Chakma Autonomous District Council Thiah phutin Kawng Zawh a ni

Chakma Autonomous District Council (CADC) thiah a nih theihna tura YMA-in hma a lakna kal zelah October ni 10 (nilaini), 2018 khan Central YMA-in Aizawl leh khaw hrang hrangah kawngzawh an huaihawt a, mi thahnem tak an tel. CYMA president Vanlalruata chuan, CADC thiah a nih theihna atana YMA-in hma a laknaah an hnung tawlh tawh dawn lo tih a sawi a ni.

CADC thiah phûtna kawngzawh hi Aizawlah chuan hmun pahnih – Sikulpuikawn leh Chanmari kâwn atanga neih niin, chawhma dar 11-ah tan a ni a, Vanapa Hall lam pana kalin, Vanapa Hall kawtah an intâwk khawm a ni. Aizawla kawngzawhah hian Aizawl khawpui chhunga YMA branch awm zawng zawng, branch 104 atangin YMA member thahnem tak an tel.

CID-te chhût danin, Chanmari kâwn lam atanga kawng zawhnaah mi 5,000 chuang an tel a, Sikulpuikawn lam atanga kalte chu mi 4,000 chuanga ngaih an ni bawk a; an vaiin mi 9,000-10,000 vela ngaih an ni. Kawng zawhtute hian kawng tluanin dan loa din CADC thiah an duh thu te, Chakma foreigner-te chu Bangladesh-ah haw tura an duh thute leh thil chi hrang hrang hmangin an au rual.

Chanmari kâwn lam atanga kawngzawhah hian MZP President L Ramdinliana Renthlei-in thu a sawi a; Sikulpuikawn atanga kawngzawhah MSU president RB Lalmalsawma’n thu a sawi thung.

Kawng zawh hnu hian Central YMA hruaitute chuan Governor Kummanam Rajasekharan hnenah sorkar laipuia thlen tur memorandum an thehlut a, Memorandum-ah hian CADC chu dan loa din a nih thu te, Mizo mipuiin thiah an duh thu te, Mizorama awm mek Chakma zingah foreigner an tam thute an tarlang a ni.

CYMA General Secretary Lalhmachhuana sawi danin, kawngzawh hi YMA Sub-Headquarters dinna khawpui panga – Lunglei, Champhai, Kolasib, Serchhip leh Mamitahte neih a ni a; YMA Branch pathum, Joint YMA pahnih leh Group pasarihte’n an huam chhungah kawng an zawh bawk.

Vanapa Hall kawta thu sawitu Pu Vanlalruata, CYMA President chuan CADC thiah a nih theih nan theihtawp an chhuah zel tih sawiin, “Ná ka tih em em chu, Mizoram map kan en a, kan map chhunga awm Chakma area-ah Mizote’n mimal in tur chu thu hran, biak-in hmun kan nei thei ta lo hi chu a ná a ni. He CADC hi a rang lama thiah a nih theih nan kan bawhzui zel ang a, vawiina Mizo mipuite’n kan lungrualzia kan lantir hian thui takin tunah min kalpui tawh a ni,” a ti.

CADC thiah a nih theih nana YMA hmalak dan sawiin Vanlalruata chuan, Parliament House library leh Mizoram Assembly library-ahte an kal a, document an dap kual tih a sawi a, “Kan dan hremi te, mithiam hmasate kan ráwn kual. He hna hi a awlsam lo,” a ti a; mahni in chhung leh tapchhak záwla phunin awmzia a nei lo a, a taka che chhuak turin YMA-in hma a la ta tih a sawi. CYMA President chuan, kawng zawhnaa tel zawng zawngte chungah lawmthu a sawi a, “Mizoten kan inlungrualna kan lantir hi a ropui a, hei hi a tawpna a ni lo turah ngai ila. Mizo mipuite theihtawp chhuahin kan tangrual zel dawn lo’m ni?” tiin Mizo mipuite tang zel turin a sáwm a ni

Leave a Reply