COPYRIGHT

– Lalrinzuala Chawngthu
(Asst. Secretary, NYMA)

Music video pakhata thlalak pakhat hman avanga tunlaia kan sawi lar phian Copyright Act, 1957 chungchang hi tawi te i tarlang teh ang, kan rilrua zawhnate hei hian engemaw chen chu chhang thei turah ngai ila.

Sorkar laipui Dan siam liau liau a nih avangin India rama state-te thuneih vena tur a awm lova, Mizoramah phei chuan kan la hmang ve meuh lo.

Central sorkar enkawlna leh kaihhruainain Copyright Office, Registrar thuneihna hnuaiah siam a ni a. Sorkar laipui din bawk Copyright Board chu India rampum enkawltu niin heta Chairman hi High Court Judge ni tawh/HC Judge qualified ngei an ni thin a, Registrar kha Secretary a ni nghal bawk.

Copyright Act, 1957-in thuneihna a pek ang zelin he Board hian ro a rel thin a, India rampumah States Reorganization Act, 1956 angin Zone 5 : Northern, Southern, Central, Eastern & Western Zone-ah te then niin Bench siam a ni a, Eastern Zone-ah Bihar, W.Bengal, Orissa, Assam, Manipur & Tripura te awmin Mizoramah chuan Bench takngial pawh kan la nei ve thei lo.

Copyright Office-ah hian Register fel taka vawn niin copyright hauhna hming leh hauhtu hming leh address kimchang tak vawn thin a ni. Heta inziaklut tur hian dilna form siamsaah pawisa chawi ngai chawiin dil theih a ni a, engkim tihfel a nih hnuah ziakluh thin a ni. Heta ziahluh tawh hi chu court-ah pawh a hranpaa ‘proof’ emaw ‘original’ emaw thehluh kher ngai lova ‘thutlinga’ pawm tawh tur a ni.

Copyright hauh theihnate – (a) thu leh hla, lemchan thuziak, rimawi & lemziak (b) cinema chi reng renga chhuah chi film (c) sound recording te niin, hengtea copyright neih fel thlap tawh midangin an ruksak (emaw dan bawhchhia apiang) chuan court-in thla 6 aia tlem lo leh kum 3 thleng tantir theih a ni a, Rs. 50,000/- aia tlem lo leh nuai 2 thleng chawitir theih a ni. Mahse, dan bawhchhetu khan sumsiam nan a hmang lo a nih erawh chuan thla 6 aia rei lo leh Rs. 50,000/- aia tlem pawh chawitir theih a ni thung.

“Copyright kan nei a, tumahin ka phalna lovin ka kutchhuak an lo hmang/tichhawng ve thiang lo,” thuthmuna lo tih ve ngawt a fuh ber lova, kan kutchhuak/siamchhuah/phuahchhuah pawh ni raw sek sek, Delhi khawpuia copyright office-a register-ah kan ta a nih tihchian nana kan ziaklut lo a nih chuan engmah sawi theih kan nei lova, Mizoramah ala tih theih loh lehnghal.

Ama’rawhchu, cable TV leh tute pawhin copyright neitute phalna la hmasa lova tawng dang film Mizotawnga letlinga an rawn tichhuak ve ngawt te, Mizotawnga lehkhabu kan lo letling ve ngawt te, Music video-a picture thenkhat kan lo hmang ve ngawt te, sound tract leh mi hla thluk kan lo hmang ve ngawt te, mi lemziak kan lo lachhawng/ entawn ve ngawt te erawh hi chu buaina tawh mai ala hlauhawm dawn avangin fimkhur a that hmel khawp mai. Tin, heng kan sawi takah te hian copyright an hauhna hmuh tur a awm vek bawk thin.

Leave a Reply