CHHIAT TAWH LEH A BEHBAWM

– Zokunga (President, NYMA)

Tun hma chuan Mizo te hi khawsak phung inang, eizawnna thuhmun nei kan nih avangin mihring dinhmun a inang deuh pet pet a. Chutiang khawtlangah chuan inlainatna leh inhriatthiam tawnna te hi a sang bik thin. Khawtlangah chhiat tawk an awm chuan awmni an kham mai a, khawtlangin tangrualin chhiat tawk chhungkua an chhawmdawlin an khawhar an hnem thin.

Mihring khawsak phungin hma a sawn zel a, eizawnna chi hrang hrang kan lo vuan ta a, kan hun awl neih dan leh kan hnathawh hunte pawh a lo inanglo ta nuaih a, chutiang a lo nih takah chuan khawtlang huap takmeuh chhiatna a lo thlen pawhin kan intawiawm dan a dang ta hle a ni. Chu’ng zawng zawng chu sawi lovin kan tunlai huna veng chhunga mitthi an lo awm a chhiat kan tawha kan nunphung lang chinte leh a lang lo lama nasa taka tan a ngaihnate i han sawi puat puat teh ang.

Beisei lawk hauh lohin emaw, rin ruk deuh ang ngeiin mitthi an lo awm ta a, thil tul langsar hmasa ber chu mipui punkhawm theihna tura chhiat tawkte chenna in siamrem a ni. Fimkhur takin bungruate seng fel a ngai a, thil bo thei chite leh vantlang hmuh rem lo chi thliar hrante chu thil tul hmasa an ni. |halai leh val upa te’n chhiat tawk chhungkuate rawn chung zelin hei hi tih a ni thin. Hetiang hunah hian mi rintlakte sulhnu chu chhui leh a nuam hle thin.

YMA thutthleng lakkhawm a lo ngai a, tlangvalte hna a ni. Lumenna a zai tura kal ringawt hi a tawk lova, hemi hma hian tlangval tan awm mai mai chu thil zahthlak a ngaih tur a ni. Mitthi in lama thingpui leh thil dang buatsaihna tur bungbel lam khawm a lo ngai a, a hmun turah felfai taka ruahmanna siam chu mi pangngaite tihtur a ni. Kuang pawh a siamtu an awm loh chuan amahin a awm ngawt thei lo.

Lumen hunah emaw, lenpui hunah emaw vui hunah pawh ni se thingpui leh thil dangte pawh a tul anga buaipui thin a ni. Hei tak hi lang si lo lama hah zeka chet a ngaihna pakhat bawk a ni. Tleirawl leh tlangval zuanzang deuhte’n bengvar chhuah thin ila a mawi ngawt ang. Thlan laih hi tlangvalte hna a ni a, hman reng theih nilo mahse hman bik vanga lai tumah an awm biklo tih hriaa hun kan pek a ngai a ni. Thlan vur tur makpa hi an awm loh tak deuh ziah avang hian a vur leh thleng hian a laitute hna a ni ta.

Mitthi buhfai khawn hi kan hnam chin dan mawi tak a ni a, a tul vanga khawn a nih ai hian kan hnam tih dan a nih vanga mitthi buhfai khawn thin kan nih hi langsar zel se hei ai hian kan inkhawn chhuak hnem ngei ang. Nula tan mitthi buhfai khawn bakah mitthi in phiahfai chenin tihtur chin a awm. Hei vang hian nula bengvarte chu val upate’n an chhinchhiah fo reng zu nia.

Kan hnam nunphung (culture leh tradition) hi tha taka kan humhalh zel dawn chuan tun ai hian keini vengte ngei pawh hian chhiat tawh nikhuaah tan lakna tur leh tanrualna tur kan nei ngei ang. Tanpui ngaite tanpuitu YMA kan ni si a.

Leave a Reply