CHHIATNIA THALAITE MAWHPHURHNA

– Ch. Lalfamkima (Y Section)

Thuhma :
Chhiat ni that ni tih hian a huam zau hle a, thihna ni kher lo pawh, vanduaina chi hrang hrang kan tawh hi a huam thei a, that ni erawh hi chu tunlaiah chuan sawm bikte tan a nih deuh tawh avangin kan mawhphurhna pawh a tam lo hle. Harsatna a lo thlen a, sawm bik pawh ni hauh lova tlawmngaite tlawmngaih dan tur hi he thupuiin a sawi tum pawh a ni a. CHutih rualin thihna in leh a chheh vela thalaite mawhphurhna pawh kan sawi tur chu a ni.

Chhiat ni that ni hi mitintin kan nei a, kan Bible ngei pawhin,”Lawmte chu lawmpui ula, tapte chu tahpui rawh u,” a tih ang deuhin Zofate hi ringtu kan nih hma daih tawhin lungngaite kan inthlamuan tawn a, lawmte kan inlawmpui bawk thin. Chu thil chu ‘Zonun ze mawi tlawmngaihna’ nen a inkawp tlat avangin thlah theih a ni lova, Kristianna zirtirna thupui pakhat a nih bawk avangin Kristian kan nih chhung chuan kan inlawmpuiin kan intawrhpui reng dawn a ni.

Chuvangin intawrhpuina leh inlawmpuina hunah hian thalaite chuan kan tih tur chin hriat a pawimawh takzet a ni. A hmasain chhiatni leh thatni kan tawh changin a kul a taia tlawmngaih chhuaha midangte tana thawkchhuak thinte chu thalaite an ni. Thalaite tel lo chuan chhiatni leh thatni hi a kim thei lova, a nih tur angin a ni thei lo ti ila kan sawi sual tam awm lo ve. |halaite hian mawhphurhna tam tak kan nei a, nula leh tlangvalte mawhphurhnaah hian inanglo tam tak a awm thei a, nula leh tlangvalte’n an tih tur bikte pawh a awm hrang nual a ni. Chhiat ni leh that nia thalaite mawhphurhna tam takte chu eng te nge ni ta? |halaite mawhphurhna tam tak awm zingah a pawimawh zual bikte han tarlang dawn ila.

1) Thih ni : A hmasa ber atan thih ni chung chang thuah chhungkhat laina te, thiante leh a tu te pawh an han thih meuh chuan an uihawm a, a mi deh a na duh hle a ni. Thihna hian mi a run ngawih ngawih a, a tuartu tan phei chuan a nain sawifiah thiam sawi a har hle a ni. Kan hmangaih ten min han kalsan chiah hian min hnemtu kan ngai thin a, heng hunah hian thalaite kan pawimawh em em a ni. MI an han thih chiah hian thalaite chu kal khawm vatin chhiat tawkte bungrua an seng hawi a, an tih tur renga ngaiin a tul ang zawng zawng an thawk char char a, in chu mipui tam tak dawl zo thei turin an buatsaih thin a ni.

2) Mitthi lumen : Hei hi thalaite mawhphurhna lian leh pawimawh ber pakhat a ni a. Hman lai deuh kha chuan hetiang hunah hian nu leh pate hovin ruang chu an tlaivarpui thin a, tunah chuan thalaite mawhphurhna a ni ber tawh. Zan tir lamah nu leh pa, thenawm hnai leh veng danga chhung khatte lo kalin anni lamin an tawrhpui ve zia kawng hrang hrangin an rawn lantir thin. Chutianga hun an hman chu chhawk turin thalai an lo kal thin a, khawhar hlate sain an zai tlaivar zak thin a ni. Zankhuaa tui taka zaia mitthi chhungte awih kha an mawhphurhna pawimawh ber a ni. Mitthi lumen zan hian thalaite chu an hruaitutte kaihhruaina hnuaiah tlaivarte puala eitur siamin an buai hle thin bawk.

3) Thlan laih/Mitthi vui ni : Mizote hi inphum thin hnam kan ni a. Mi an thih reng reng chuan tlangvalte’n thlan an lai thin a, chu chu chhiat nia thalaite a bikin mipate mawhphurhna lian em em a ni. Kan vengah chuan thlanmualte a hlat deuh avangin thlanmualah eiturte siam thin a ni a, hetah hian nula bengvar deuhte chu an kal ve bawk thin. Tin mitthi vui ni hian thlanmual lamah thalai tam tak an buai em em laiin mitthi in lamah hian buaina tur leh mawhphurhna tam tak a awm reng tho a. A bik takin mitthi vuia lo kal mipui tam takte thinngpui in tur lo buatsaih leh sem hna hi nula leh tlangvalte tan hna langsar si lo, hautak em em a ni a, nulate pawhin hei hi kan hriat reng a ngai a ni. Tin, kan hnam danah mitthi an awmin mitthi buhfai khawn thin a ni a, hei hi nulate mawhphurhna a ni bawk. Kan invui liam hnuah YMA hun a tawp thlengin thalaiten mitthi inah mawhphurhna leh chanvo pawimawh tak kan nei reng a, khawhar chhungte hnem tur leh peizawn an ngaihna lai apianga lo tanpui hi thalaite mawhphurhna lian tak a ni.

Tlipna :
A hma lama kan sawi ang khian chhiat ni that niah hian nula leh tlangval tlawmngai leh bengvar tak takte hi khawhar chhungten an thlamuanpui em em thin a, chutiang tak chuan thalaiten kan mawhphurhnate hi midang tih atana khek mai lova kan chet chhuah a tul hle a ni. Nula tan khawhar in lenpui program hman zawh veleha haw nghal mai ai chuan hmun hnawk han phiahfaite a mawi a, tlangval tan pawh thlan laih zawha mahni in lama ding luah luah ai chuan a vur leh thlenga awm hi a puitling thawmhnaw a ni.

Chutiang kan inzirtir mek lai chuan khawhar ina kal nachang hre lo nula tlangval, mitthi buhfai khawn tum hauh lo nula leh thlan laih nachang hre miahlo tlangvalte pawh kan awm ve ta zel mai. Chhiat ni that nia Mizo kan nih anga kan mawhphurhnate hi kan inzirtir thar leh a tul viau niin a lang.

A tawp ber atan kan Mizo nun ze mawi tlawmngaihna in par a chhuah thinna tung ding a, chawi nung tur hian chhiat ni chung chang hian pawimawhna a nei lian hle a ni. Hetiang huna chhiat tawkte tana thlamuanpui tham kan nih ang taka kan tih tur apiangte ti a, tih loh turte tilo chung leh midangte tana malsawmna nih hi kan Pathian thu nen pawh a inrem zia ngaihtuah reng chunga kan awm a pawimawh a. Kan veng mai nilo, a ram pum huap pawha hemi chung changa kan intuaithar leh a tul takzet a ni.

Leave a Reply