Category: Editorial

Editorial 24.10.2021

Published / by Nursery Veng YMA / Leave a Comment

Khawvel a changkang zel a, kan ram pawh in kawng tam takah hma a sawn a, chutih rual chuan kan khawtlang pawh hian Bungkawn atanga kan indan tan tirh te ai chuan nasa takin hma a sawn tak zet mai, a lawmawm takzet a ni.

Kan thalaite atangin hna sang tak tak thawk te, zirna lama hlawhtling tak tak te pawh kan awm ta nuk mai, ava lawmawm em. Mihring kan nih chhung chuan, kan Pathian thu a kan hmuh angin, thlen chin apianga hmasawn tur kan ni tih erawh theihnghilh lo ila, kan nunphungah hian hmasawnna hi hmuh tur a awm em?, tih hi mahni inzawt reng ila, nu leh pa te pawh in kan fate rilru ah hmasawn duhna rilru an put theih na turin theih tawp in tan la zel ang u.
Chutianga kan tih a, hma kan sawn zel chuan mi vengte entawn hi kan ni ve thei ngei ang. (more…)

Editorial – 10.10.2021

Published / by Nursery Veng YMA / Leave a Comment

Faina hian thianghlimna a keng tel fova, thianghlimna chu Pathian kan anna ber anih avangin keimahni kan fai ringawt a kan awmna leh a chhehvel a fai chuan si loh chuan faina tih hian a huapzo thei lo. Faina hian kan zahawmna a keng tel a, hriselna hnar ani bawk.

Faina hi hmasawnna chikhat anih mai bakah hnam fing zia a ni a, faina ngaithah ram hmasawn an awm ngai hek lo. Faina pawimawh zia chu inhrilh nawn kan ngai kher in a lang lova, faina lama hmalak dan kawng hrang hranga inzirtir lam ah pawh hma kan sawn chho zelin a lang bawk. Amaherawh chu faina lama zirtirna kan dawn tam ang hian faina lam ah hma kan sawn phah em tih erawh inzawh nawn kan ngai fova, hemi kawngah hian mitin hian mawhphurhna kan la la huam lo ni te pawhin a lang a ni. (more…)

Editorial 03.10.2021

Published / by Nursery Veng YMA / Leave a Comment

Min ti chaktu pakhat chu fuihna thu hi a ni. Mangâng leh beidâwng mêk ten fuihna an dawnin, chakna thar an lo nei leh thin. Hlawhchham mek ten fuihna thu avangin phûr takin bul an tan thar leh theia, mi hlawhtling te pawh hian fuihna an mamawh reng tho. Heti khawpa pawimawh ni si hi, mi dangte fuihna kan sawi tam tawk lo hle. Tan la thar deuh teh ang u.

Fuihna hi mi dangte hrilh tur chauh a ni lo tih hriat atha, mahni ngei hi kan nun hman dan turah infuih phûr hmasak a ngai. Engamah hmaa kan peih lo nghal te, kan zuam loh nghal te leh, huphurhna rilru kan put nghal hi chuan hmasawnna a thleng dawn reng reng lo. “Pathian rin-chhanin ka ti thei ang, mi pawhin an theih chuan anni aia tha zawkin ka ti thei ang..” tih zawnga rilru kan puta, mahni kan infuih phur hian, kan hmaa thil awmte kan paltlang thei a ni. Kan tawngkam bakah, kan khawsa zia hi mi dangte tan fuihna tha a nih theih vangin kan fimkhura, kan inthlahdah loh hi a tha em em a ni. (more…)

Editorial – 26.09.2021

Published / by Nursery Veng YMA / Leave a Comment

YMA motto ah ‘Hunawl hmanthat’ tih ziak hi kan hmuin kan chhiar fo tawh a rinawm. Han en a, han chhiar mai chuan engtiang takin nge maw kan hman that ang le? tih mai awl tak tur chu a ni reng reng (tha tih zawng in ang hek lo le). Hun awl hman that dan; kan teh fung a in ang lo miauva.

Thenkhat chuan ‘Mihring hian hun awl kan nei lo, kan hman tangkai loh lai hi hun awl chu a nimai’, an ti a, chuti a nihchuan hun awl thumal hian awmzia a nei thui em em lo tihna em ni dawn? Awl reng reng kan neih loh Hun chu engtiang a hman that tur nge nita, engtia teh tur nge, engtiang a hman that tur ni maw! (more…)

Editorial 19.09.2021

Published / by Nursery Veng YMA / Leave a Comment

He khawvela kan awm chhung hian mi tu pawn ngaihsak nih kan duh veka, ngaihsak kan hlawh theih nan engemaw ti taka awm dân pawh kan thiam thin. Kan mihringpuite ngaihsak na dawn hi a nuama, an tan hlutna kan nei tih a chianga, chu chuan kan rilru ah hlimna min pe a ni. Tin, nun a ti phûrawma, beiseina neiin hmalam pan turin min nawr kal bawk thin. Chutihrualin, ngaihsaktu neilo nih chu a hrehawmin, khawvela mi vanduai ber nihna a tling si.

Mite ngaihsakna chauh hi phût leh beisei tur kan ni lo, mi dangte ngaihsaktu nih kawngah tan kan la thar zawk tur a ni.

Khawvela kan awm chhung hi chuan chêngho tur kan nia, mahse, thenkhat hi chuan an duh dân têa khawsa zel turin kan inngai a ni mahna, thenawm khawvengte bân phâk tur leh tih buai ngam khawpin kan awm meuh ta lo.
Chutihlaiin, inchênchilha, nun ho tur kan nih zia hre chiang apiang chu, mi dangte tanpui turin, miten an tihbuai ngam leh an mamawh hun apianga an beisei ngam khawpin an awm thung a. Chung mite chu, an hausa emaw rethei emaw vang lam a ni lo, Pathianin ang khat vekin min siam ziate, in mamawh tawn vek kan nih ziate, mihringin kan hmalam hun kan hriat lawk miah loh thu te an hriat chian vang a ni thei ang. A tawi zawngin, Pathian thu an awih vang a ni ber awm e. (more…)

Edtorial 12.09.2021

Published / by Nursery Veng YMA / Leave a Comment

He khawvel kan cham chhung reilo te ah hian midangte tana malsawmna thlentu kan nih a pawimawh takzet a ni. Kan Lal Isua kha mihring a chan lai khan thil siam tinrengte tana malsawmna thlentu a ni.

Vawiin ah hian Isua zuitu inti te hi mite tana malsawmna thlen tu nge kan nih a, mite harsatna siamtu. Abrama (Abrahama) kha Pathian in a koh chhuah dawn khan “Nang malsawmna ni ang che..” a ti a ni. Keini vawiin a ringtu intite pawh hi kan Pathian hian mite tana malsawmna thlentu ni turin min duh ngei a rinawm. Tunlai kan boruak avangin sawrkarin veng tin leh khaw tin ah Task Force a rawn din a, anni chuan veng mi te tan an hrehawm pawisa lovin theih tawp tak meuh an chhuah a, mipui tan malsawmna an ni tak meuh a ni. (more…)

Editorial 05.09.2021

Published / by Nursery Veng YMA / Leave a Comment

Vawiin hi India ram chuan Zirtirtute ni a tana kan hman thin ni a ni, India ram President hlui, India rama chawimawina sang Bharat Ratna award hial te pawh lo dawng tawh Dr. Sarvepalli Radhakrishnan-a piancham a ni a. A pianni hi India ram pumpui ah Zirtirtute ni atan hman thin a ni.

Khawvela thiamnna leh finna lo sang chhho zelah mahni dinhmun dah pawimawhna a lo lian chho tial tial a, hetiang a lo nih rual hian zirtirtute kan zahna hi a hma aiin lang chhuak zel se, i chawimawi zel ang u. Zirtirtute pawimawhzia te, an dinhmun hlutnate i thirho dawn teh ang. (more…)

Editorial 29.08.2021

Published / by Nursery Veng YMA / Leave a Comment

Tunlai hrileng avangin thalaite tan hna zawn a khaihlak hle mai. Amaherawhchu hrileng karah hian inbuatsaihna tha tak neih dan a awm tlat mai. Hun awl tha kan neih te hmang thiam ila, theihtawp i han chhuah teh ang u. Kum kalta leh kum hmasa lamah te khan MPSC hian hna hrang hrang lakna atan open exam a buatsaih nasa hle a, mi engemaw zatin hna thar duhawm tak tak an hmuh phah nual nghe nghe a ni. Chumi piah lamah Departmental Exam pawh a buatsaih nual bawk a, Sawrkar hnathawk engemaw zatin Departmental Exam hmangin an kaisan phah bawk a.

Hna a vang a, lehkhathiam leh thiam sang lem lo hna zawng kan inpel suau suau a, chutih laiin hna erawh a vang hle thung. A bikin Sawrkar hna nghet hmuh chu a har hle a, a nghet lem lo contract leh MR pawh hmuh a awl bik chuang lova. Hemi a nih avang hian direct taka Sawrkar hna nghet hmu te chu kan inlawmpui a, vawi lehkhata Officer han ni thut te phei chu kan inchawimawi nasa hle a ni. (more…)

Editorial 22.08.2021

Published / by Nursery Veng YMA / Leave a Comment

Rin lawk lem loh hun harsa kan tawk thut thut mai a, hnam intodelh lo nih a fuh lohzia a chiang viau nghal zel mai, kan kawmthlang khaw te tak te, Lailapur tih velin kawng an block a, a state pumpuiin kan mangang ruai zel mai chu a nih hi!!

Ram inrelbawlna kawnga ke chheh fuh lo awmzia kan chiang ta viau mai. Kawng pakhat chauh atanga chak la kan nih hi engtikah nge tihtawp a nih ang a, engtikah nge kawng hrang hranga hmansawnna rahbi kan rah ve tak ang? Mizo nihnaah hian kan lawm viau ang a, kan hlim del del reng ang a, mahse Assam rama khaw kilkhawr te pakhat hian awlsam deuhin min timangang reng mai dawn em ni? (more…)

Editorial 15.08.2021

Published / by Nursery Veng YMA / Leave a Comment

Kan veng hi Aizawl-ah hian veng lian lo pawlah kan tel ve in a rinawm, chutiang a ni chungin chi-tin chi-tang kan cheng hova, Kohhran pawh a hrang hrang kan awm, veng a len loh vei nen hian Kohhran hrang biakin pawh a kim hle.

Pathianin he lei hi mihringte luah lum tura min pek, cheng za-a, khawsa ho turin min siamin min din a, mahni mai a khawsa thei tumah kan awm lo. Chutiang anih avang chuan cheng ho a, inlungrual taka kan awm ho hi a tul viau reng a ni. Kan nundan leh nunzia te hian innghirnghona te thlen lo se la, midang tana mal-sawmna thlen tu, mite tana hlimna thlen tu nih theuh hi k an khawsak hona ah hian a pawimawh takzet bawk. (more…)