COMMITTEE AWMDAN MAWI

Kum a lo thara Pawl hrang hrang leh Kohhrante’n Committee Member thar ruat leh thlangin kumin chhunga kan hmalakna tur relin kan Committee leh dawn a, Memberte’n a hnuaia point-te hi inbihchian nan hman theuh theih i tum ang u.

Committee zahawmna
Kan telna Committee kha pawn lam atangin tuma’n an rawn ti zahawm dawn lova, a chhunga member-te thiltih leh rel dan leh an bawhzui hlawhtlin dan atangin a zahawmin a zahawm lo mai dawn a ni. Hei hi member-te’n hriat thar fo a pawimawh khawp mai. Chuvangin Committee leh a rorel a zahawm theih nana point pawimawh tlem tar lang ila.

a) A huna thlen leh Committee zawh thlenga awm : Committee Member atan ruat kan niha kan pawm ve tawh anih si chuan Committee a hun taka kal leh a tawp thlenga awm hi kan mawhphurh (duty) a ni. Hei hi Kohhranah vawn that viau anih laiin YMA leh Pawl dangah hian ngaih pawimawh a ni lo fo thin, Member-te’n tan lak a ngai hle a ni. Committee tlai taka kala mahni ngaihdan vung deuhva sawi a, mi dangin an sawi ve laia tlar hnung lama lo phun bul bul leh Committee zawh hmaa haw phei hi chu tuma’n chin loh tawp tur a ni. Hetianga awm ching hi chu Committee member atana ruat nawn loh mai hi pawl tan a him duh hle.

b) Committee thurel pawm leh sawisel : Committee a huna thlen hman loh tumin an lo rel tawh pawm thiam leh kan kal loh tum a nih phei chuan an lo rel ang ang a hlawhtlin theih nan phak ang tawka hmalak mai hi mi puitling zia a ni.

Committee chhungah chuan ngaihdan in-an-loh vangin hmai sen khawpa inhnial bap bap chang a awm thei, a tawpa committee thutlukna siam, minute kha kan thutlukna chu a ni tih pawm thiam hi a tul hle. Chutiang ni lova mahni ngaihdan vuan tlata thutlukna siam ang sawisel leh bawhzui that duh loh chin hi mi ngiau-nger leh kheuh-beuh nihna a ni a, Pawl leh a rorel tih zahawm lohna chi khat a nih avangin member ten mausam ngam a tul hle.

c) Tawngkam hawihhawm hman : Committee naah Member-te kan intluk tlang vek a, hniam leh sang bik an awm lo, Member zahawm tak kan ni vek tih hriat fo hi a pawimawh hle. Mizo, aia upa zahthiam hnam kan nih avang erawh chuan kum lama upa leh Pawla lo awm senior tawhte zai ngaihthiam a tul chang a awm thin, hei hi erawh chu hrethiam ila a tha khawp mai.

Tu emaw a nih avanga tawngkam dengkhawng leh chaldelh deuh hman khum mai te hi chin loh a tha. Thurel a zira ngaihdan in an loh vanga inhnial bap bap chang te hlei hlei hian tawngkam hawihhawm hman a pawimawh zual thin a ni. Pi leh Pu chenah ‘Tawngkam tha in Sial a man’ kan tih thin kha i hre reng ang u.

Tawngkam ka thiam ve lova tih changchawia mi chaldelh al-a thusawi ching te hi a tlangpuiin mi chapo leh induh, inzir tum lo hrim hrim, pawl tana mi hnawksak an ni duh hle. Chuvangin Committee a tel tlaka ngaia Member atana ruat kan nih ve tawh si chuan tawngkam hawihhawm hman leh zir hi kan tih makmawh a ni tih hriain i zirin i hmang hram hram ang u.

d) Committee mawng pawp : Committee thurel (minute) baka memberte’n an sawi dan leh minute ang chiah ni lova midang daihin an lo hriat leh sawi theih hian ‘Committee mawng pawp’ tih a ni thin. Thil mawi lo leh pawl tana mualphona a ni chungin he tawngkam hi hriat a ni fo mai a, a pawi hle a ni. Memberte inenfiahin i fimkhur ang u.

Hetiang sawi a awm hian Committee member zing ami tuemaw ber chu mawhphurtu a nih a ngai a, Pawl tan mualphona thlentu mi depde tak a ni ang. Chutih rual chiah chuan mahni telna ni lo pawlho thurel hriat tuma vir vir mai, dawt leh thutak chawhpawlha tute emaw chhimbudawi kuala, member fing lo deuhte dawp a, an sawi anga ngaih theih tura Pawl mualpho theihna tura thu vei vir ching awm theih a ni bawk. Heng mi chi hnihte hi pawl tan thlauhthlak ngam leh an bula tumah tawng tam loh mai hi a tul chang a awm ve thin, i hrethiam ang u.

Heng zawng zawng hi kan zawm tlan theih chuan mi zahawm leh mi pangai, mi te tan tan rintlak kan nih theih ngei a rinawm a ni.

Leave a Reply