CENTRAL YMA Thuchhuah

Ni 8.02.2021 (Thawhtanni) hian 71st YMA General Conference, 2017, Champhai Zotlanga neihin “Mizoram hmun hrang hranga inkalpawhna kan neihte hi tun aia tha leh changtlung zawka siam a nih theih nan Central YMA-in hma la rawh se” tia a lo rel bawhzuiin, Chief Minister Office, Cabinet Room-ah Pu Zoramthanga, Chief Minister, MPWD hotute leh Central YMA OB ten kawng siam chungchang sawihona hun an hmang.

Central YMA-in inkalpawhna kawngpui tha kan neih theihna tura hmalakna a kalpui mekah, YMA hming hliau tur zawnga thuziak awm chu Chief Minister chuan pawi a tih thu a sawi. Kawngpui tha neihna turah theihtawpa tan lakho ni se, hnathawktu tur thlan ten an hna an thawh ngei theih nan hmalak remtih a ni. Tin, hnathawktute an hnathawh tha lo leh thawk thei lote chu insawifiah tura hriattir a, lungawina a awm loh chuan, hnathawk thei lo tura siam (Black List) remtih a ni.

Chief Minister chuan kawngpui tha kan neih theih nan, kawng siam mekte uluk zawka vilpui turin YMA-te a ngen bawk.

Central YMA Office-ah Mizoram Road Builders Association-te nen inkawmhona neih zui a niin, Mizoramah inkalpawhna kawngpui tha kan neih theih nan, Contractor hming hawha hnathawh in hna a tihchhiat theih avangin, Contractor hming hawh hi titawp tura tan lakho remtih a ni.

Kawngpui tha kan neihna tura Sub-Hqrs/Group/Branch YMA-te hmalaknaah lawmthu kan sawi a, a remchan dan angin Contractor ten harsatna an neihte tlawmngaia lo enpui turin kan inngen a ni.

Sd/-
Prof. LALNUNTLUANGA
General Secretary,
Central YMA.

Leave a Reply