CHHIATNI FUND – KA PIANTHARNA

– R. Zonunthara (Y-Section)

Nursery Veng hi rethei leh hausa em em bik pawh awmlohna, Aizawl vengah chuan khawsak kairualna tak veng pawh niin a lang. Mihausa filawr bik, a tellova khawtlangin ke a pen theih miah loh, mi langsar bik kan neilote hi kan vanneihna hlei hlei a ni thei awm e. Kan inlungrualna avang erawh chuan veng hausa in an tih theih apiang kan ti ve thei zel hi chu Nursery Veng ti nuamtu pakhat a tling. Hetih rual hian veng tana ka piantharna thuruk hi sawt puitu pakhat tal an lo awm takin, sawilo theilo niin ka inhria.

Chhiat tawhna avangin veng dangah ka kal ve fo thin a, kuang mawi tak taka siamin khawtlangin chhiat tawk chhungte an thlah ka hmu fo mai a. Vawikhat chu veng pakhatah an YMA hruaitute hnenah, “Engtin nge in tih bik?” tiin inthlahrung takin ka zawt a,an mi chhanna ah chuan, “Chhungkaw tinah Rs 300/- te, Rs 500/- te in kan intuk ve a, mahse thihna hi kan ta theuh ni mahsela thawh theilo tamtak an awm ve a, in thin nawn fo mai chu hrehawm tak a ni, hetih lai hian veng chhunga mi awmthei deuha kan ngaihte hian YMA buaina tur hi hre rengin, midang kepna thinlung pu chunga thawhlawm an thawh thin avangin kan ti thei hram hram a ni,” tiin min chhang a. Hei hian ka thinlung ngaihtuahnaah thu a va sawi ring tak em!.

Kan vengah pawh hian kuang siamna tur ngaihtuah hian kan YMA hruaitute hi vantlang hriatloh hian an va buai nasa thin em!. Kum khata mitthi zat turte hi bituk theih ni sela zia awm deuh tur, mahse kan thu a ni silo a. Chuvangin, ‘veng chhunga awm thei deuh leh eizawnna ngialnghet deuh neite hi chuan midang kepna rilru pu chungin CHHIATNI FUND hi an rawn khawn hunah pek i tum teh ang u’ tih hi kan pianthar theuhna tur niin a lang. Hetiang rilru hi a mizo a, a thianghlim bawk.

Chhiatni ah thlan kan lai vek theilo a, kan lengkhawm tam theilo pawh a ni ang, hetiang thinlung pu chunga thil kan tih chuan kan hriatloh lai hian lungngaite hnemtu tha tak kan lo ni thei a ni. Hei hi Krista rilru pawh a ni e.

Leave a Reply