CITIZENSHIP (AMENDMENT) BILL, 2016

Tunlai rampum in kan buaipui em em Citizenship (Amendment) Bill, 2016 hi enge ni i han zir chiang dawn teh ang.

He kan sawi tura hi Citizenship Act, 1955 siamthatna tur Bill a ni a, Citizenship Act, 1955 { Sec 6 (1) ah} hian ram dang atanga India rama rawn pem lut, India khua leh tui/ citizen ni thei tur a tihte chu- Nu leh Pa india khua leh tui nisa te, Dan ang taka rawn lut e.g. passport leh visa etc. nena lut te, Thla 12 liam ta chhunga India rama awm nghet a, chumi hma kum 14 kal ta chhunga India rama a awm hun chhung belh khawm kum 11 tal tling tawhte an ni a. A vaiin kum 12 chhung India rama awm tawh tihna a ni. Eng ram mi pawh a theih a, eng sakhua pawh a theih vek a ni.

He Act hi vawi 5 lai mai (Siamthat) Amend alo ni tawh a, heng kum 1986, 1992, 2003, 2005 leh 2015 ah te hian siamthat alo ni tawh a ni. Tun a siamthat leh an tum hi a tum 6 na a ni ta a, Ni 19 July 2016 khan Lok Sabha ah pharh tan a ni tawh a, ni 8 January 2019 khan Lok Sabha ah pass a ni ta a, Rajya Sabha ah pass a la ni lo. He bill hi Parliament in hniha pass a nih a, President in a apawm bawk chuan, The Citizenship Act, 1955 (as amended upto 2019) tiin emaw sawi alo ni tawh ang.

Citizenship (Amendment) Bill, 2016 ang hi chuan ram dang mi India khua leh tui nihna pek theihte chu hetiang mite hi an ni dawn a ni- A Dan (Act) in a sawi sa khi chu a la nung reng dawn tho a. Mahse, belh a rawn neih tak chu, dan lo anga lut zingah pawh heng sakhua- Hindu, Sikh, Buddhist, Parsi, Jain leh Kristian betu an nih a, Pakistan, Bangladesh leh Afghanistan atang rawn lut an nih bawk chuan pek theih an ni ang. Thla 12 liam ta chhunga India rama awm nghet a, chumi hma kum 14 kal ta chhunga India rama a awm hun chhung belh khawm kum 6 tal tling tawhte an ni a. A vaiin kum 7 chhung India rama awm tawh tihna a ni. (An awm hun chhung tih tawi a ni dawn ta a ni). Sakhua leh ram a rawn thliar hrang ta nuaih mai a ni.

Constitution Article 14-na (Equality before law) chuan dan hmaah chuan mi tu pawh (every person) an intluk tlang vek a ni a ti a. ‘Mi tu pawh’ tih ah hian ‘India citizen zinga tu pawh’ a ti lo a ni. A awmzia chu India ram dan hmaah hian mi tu pawh, India khua leh tui ni pawh, ni lo pawh kan intluk tlang vek tur a ni a tih laiin he bill hi chuan sakhua leh ram thliar bik a rawn nei ta a ni. Constitution a kalh ni ngeiin a lang. Citizenship Act, 1955 kha chuan ram leh sakhua thlei bik a nei lo a nih kha. He dan hian sakhaw lian tak Muslim te a huam lo a, Juda ho te, etc. ho te a huam ve lo. Sakhaw nei lote pawh a huam ve lo.

He thil hi vawi leh khata rawn thleng thut a ni lo a. India Sorkar chu a in hmakhua hmasa thiam hle a. Passport (Entry into India) Rules, 1950 leh Foreigners Order, 1948 te chu kum 2015 khan a lo amend dim diam tawh mai a ni.

Heng rules siamtu dante, Passport (Entry into India) Act, 1920 leh Foreigners Act, 1946 te chuan dan lova lo lutte chu lung ina khung emaw, thawn let tur emaw an ni tiin an lo sawi a. Mahse, dan lova lo lut, tan ina khung emaw thawn let tur emaw a sawite chu a chunga kan sawi ang khian kum 2015 khan a hrilhfiahna an lo tidanglam daih tawh a. Afghanistan, Bangladesh leh Pakistan atanga Dec 31, 2014 hma lama lo lut, Hindu, Sikh, Buddhist, Parsi, Jain leh Kristiante chu dan lova lo lut hrem tur a tih zingah a paih daih tawh a ni. Hemi hma lama heng a sawite zinga mi lo lut chu hrem theih leh thawn let theih pawh an lo ni tawh lo a. Chakma a ruk a rawn pem lut te pawh ni 31 December, 2014 hma lama lo lut anga an insawi chuan kan thawn let thei dawn hauh lo a ni.

He Citizenship (Amendment) Bill, 2016 kawng tur hi ngawi rengin an lo sial lawk daih tawh tih a chiang hle mai. Tunah a takin an rawn hmang tangkai tan ta a ni. Mipui tam zawk in kan hriat miah lohvin kua anlo hreuh char char hi a lo ni a, a hria a te pawh in enge a nghawng tur, a pawi dan tur pawh anlo hre pha lo pawh a ni mai thei. Tunah chuan a that lohna, eng thil pawi nge a thlen dawn tih kan lo hre ta a, chuvang chuan he dan hi an tih danglam lohna tur in kan theih tawp in kan do dal ve tur a ni. Hemi dodalna kawngah hian kan ram hruaitu te emaw, NGO hrang hrang te chauh an pawimawh lova, kan zavaiin he thil hi kan do dal tur a ni. Mitin te kan tan tlan a, a tawp thleng a tang tlat turin i han tang rual teh ang u.

Leave a Reply