ngen lawk bawk a ni.

Engpawhnise, he Album a puitlin theihna atana kawng hrang hrang sum leh pai, tha leh zung sengtute zawng zawng chungah NYMA hmingin lawmthu kan sawi tak meuh a ni.

Leave a Reply