COVID-19 LEH A KAIHHNAWIH

– Dr. Martin Chawngsailova
A -Section

Hrileng in hun rei tak min awpbet ta a, inkharkhipna pawh ngaiah kan nei ta nge maw ni hrilengin ziaawm lam a pan thei rih meuh lo, inkharkhipna hnuaiah kan tawm rei tak avangin eizawnna kawngah, sum leh pai deh chhuah kawngah mi tam takin harsatna kan tawk a ni tih pawh inhrilh nawn fo kan ngaiin a rinawm loh. Covid – 19 hrik in mihring taksa chhunga a hnathawh dan leh nunna atana a hlauhawmzia pawh A Aw B Ch kan bel tluk zetin kan bel tlang tawh. A changin kan inhlau tawn a, a changin kan inhlauh tawnna te pawh hi a nep leh deuh thin emaw ni chu aw tih tur hian kan khawsak dan hi hriatthiam a har a,kan hun tawn meka hri kiam thei lo hi engnge a chhan tak pawh hi hriatthiam a har ta hle mai.

Kan han phun hluai a, sawrkar kal dante kan han sawisel leh ang nawk nawk a, hrivei kan tam ve viau emaw kan tih lai hian Mizoram chu a ziaawm ber kan ni lawi si. He hrileng kara hrileng ti ziaawm tu pakhat chu sawrkar in fing tak leh rem hre taka Local/Village Level Task Force a din hi ti ila mi zawng zawng chu ni lo mah se a tam zawk chuan min tawmpuiin ka ring. An duh leh chak vang pawh nilovin khawtlangin a mamawh vang leh khawtlang an him theihna turin mahni hrehawm pawh pawisa lovin, dinhmun hlauhawmah an ding palh thei a nih tih hria a LLTF member te thawhrimna hi tarlan loh atan chuan thil uiawm niin ka hria. Hrileng avanga khawlai a reh thuap laiin LLTF member-te tlawngaihna thawm erawh chu mi zawng zawng hriattheih tura ring a ni.

Engpawhnise, hrileng thawhkhatna chu hunin min liampui ta der mai a, hrileng thawhhnihna in min han luh chilh meuh chuan hri avanga nunna chan pawh nitin maiin ‘Social Media’ lamah kan chhiar ta reng mai. India ram hmun thenkatah ziaawm lam a pan mek laiin kan ramah chuan ziaawm lam a pan thei meuh lo va, hrileng thawh thumna mithiam ten an sawi hian min nang ching nghal mai dawn niin a lang. Hrileng thawhhnihna kha India ramah chuan May ni 7 kha a nasat lai ber ni a sawi a ni a. A thawhthumna hi zirmi ten natna hrik inthlak danglam dan te an han zir chiang a, July thla tawp emaw August thlatir lam atanga a intan an ring a.
Tin, a nasat laiber tur ni a an rin chu September – October thlaah an beisei bawk a ni. Engangin nge mihring taksa ah hna a thawhleh dawn chiang taka lo sawi lawk theih a ni lo va, rin danah chuan naupang lamah a thawkna tur a beisei a ni. Chumi a nih avang chuan naupang tan an taksa natna dotu tichak tura Multi-vitamin eitir hi kan lo inbuatsaih theih dan kawngkhat a ni awm e.

Hrileng kan hmachhawn meka kan dinhmun ziaawm thei lo hi khawilai nge a fuh lohna lai ni ber ang? Roreltu tan rorel fel hi a har dawn hle a ni tih chu kan hmu thiam hle tawhin a rinawm a, inkaihhruaina chi hrang hrang hmanga inkharkhipna kan kalpui tawh ah hian hrileng kan do na kawnga thil pangai reng chu kutsil ngun, hmaituam that, chhuahvah tam loh, mi in a len tam loh, hengho hi zawm tha ila tun din hmun hi kan thleng kher lo mai thei a ni.

Dawrkaite, chawhmeh zuar ten kan hmai tuam tha ila, mamawh lei tura chhuak ten hmaituam tha ila, kan mamawh kan lei zawh ah tawi khawmuang lovin mahni inah haw lehnghal zel ila, a tul tawpah lo chuan kan chhungte nen pawh intlawhpawh tam lo ila, hengho hi zawm tha ngat ila chuan hrileng hi engemaw chen chu kan vaikiam dawn chiang a ni. Amaherawhchu, tuna kan han tarlan takte hi awlsam deuh anga lang, kan zawm that hleih theih miah loh chu a nih hi, phat rual a ni lo ve.

Han ti ta zel ila, hrivei te nen a in hnimhnaihna kan neih a, chhui ngaia kan awmin thudik ziktluak lo, thil a nihna tak ni lova zep then nei a kan in puan hian hri tam tak a tidarh thei a ni tih hi kan hriat nawn fo a tul awm e. Kan duh vanga hrikai hi kan awm miah lovang, vanduai vanga kai kan ni fur hlawm zawk ang, thil zahthlak a ni lo va, hrikai a te pawn kan hnim hnaih hnai vaite chiang taka sawi a, tin, hri kaite kan hnim hnaia kan lo in chiahpiah a nih chuan huaisen taka kan in puan ngamna khan hri kan dona kawngah min pui hle dawn a ni. Thu dik ziktluak lo sawi hian kan rinloh lamah midang tan harsatna kan siam thei a, vengdangah pawh hetiang thil avang hian harsatna tawk an awm nawk a ni. Thu dik i sawizel ang u hrileng kan do hneh theih nan.

Hei chen kan kal tawhna te ngaihtuah let a chhui let hian, hrileng a ziaawm theihna tur hian engtin nge hma la ila tha ber ang? Hrileng avanga kan tih leh tih loh tur hi kan hre vek tawhin a rinawm, inhrilh nawn kan ngaiin a rinawm loh. Thuawihna hi kan mamawh lian tak niin a lang, Home Quarantine (HQ) kan ni a, thenkhat chu HQ lai kan ni lo emaw tih mai turin inkawtah te kan lo thu vung a, a then kan chhuak ru thul, a hahthlak em em a ni. HQ lai kan ni emaw positive avanga ‘Home Isolate’ kan nih chuan pawn hi chhuah loh tur a ni, tukverh atangte in chil kan chhak mai mai tur a ni lo. In-a tawm tur kan tawm that loh hian midang tan harsatna kan siam a, thenawm khawvengte kan ti ral ti a ni.

Hrileng kan dona kawnga hmanraw pawimawh tak kan neih leh kan kalpui mek chu Vaccine lak hi a ni. Covid – 19 vaccine hi Covaxin leh Covishield anga pek chhuah a ni tlangpui a, Mizoram a kan dawn ho hi Covishield vaccine a ni a. Engemaw vanga 2nd dose hmun danga kan lak a ngai a nih chuan 1st dose a kan lak kha 2nd dose ah pawh kan lak leh ngei ngei a ngai a ni. Vaccine hi a tam thei ang berin kan lak hi mi thiamte duh dan a ni a, hri kan do letna atana pawimawh tak a ni. Thenkhat chuan engemaw avangin vaccine lak kan duh lo va, puithuna atthlak avang chuan vaccine hi lakloh tur a ni lo. Vaccine lak avang hian hri kan kai thei tawh lo a ni lo va, hri hi kan la kai thei a, vaccine la tawh ten hri kan kai a nih pawhin kan taksa a hri in na taka a hnathawh tur a veng a, hun reilo te chhungin a dam leh mai theih a, hrileng darh zel tur venna atan pawh a vaccine lak hi kan hmanraw pawimawh tak tur a ni. Keimahni tana inveng mai kan ni lo va, vaccine kan lak hian midangte pawh kan venpui nghal a ni. Mithiamten natna benvawn neite phei chu vaccine hi la ngei turin an duh a ni. Hrileng kan do hneh nan leng chhuak tam lo ila, thenawm khawvengte intlawhpawh tam lo ila, kutsil ngun hi uar zel ila, hmaituam tha ila, thu i awih tlang phawt ang u.

Leave a Reply