CENTRAL YMA THUCHHUAK MIZOTE’N HNAMDANG (NON-TRIBAL) TE HNENA RAM PEK/HRALH/TIHRAL CHUNGCHANG

YMA General Conference 2009-in a rel ‘ Kan inhmun lo ramte hnam dang (Non Tribal) hnenah hralh a nih tawh loh nan hmalak ni rawh se ‘ tih chu Mizoram pumah hma kan lak tlan a, he agenda pawimawhzia leh tulzia kan hriat tlan theih nan hemi chungchanga kan hriat tur pawimawh te tarlan a ni a, a zau thei ang bera puangdarh turin Sub Hqrs., Group leh Branch YMA te kan inngen a ni.

Mizote hian kan Mizoram bak hi chu ram kan neih loh avangin kan tan chuan a hluin tihral mai mai emaw, hnamdang hnena pek/hralh hi kan tih loh tawp tur a ni. Tunah hian Mizote hi hnamdangte chimralin kan awm mek zel a ni a, hemi chungchanga thil pawimawh tak mai chu – hnamdangte tan awmna hmun nghet Mizoramah kan siamsak miau loh chuan an tan inbengbel turin kawng kan kharsak tihna a lo ni ang. Chumi tihlawhtling tur chuan mimal tin te hian chanvo pawimawh tak kan nei theuh a ni. Hnamdang (Non-Mizo leh Non-Tribal) te hnena kan ram, in leh lo kan hralh thin hian hnamdangte kan inchimral (assimilate) tir mek zel tihna a ni.

Section 3 of The Mizo District (Transfer of Land Act), 1963 (vide Notification No. TAD/R/42/62 dt. 14th May, 1964) hian Tribal-te’n Non-Tribal-te hnena an ram awlsam taka an hralh theih loh chungchang a sawi a, heta a sawi chu hetiang hian a ni (Mizotawngin lehlin nghal a ni) – District Council huam chhunga ram reng reng Executive Committee (tunah chuan State Government) phalna la hmasa lo chuan Non-Tribal hnenah Tribal-in dahkham emaw, hawhtir emaw, pek emaw, hralh emaw, neitu nihna hlan chhawn phal a ni lo tih a ni. Chutih lai chuan hnamdangte’n man chawia kan in te an luah chungchangah chuan Government of Mizoram atanga permission lak hmasak kher a tul lem lo a ni. He Dan, a chunga sawi tak in a a tarlan ‘Tribal leh Non-Tribal-te’ tan tih hian a sawi tum ber chuMizote’n kan ram te, Mizo ni lo (hnamdang) hnena hralh/hlan chhawn chungchang a ni. He Dan hmang hian (Non-Tribal) hnamdangte hnenah hian kan ram te hi Sorkar phalna la hmasa zet lo chuan hralh emaw, pek emaw, hlan chhawn emaw pawh a theih loh tihna a lo ni. Hetiang ang Dan tha tak mai, hnamdangte’n min chimral tur venna kawng pawimawh tak maiin min humhalh mek lai hian vawiin niah chuan kan Mizoram chhung ngeiah hnamdang tarn tak an inbengbelin, In hmun lo ram nghet an nei ta teuh mai. Chumai pawh ni lovin a ram neitu Mizote zawk hian tunah chuan hnamdang zawkte hnen atangin to tak takin kan Mizoram chhung ngeiah hian ram kan lei ta zawk a nih hi!

A chunga sawi tak The Mizo District (Transfer of Land Act), 1963 awm reng chunga heti zat kan ram leilung hlu tak hnamdangte hnena nasa taka tihrala a awm mek hi eng ang takin nge dodal turin leh kan ram tihral a a awm zel loh nan hma kan lak ang tih kawngah hian sawi tur tam tak pawh a awm a, a mipui nawlpuiin kan hriat atana tha leh tul te tlem a zawng theih ang angin han chhui tum ta ila –

Pakhatna – Non-Tribal (hnamdang ) hnena Tribal (Mizote ti pawhin sawi tawh ta mai ila) te’n ram an tihral hian ram neitu nihna pekna/chhinchhiahna/tichiangtu Land Settlement Certificate (LSC) emaw pass-ah hian ram neitu hmasa (Mizo)-in a hralh chhawnna (hnamdang) hminga dah a remti a nih pawhin ram an inhlan chhawn dan hi Dan kalh a nih chuan LSC reng rengah hian hnamdang hmingin dah leh thlak (register/mutate) phal ta lo se, hei hi fimkhur takin Land Revenue & Settlement Department hian hma la sela kawngro thui takin a su ang.LSC leh Pass-ah te hian a neitu hming (LSC/Pass holder) zel te hi chu LSC/Pass-in a huam chin ram neitu an nih zel avangin hnamdangte’n LSC/Pass an neih ve hi Dan hrulah dodal a tul tlat a ni.Land Revenue & Settlement Department hnuaia LSC/ Pass hming thlak (mutate) chungchang khawihtu leh thuneitu te pawh hi hemi chungchangah hian fimkhur tur leh dan ang taka thil ti tura bang lova ngen a tul tak meuh a ni. A bik takin LSC neitu nihna hnamdangin a lo neih chuan a pawi lehzualna chhan chu, chu LSC Holder chu settlement holder (chu LSC-in a huam ramchhunga inbenbel theihna chanvo) neitu a lo nih tak bakah hralh chhawn leh midang hnenah pawh hlan chhawn theihna thuneihna (heritable and transferable rights) a neih vang a ni. Section 14 of the Mizoram Land & Revenue Act, 1956 chuan ram reng reng, neitu nihna inhlanchhawn/inthlak (transfer) dan ang taka ti tur chuan Thuneitu (Office of the Administrator, tunah chuan Revenue Authority) hnenah chu transfer-na chu register thlap a ngai tlat a ni. Chuvang chuan dan ang taka thil tih dawn chuan a ruk takin ram neitu nihna inhlanchhawn (transfer of ownership of land) hi Revenue Department hriat loh chuan a tih theih loh tihna a ni. Hei hian Land Revenue & Settlement Department mawhphurhna a tichiang hle awm e.

Pahnihna – Hnamdangte Mizoram chhunga an rawn lut zel tur hi theihtawp chhuaha Dan hrula lo dan hna hi thawh a ngai tak meuh a ni. Hnamdangte tan hi chuan kan ramah hian duh duha rawn luh theihna an nei lo tih leh Inner Line Permit nei lo chuan an lo lut thei ngawt lo tih hi chu a mimir pawhin kan hre awm e. Chutih lai mek chuan tih tak takin hemi chungchang hi kan vei tawk lo niin a lang. Hnamdang hausa tak tak te hian kan ram hi min neihsak zel tur kan venna tur kawng pawimawh tak bawk chu kan rama an awm zel theih lohna tur atana min humhalh tlattu Inner Line Permit hi awlsam taka pe zen lo tura Sawrkar thuneituten ngaihtuahna an sen pawh a tul hle.

Pathumna – Government of Mizoram pawh hian Non-Tribal emaw, hnamdangte hnena kan ram te neitu nihna pek/hlan chhawn (transfer of ownership) phalna pawh hi awlai takin pe lo se tih hi a pawimawh hie a ni. Hetiang anga ti tur leh a chunga kan sawi tak Dan (Act) te’n felfai taka a lo sawi tawh anga kan ramte hnamdang hnena riral mai lo tura hmalakna kawngah hian Sawrkar pawh hian mawhphurhna lian tak a nei a, a chhan chu Sawrkar phalna la hmasa zet lo chuan hnamdangte hnenah ram pek/hralh chhawn (transfer) a theih miau loh vang a ni.

Palina – Mizote hi hemi kawngah hian nasa lehzuala kan inzirtir leh kan infuih a tul em em tawh a ni. Hnamdangte hnenah kan ram te hralh tawh lo tura inngen leh hemi avanga kan ram zimteah a neitute kan chep tulh tulh theih dan te pawh nasa taka tlangaupui a tul hie. Ram neitu hi mawhphurhna chelh lian ber chu a ni a, a ram neitu berin hnamdang hnenah a ram chu a hralh miau loh chuan chu ram chu humhalh dan tha tak a lo ni ngei ang. Ram leh hnam humhalhna kawng pawimawh tak chu kan ram neih te hnam dang hnena hrlah loh a ni. Kan thenawm state Nagaland leh Arunachal Pradesh-ah te chuan hnam dangin ram an nei/lei mai mai thei lova, hemi kawngah hian kan um pha lo hie a ni.

Mizote hian Bank hrang hrang leh Financial Institutions atang tein kan ram te dahkham (mortgage)-in loan tarn tak kan la mek zel a. Kan loan lak te kan rulh theih loh chuan loan ba rulh nan kan ram dahkham te chu tihral (attached and sell) theih a lo ni thin a. Bank leh Financial Institutions-te hnena ram dahkham phalna hi Notification dated 5th June, 1990 issued under Memo No. LJD 7/90/7 by the Department of Law & Judicial, Government ofMizoram, Mizoram Gazette dated 8th June, 1990-a tihchhuah chuan a pe/ siam a. He amendment hian tun hmaa Section 3 of the Mizoram (Transfer of Land) Act, 1963-in a sawi anga Non-Tribal te hnena ram hralh chauh pawh ni lo, dahkham leh hawhtir phalna pawh pek a khap thin kha tidanglamin loan lakna atan tea kan ram chu Non-Tribal (Bank & Financial Institutions) te hnenah^awh dahkham phalna a siam ta a ni. Chuvang chuan, loan rulh theih loh avanga kan ram te tihral a tul a nih pawhin Non-Tribal te’n neitu nihna an neih loh nana a chunga kan han tarlan tawh te hmang leh kawng awm dan ang ang hmanga hma lak zel hi a tul hie a ni.

ISSUED BY CENTRAL YOUNG MIZO ASSOCIATION, AIZAWL : MIZORAM 2010

Leave a Reply