CCC MEETING VAWI 92-NA NEIH A NI

Central YMA rorelna sang, Central Co-Odination Committee vawi 92-na neih a ni.

Central YMA rorelna sang CCC chu Ni 10.11.2021 khan Chanmari YMA Hall-ah neih ani a, he hun hi Pu Vanlalruata President CYMA in a kaihruaia, Prof Lalnuntluanga General Secretary hnen atangin CYMA hmalakna tlangpui report ngaihthlak a ni. COViD-19 hripui leng mek avang a CCC hi tum nga (5) lai neih theih loh anih bakah rorel inkhawm pawh nikum 2020 ah neih theih anih loh thu tarlang in, YMA General Conference neih hnuhnung bera rorelte bawhzui a nih dan bakah, Hripui leng chungchang, mizoram ramri buai chungchang leh raltlan chungchang a YMA hmalakna hrang hrang te a tarlang bawk a ni.

CCC meeting hian YMA General Conference 2021 chu hripui leng avangin Bilkhawthlirah neih theih anih dawn tak loh avangin kumin chhung ngeiin Central YMA thlen turin Aizawl khawpui chhungah General Conference vawi 73- na chu neih turin a rel a, hemi a tana tul dangte chu CEC lo bawhzui turin dah a ni.

General Conference neih hun a rorel tur Agenda thlitfimna neih a nih bakah CYMA Budget 2021-22 ruahmanna chu Pu Fabian Lalfakawma Treasurer hnen atangin ngaihthlak a ni a, Conference ah pharh nise tih a ni.

CCC Meeting hi Chanmari Branch YMA ten lo buaipui in YMA Sub.Hrqs/Group leh Branch atangin palai 252 an kal khawm a ni. YMA General Conference 2021 Rorel Agenda atan heng te hi pawm a ni:

YMA Khawih:
1. Ruihhlo chungchang ah Sorkar /Kohhran /Pawl dangte sawmin inzirtirna nasa zawk kalpui ni rawh se.
2. YMA Member tinah Endownment fund Rs. 5/- khawn ni se.
3. Central YMA Building sak mek chhunzawmna atan YMA Member ten Donation thawh / khawn nirawh se.
4.Zirtirtu mahni post a awm tha duhlo te hi an post-a an awm theih nan Central YMA-in hma la rawh se.

Sorkar khawih:
1. Mizoram ramri hi Sawrkar-in a rang lama chinfel dan ngaihtuah rawh se.
2. Zirna School-ah Mizo hnam lam zirtir an nih theih nan sorkar-ah thlen ni rawh se.
3. Kan ram chhung thei phun uar tura Sawrkar nena tangdun in hmalak ni rawh se.

Heng bakah hian YMA Dan Bu ennawn rawtna chu Conference a chhawpchhuah turin pawm a ni.

Kumpuan atana rawtna pahnih “Ram leh hnam humhalh” leh “Zirna uar” tih chu General Conference-a chawpchhuah turin pawm a ni bawk.

Leave a Reply