CENTRAL YMA THUCHHUAK – Ni 30.07.2021 (Zirtawpni)

Young Mizo Association chuan July ni 26, 2021-a kan police ten, Assam Police-te silai hmeh puah chhang let a, huaisen taka mahni inphata, ram leh hnam humhim tura ke in pennate leh Mizoram Sawrkarin, puitling taka he buaina a hmachhawn dante kan hriatin, kan fak che u a, kan chawimawi che u a ni.

Assam Police mi 200 rual zette, ramri duty awmte pawisa lo a, Vairengte Auto Rickshaw dinna hmun rawn lut a, mipuite rum thaih a, mipuite chunga an chetna avanga hliam tuar hial an awm hi kan dem tak zet a ni.

Hetih mek lai hian, thu dengkhawng leh nghah chhan bul bal nei lo a, Assam Chief Minister Pu Himanta Biswa Sarma-in chanchinthar thehdarhtu hrang hrang. Times of India (28.7.2021); India Today (28.7.2021), News18 (28.7.2021) kaltlanga, a puang chhuak chiam mai hian, YMA-te min thawng tak zet a, heng thu lawilote hi kan dem tak zet a ni. Heng thudiklo, nghah chhan neilo hmanga Mizo mipuite min puhna hrang hrangah hian, Assam Chief Minister hi ngaihdam dil turin kan phut tlat a ni.

A chunga kan tarlan tak, thuthar thehdarhtu hrang hrangte hnena July 26, 2021 inkahna thleng chungchang a, chhan ni thei awm anga a tarlante chu hengte hi an ni:

1. Assam sawrkarin tunhnaia ruihhlo dona kawnga a hmalakna chuan, Mizoram kaltlanga ruihhlo zuarte tan harsatna siamin, mizo thenkhatte a ti thinur hle a ni.

2. Assam Sawrkarin Bawng venhimna Dan a siam hmanga, Bawng phurh kual khap a nih avangin mizo mipui Kristian-te a ti thinrim a ni.

3. Assam sawrkarin Myanmar raltlante Dima Hasao District a luh an phal loh avangin. YMA chuan heng a chunga puhna, tan chhan leh bulfuk neilo hmanga puhna hi natak in a do tlat a, Mizo mipuite leh Mizoram sawrkar puhna ah hian, nghahchhan leh finfiahna engmah a nei lo a ni. Hengte a nih avang hian YMA chuan a hmalakna leh thil awmdan dik tak hetiang hian a tarlang a ni.

a) Mizoram sawrkar hian theih tawp chhuahin ruihhlo hrang hrangte leh ruihhloin chhiatna thlen te a do tlat a ni. Sawrkar hmalakna tawiawmin, YMA chuan Ruihhlo leh a kaihhnawiha kan him theihnan hmalakna a kalpui nasa hle, heng SRS, CADS te Central/Sub-headquarters/Group/Branch YMA-ah te dinin, vawiin thlengin chak tak in hma a la mek zawk a ni. Hetih mek lai hian Mizorama Ruihhlo man tam tak hi Cachar leh Hailakandi District, Assam atanga lo lut a ni.

b) Assam sawrkarin bawng phurh kual an khap avang hian, Mizoramin harsatna kan tawk lo, bawngte hi Mizoram khawchhak lam atanga lak ni in, Assam atanga lak luh a ni lo.

c) Myanmar raltlante chungchangah Assam sawrkar nen a inbiakna sawitur vawikhat mah a la awm lo. Raltlante inbenbelna chungchang hi State thuneihna lovin, Sawrkar laipui thuneihna a ni. Kan unau raltlante leh kan mihringpuite dinhmun harsatzia hriain theih tawpin kan lo tuam hlawm a, tun dinhmunah raltlante hi tam tak an ram lamah an kir leh tawh a ni.

India hmarchhak state lianber Chief Minister- in, a hmai phihfai a tumna lama thudiklo leh behchhan awm lova, India ram leh khawvel hma a Mizo mipuite min puh chhiatna hi a vanduaithlak hle a ni. YMA chuan hetiang thudiklo leh behchhan neilo laka inthiar fihlim tur leh ching nawn tawh lo turin kan ngen a ni.

YMA chuan a theihna chin chinah, kan pi leh pute atanga kan rochun, hmasang atanga kan ram humhim turin a hma a la zel dawn a, India ram state muanawm leh ram tana chhenfakawm rinawm nih zel a tum a ni. Ramri chungchangah hian YMA dinna chu BEFR 1875 niin, hei hi kan ramri tehna dik berah a ngai a ni. YMA chuan Mizoram leh Assam ramri buai hi muanawm taka a rang thei ang bera chingfel turin Sawrkar laipui a ngen a ni.

YMA vul zel rawh se.

Sd/-
Prof. LALNUNTLUANGA
General Secretary,
Central YMA

Sd/-
VANLALRUATA
President,
Central YMA

Leave a Reply