CHAPCHAR KUT ROPUI TAK A HMAN A NI

Ni 5 leh ni 6, March 2020 khan A.R. Lammual ah Chapchar Kut hman a ni a, a ni khatna zing dar 7:00 ah Chapchar Kut lawmna Tlan programme neih a ni a, he hun hi Tv. Lalhmachhuana, Vice-President, Central YMA-in kaihruaiin, Pu TJ. Lalnuntluanga, Minister Of State for Law & Judicial etc. chuan khuallian niin he hun hi a hmanpui.

Chapchar Kut lawmna puala Tlan programme a khuallian Minister, Pu TJ Lalnuntluanga chuan thusawiin, Chapchar Kut denchhen a TLAN programme buatsaih a ni chu Organising Committee te remruatna fakawm a tih thu a sawi. Pu Manuna chuan Physical Fitness hi mihringte mamawh tak a ni a, mahni taksa sawizawi hi damdawi man tam tak tak a lei aiin a hlu zawk a ni a ti.

Khuallian, Pu Manuna chuan Chapchar Kut thupui “Zonun Ze Mawi Chawisan” tih chu a pawimawh hle a ni tih sawiin, kan hnam nunzia leh ziarang te chhunzawm zel a, mahni hnam nihna zahpui lo turin kalkhawmte a sawm a.

Khuallian chuan Mizoram Sawrkarin Zofate inpum-khatna a ngai pawimawh hle a ni tih sawiin, YMA hruaitute leh kalkhawm te chuan ‘Kan Ram’ kan tih hian kan chenna, Mizoram a dung Mel 200 leh a vang mel 100 chauh kan rilru a lang lovin, zohnahthlak hnam peng hrang hrangte awmna hmun chu “Mizoram” a ni tih rilru pu turin a chah , inunauna siam tha a theihtawp chhuah turin a fuih thar bawk.

Hemi ni chhun lamah hian Art & Culture Minister Pu R. Lalzirliana chu Kut Pa a ni a, Art & Culture Director Pu R. Hmingthanzuala chu Kut thlengtu a ni.

Kut Pa Minister Pu Lalzirliana chuan Chapchar Kut hi Zofa te hian eng ang takin nge kan hmuah a, eng ang takin nge kan nunah nghawng a neih kan in enlet a ngai a ni tiin a sawi a. Zofate tana hun hlimawm tak a nih laiin, a hlimhlawp lam ringawtah hian kan kalral ang tih a hlauhawm hle a, heng hunpui te hi kan hnam nunphung leh ziarangte, kan hnam nun zemawi leh induhsak tawnna te ngaihhlutna leh chawisanna hun ni thei se a duh thu a sawi.

Kut Pa chuan mahni hnam ziarang leh chin dan te ngaisanglo hnam reng rengin an nunphung an hloh a, pumkhata siamtu leh hnam thui khawmtu an culture hnualsuattu te chu awlsam tak a an chhehvel hnamdang te nekchep leh chimral an ni mai thin tih sawiin, mizo te kan vanneih em em na chu, pawl ropui tak YMA Pathianin min dinsak hi a ni a ti a, he pawl hmang hian mizo nunze mawi leh zirtirna tha tak takte vawn nun a ni zel a, chutih rualin kan inenkawlna ah pawh hian, kan tobul kan thlir let fo hi a tul ta hle a ni, a ti.

Kut Thlengtu Pu R. Hmingthanzuala chuan thuhma sawiin, CYMA General Secretary Prof. Lalnuntluanga chuan kalkhawmte lawmna thu a sawi a; ani bakah hian Chapchar Kut Organizing Committee in Mizoram pawn atanga Kut hmang tura an sawm Tidim, Tahan, Falam, Manipur, Tripura, Shillong, Haflong leh Silchar atanga lo kal te hnen atangin thusawi ngaihthlak a ni bawk. Kut lawmnaah hian CYMA buatsaihin Mizo Infiamna hrang hrang entir a ni a, hnam lam hrang hrang thlir ho a nih bakah hla leh rimawi ngaihthlak a ni.

Chapchar Kut 2020 ni hnihna, a lawmna ropui ber chu Lammual, Aizawl ah neih chhunzawm a ni a. Chief Minister Pu Zoramthanga chu Kut Pa niin Art & Culture Minister Pu R. Lalzirliana chu Kut Thlengtu a ni.

Kut Pa Chief Minister chuan “Zonun Zemaw chawi san” a nih angin Zofate chuan khawihmun pawh ni se zonun zemawi chu lanchhuahtir zel tur kan ni, a ti a. Malsawmna kan dawn meichher te, chanchintha kan dawn meichher te, tlawmngaihna meichher te chu chhi engin, state chhung leh pawn mai bakah khawvel zau zawkah chhi eng zel turin min chah a ni.

Kut Thlengtu Art & Culture Minister chuan Chapchar Kut chu kut hlimawm satliah mai nilovin, inunauna leh inlaichinna tha zawk a lo awm a, mitin lungrual taka induhsak tawn taka an awm hun a nih thu a sawi a. Ruahman lawk ang taka kut hman a ni leh thei chu lawmawm a tih thu sawiin, chhimtute zawng zawng chungah leh ram pawn atanga lo kal zawng zawngte chungah lawmthu a sawi a ni.

Kumin Chapchar Kut lawmnaah hian Laos, Myanmar, Indonesia, Brunei, Cambodia, Phillipines, Vietnam atanga India rama an palai te an tel a. Rev. Zolawma, Wales pawh telin ani hian Kut Pa hnenah Harp a hlan a ni.

Kut lawmna ni hnihna ah hian CYMA President Pu Vanlalruata chuan kalkhawmte lawmna thu sawi bawkin, malzai leh zaipawl hrang hrang ngaihthlak niin, hnam lam hrang hrang thlirho a ni bawk a. YMA branch 95 atangin Cheraw kanpui an lam a. Bu 128 awmin a kantu leh khawngtu zawng zawng mi 2175 an ni.

Leave a Reply