CHHIAT NI CHUNGCHANGA NURSERY VENG CHHUNG INKAIHHRUAINA

Veng chhungah chhiat tawk kan awm chang hian tihdan bik fel tak kan nei thin a. Chu’ngte chu kan hunlai mil zelin thlak danglam hret hret ngai a awm fo thin. Chhiatnia kan inkaihhruai dan hun rei tak kan lo zawm tawh chu Branch
YMA Executive Committee chuan ennawn ngai lai nia a hriatte a ennawn a.

Ahnuaia inkaihhruaina ang hi vengchhunga chhiat tawk an awmin zawm ngei tum tur a ni.

1. LUMEN CHUNGCHANG : Zing dar 9:00 hnu lama thi chu lumen tur a ni a. Zanlai Dar 12: 00 hnu lama thi chu tlaivarpui anga ngaih loh tur a ni. Hmun hla atanga ruang lo thleng tur a awmin, ruang lo thlen hma chu a nawlpui anga mitthi chhungte tlaivara menpui loh ni se. Tul bik thil a awm chuan mitthi chhungte leh Local Council, Kohhran leh YMA hruaitute thutlukna anga kal tur a ni.

2. THLAN LAIH : Thlan laihna thlanmual a hlat tawh avangin Tukthuan eikhamah thlan laih tur a ni.

3. ZUALKO KAL : Inbiakpawhna hmanruate a that tawh avangin, tul bik thilah lo chuan zualko intirh loh tur a ni.

4. VANTLANG HRIATTUR : Veng chhungah mitthi an awmin, YMA Information Centre atangin puan nghal zel tur a ni a, zan rei tawh hnua thi chu zing lamah puan nawn leh tur a ni.

5. RUANG CHHUAK : Vengchhung a tanga ruang chhuak tur a awmin YMA Information Centre a tanga puangin
kuang siamsak thin bawk nise. Mitthi Buhfai erawh khawn loh nise. Ruang chhuak chungchangah veng chhunga cheng ruang chhuak te chauh puan thin ni se, ruangkhual (hmundang atanga ruang lak, chhuak leh mai tur) te chu puanloh tur a ni.

6. MITTHI BUHFAI KHAWN : Mitthi chhungte tanpui nan chhungkaw tinah Buhfai no khat leh Rs.10/- zel khawntur a ni a, buhfai leh pawisa hi a khawntuten Section hruaitute kutah an hlan ang. Section hruaitute kaltlangin, remchangah mitthi chhungte hnenah hlan tur a ni.

7. RUANG HMUAH : Ruang hmuah ngai a awm chuan heng hmunah te hian hmuah thin tur a ni:
(i) Hmar lamah – Durtlang/Zemabawk
(ii) Chhim lamah – Melthum
(iii) Khawthlang lamah – Company peng
(iv) Reiek lamah – Lawipu/Dihmun zawl

8. KHAWHAR LENPUI : Khawhar lenpui naah tanna leh banna hun siam thin tur a ni a, zan thum khawhar
lenpui hunah hian lumen zan chhiar tel tur a ni. Mitthi vuitu kohhrante’n hunserh an hmang thin ang.

9. THINGPUI SEM : YMA zan (zan 3) chhung hian khawhar inah thingpui sem thin tur a ni. Vui Programme tan dawn hnaihah chuan sem tawh lovin Tea Urn-ah chhawp mai tur a ni.

10. KHAWHAR RIAHPUI : Branch YMA hminga khawhar riahpui tawh loh ni se.

11. HLAMZUIH: Thla thum (3) (Ni sawmkua-90) tlin hmaa boral chu hlamzuih a ni a. Buhfai khawn, Dar vuak, Vantlang hriata puan, Zualko kal leh khawhar riahpuite hi tih loh tur a ni a, amaherawhchu, kuang siam thlanmuala inphum tur a ni.

12. KUANGA IN DAH : Kuang siam zawh veleh mitthi ruang kuang chhunga khung/dah nghal tur a ni. Tin, tul bik thilah chuan Ruang tuam (Thelret puana tuam) ngai an awm chuan thelret puan a tuam a ni ang. Kuang siamsa hi Library Building-ah leh YMA Hall-ah dah a, a siamna hmanrua hi hmun 2 ah hian dah tur a ni.

13. MITTHI VUI HUN : Hetiang hian mitthi vui hun hman thin nise :-
(i) Tlaivar pui – Chhun dar 12:00-ah
(ii) Tlaivar pui loh – Chawhnu dar 1:00 ah.
Mitthi vui hun chhung hi rei lo zawka hman thin a nih theih nan, ‘Hunserh’ chhung hian mitthi vuitu leh chhungkaw aiawh pakhat bak chuan thu sawi loh nise. Thusawi duh dang awm anih chuan vui tan hmain sawi thin nise.

14. KUANG KHUHNA : Kuang khuhna hi inhmantawm lova phum nghal zel nise.

15. KUANG CHEI : Kuang hi YMA-in uluk taka chei thin anih vangin a theih hram chuan mitthi chhungten kuang hi chei loh nise.

16. KUANG THLALAKPUI : Hmeh 20 aia tam lo ni thei se. Thlanmual Ina in vui hnuah thlalakpui tawh loh nise.

17. YMA HMINGA INRAL : Branch YMA hminga ralna (Dekchi) Rs. 350/- man hu pek tawh nise, ralna hlan erawh Section YMA hruaitute kutah awm se.

18. KEYBOARD HMAN : Mitthi lumen zan leh YMA zanah te zai hruaina’n ‘Keyboard’ hman remtih a ni.

19. THLANMUAL A INVUI : Thlanmual In-ah emaw thlan kotlangah emaw invui thin nise.

20. TLAIVAR ZANA EITUR SIAM : Tlaivar zanah eitur sem thin nise. Zan rei tawha mitthi an awm a, eitur siamah harsatna a awm erawh chuan Section YMA – in an Section huam chhungah tha an tih angin an kalpui ang. Tlaivar zanah sawhchiar siam dawnin sa 7 Kg siam thin nise, engemaw rokhawlhna dang a awm anih loh chuan, zanlai pel hah thingpui nen sem thin nise. Khawvar dawnah thingpui a remchan anga sem leh nise.

21. MOTOR-A KUANG PHURH : Thlanmual a phum turah Kuang- Motor-a phurh nise, Pick-up hman thin nise, a remchan lohnaah chuan Ambulance hman tur a ni.

Leave a Reply