BRANCH YMA HRUAITU THAR THLAN

– Zokunga
President, NYMA

Kan hma lawk Ni 7.12.2018 (Zirtawp) zan dar 7:00-ah Politics rawngkai lo, tlawmngai Pawl (YMA) hruaitu tur kan lo thlang dawn ta reng mai. YMA Dan Bu Bung-V Chang (5) (a) in a sawi angin Branch YMA Executive Committee chuan a mal mal (post by post)-in mi 6 thlan chhuah turin ruahmanna a siam a, nominees mi 13 a chhawpchhuah bakah member kalkhawm ten tul an tih chuan mi 3 aia tam lo an ruat belh (nominate) thei bawk dawn a ni.

Kum kalta lamah te inthlanna a member kal kan tam emaw kan tlem emaw pawh nise, urhsun takin inthlanna kan lo nei tawh thin a, a lawmawmin chhunzawm zel atan pawh a duhawm hle a ni. Kum 2019 chhunga Nursery Veng Branch YMA hruaitu kan thlan turah pawh thahnemngai takin member-te kal khawm i tum ila, thinlung leh tihtakzetin hruaitu thlang turin tun atangin i inbuatsaih theuh teh ang u.

Branch YMA hruaitu kan thlan huna kan hriattur thil tam tak awm zingah heng te hi hre thar leh ila a tha awm e.

1. Hruaitu hlui emaw hruaitu nimek emaw te thlan nawn leh ngawt thin hi a tha ber lo thei a, zau deuh zawk a ngaihtuahna sen nise.

2. Hruaitu tha tak tak kan neih mek lai a mithar hrim hrim thlan chhuah tum tal pawh a tha ber lo thei ve bawk a, hemi chung changah pawh nguntaka ngaihtuahna sen nise.

3. YMA hi Politics rawng kai lo, tlawmngai Pawl a nih miau avangin hruaitu thlannaah politics tuinu sengluh loh hram nise. Hei erawh kan hriatreng a ngai – Political Party hruaitute zingah YMA tana mitha tak tak an awm thluah in a rinawm a, kan duh zawng an nih phawt chuan chung mite chu YMA hruaitu atan thlan theih reng an ni a. Mahse, YMA hruaitu (OB) an nih laia MLA/MP/MDC/Councilor/LC/VC-ah an ding dawn anih chuan nomination an file hmain YMA-a an nihna an inhnukdawk tur a ni.

4. YMA hian a thil tum leh dinchhanah Kristian nun dan tha ngaihsan hi nei mah se, Kohhran tih bik a nei ngai lova, hruaitu kan thlan hunah pawh mitha chu eng Kohhran a mi pawh ni mahse lungsi taka kan thlan chhuah mai kha kan tih tur a ni.

5. Branch YMA inrelbawlnaah tha zawk tura ngaiin Section 3-ah in then mek a ni a, hei hi Branch YMA hruaitu thlanna a sengluh loh hram nise, Branch YMA hruaitu atana mitha na na chu eng Section a mi pawh nise lungawi taka thlan mai kha YMA member ten kan tih makmawh a ni.

6. YMA hruaitu thlan hi chhungkhat laina leh thian tha induhsakna chi a ni lova, mi hlun leh hlun lo in thliarna chi pawh a ni bawk hek lo tih pawh kan hriat hnu mah nise kan hriat thar leh a tha awm e. Mi tupawh kum 5 aia tlem lo YMA member a lo nih tawh a, thlan awm mi a rawt (nominate) anih bawk chuan hruaitu atan hian thlan theih a ni.

Chhiatni thatniah te, khawtlang then thianghlim khawngah te, vengchhung hmasawnna atana hmalakna hrang hrang leh thil dang tam taka kan hma hruaitu tur leh a tul hunah kan aiawh a ding tur kan Branch YMA hruaitu (OB) kan thlang dawn a ni a, Pathian rawn chunga thinlung leh tihtakzet a hruaitu thlang tura kan inbuatsaih a pawimawh hle. Kan mimal in a kan thlante an lo tling emaw kan thlan chiah loh te an lo tling ta zawk emaw pawh nise, YMA member kan nih a YMA neitu kan nih miau avangin hruaitu atana thlan chhuah apiang te thahnemngai taka thawhpui tura kan inbuatsaih hi a pawimawh a, chu chu a YMA em em bawk a ni.

YMA vul zel rawh se.

Leave a Reply