CHHIATNI A NU LEH PATE MAWHPHURHNA

YMA member tan chuan Chhiatni hi hun pawimawh tak a ni. Mizo tawhphawt chu miin chhiat an tawh in an mahni hnem turin kan pen chhuak thin tih pawh kan hre tlang awm e. Amaherawhchu, khawvel a lo changkang chho vel zel a, eizawnna buai tak, chhiatni-a kal hman mang lote pawh awm thei a ni a, zirna avanga mi chhiatni-a hnem tura chhuak hman lo te, tunlai khawvel changkanna chi hrang hrang-TV, Computer etc., avanga mitthi an awm pawha chet eih tum lote pawh kan awm ta niin a lang. Chhiatni bik sawi a zel ila. Nula ,Tlangval duhawm pui pui, mitthi dar a rika che eih lo, thawh chhuah tum reng reng lote pawh awm theih a ni ta a, chung thalaite lehkhathiam leh uihtheih thil ti lote an ih chuan chhiatni-a pen chhuak ngai miah lo pawh nise nula tlangval fela chhiar an ni tho bawk niin a lang ta a ni.

Hetiang hi kan khawtlang dinhmun niin in hre ve em? Mitthi lumen kan harsat tiah tiah, a thlan lai ngailo tlangval kan tam tial tial a, mitthi buhfai khawn turin nulate mawng a rit tial tial a, khawhar ina riak tur tlangval pawh kan inhmu tlem tial tial, niin a lang. YMA-ah pawh kan tlangval tha leh nula tha tak tak inhmang duh miah lo, kan Mizo khawtlang hi a awm zel dawn, chhiatni engtinnge hma kan sawn ang tih hi ngaihtuah a ngai hle a ni.

A hmasa berah chuan nu leh pate’n kan fa theuh hi mitthi lumenna a kal turte, thlanlai tur te, mitthi buhfai khawn tur te, khawhar in a kal tur te, khawhar in a kan Mizo Lengkhawm zai thiam taka sa tur in kan fate kan zirtir loh chuan thalaite dem theih kan ni lovang.

Chhiatni thatni-a nu leh pate tihtur kan hriat hmasak a, kan fate theuh kan zirtir chuan kan hnam tih dan tha tak hi a kal zel ang. Kan fate hi zirnaa hmasawn tur te, Officer lian pui la ni tur te, nupui pasal tha tak nei turte hian kan duhsak em em theuh tih a chiang a. Kan fate zing thawh hma tir thin ila, an tih tur te kan kawh hmuh hi a tul tak zet a ni. Tichuan chhiatni thatni a tih tur te an hre dawn a ni. A bikin Chhiatni thatni-a kan thalaite an tih tur hi chhungkua-ah i in zirtir thar leh ang u.

Leave a Reply