CENTRAL YMA THUCHHUAK

Central YMA Executive Committee meeting May 7, 2020 chhun dar 12:00-a neih chuan Hripui (Covid 19) dona kawnga Sub-Hqrs./Group/Branch YMA hrang hrangte hmalakna thlirhovin, hmalaknaah lawmthu a sawi a ni. Hripui kan do mek hi ziaawm lam aiin a nasa chho zel niin a lang.

India ram bikah pawh a ni telin he hri vei hi kan pung chho mek zel bawk a ni. Hengte a nih avang hian hripui dona kawnga chak zawka hmala turin kan inngen nawn leh a ni.

1. Hripui venna kawngah Sub-Hqrs./Group/Branch YMA-te khauh zawk leh kan huamchhung ngun lehzuala vil zui zel turin.

2. Kan huamchhungah hnamdang mikhual hmundang atanga lo lut an awm loh nan veng/khaw tinte inchian thar ni se.

3. State pawn atanga mamawh ei leh bar leh a dang lo lutte felfai taka lo lut a nih leh nih loh chian a, mimal sumdawnna leh hlawkna um ringawt avanga lo lutte khuahkhirh a nih theih nana tan lak ni se.

4. Mipui mimir ten hripui laka kan him tlanna tur – kut silfai, hmai tuam leh inhlat taka awmte zawm that ni se. A tul hle a nih loh chuan pawn/khawlai chhuah loh ni se, mithiam zawkte thu leh hla ngaihchan thiam ni se.

5. Hmundang atanga lo haw sawrkar thupeka khung hran turte, khunghran an nih ngei theih nan hmalak ni se.

6. Hripui leng avanga thil man to khuahkhirh a nih theih nan hmalak a, thuneitute thawhpui thiam ni se.

Hripui venna kawnga thawktu zawng zawngte chungah Central YMA chuan lawmthu a sawi a ni.

YMA vul zel rawh se.

Sd/-
Prof. LALNUNTLUANGA
General Secretary,
Central YMA.

Leave a Reply