COVID-19 LEH KAN NUN

– C. Lalrammuana
Finance Secretary, NYMA

He hripui zet zawng min va han tibuai hneh tak em…!!!

Chhungkua, kohhran, YMA thleng mai in kan nun ati buai hle mai a,inkhawm theihloh chu thuhran nise,chhiatnithatni a kan intawiawm thin pawh kan kalpui hlei thei ta lo chu ani a, lehlam zawnga ngaihtuah phei chuan a thinur thlak lek lek zawk ani.

Khawhar te hnem tura nula leh tlangval, nu leh pa kan han zaiho dial dial thin te kha tunah chuan mumang lam a ang zo dawn ta ani. Engtik ah tak kha tiang hun kha hmangho leh thei tak ang i maw…?

Hripui in min han luhchilh tak tak mai a, veng pawh kan mangang hman hle mai a, Covid-19 Positive (Active) mi 200 dawn kan han ni te kha ngaihtuah let leh chuan manganthlak hman tak zet a, engtik ah nge kan chhungkua ah arawn luh ve ang le ti in kan thlir ani deuh mai a, tuman positive nih kan inring lo, loh theihloh ah lo chuan kan intlawhpawh hlawm bawk silo. Fimkhur sen vek erawh alo har deuh emaw ni tih mai turin, thawk lehkhat ah kan pung deuh hluai mai kha a ni a, a manganthlak hman hle a, in lama inenkawl tura tih leh 4C kan neih a kan han indahlut sup sup te kha a hrehawm takzet a ni, Pathian zarah dam lam kan pan chho zel a lawmawm takzet ani.

Kan khawtlang him thuai theihna tur a tan a hmala tu te i han bih chiang zuai zuai teh ang.

MEDICAL TEAM: Local Level Task Force ten medical team an han din hi a finthlak hle mai a, positive kan awm in an ni’n Home Isolation tur emaw 4C-a awm turte mamawh tur damdawi leh atul dangte an han ngaihtuah nghal zung zunga, sem ngai te an sem kual zung zung bawk a, chhun leh zan, a sur a sa sawi lovin an kal zung zung zel thin a ni. Kan doctor ten damlo te an vil ngun bawk a, damlo tan chuan thlamuanthlak takzet ani.

CONTACT TRACING TEAM: An niho hian positive an awm in tunge an lo hnimhnaih (first contact) ti in an chhui kual leh nghal zung zung a, positive te nena an in hnimhnaih dan te zawt kual in Home Quarantine (HQ) turte ti fel in hma an la nghal vat zel a, Quarantine ngai te thuawih taka an han inkhung nghal thin te hi a lawmawm thin hle ani.

INFORMATION PUBLICITY: An ni team hi vengchhunga LLTF ten thuthar an neih te, vengchhung group hrang hranga mipui hriat atana puangzar thin tute an ni a, an ni hnathawh rah vangin Veng chhunga positive awm te, HQ ngai chhungkua te leh chumi piah lam ah Ration buhfai sem dan turte thlengin mipui in an thu leh hla kan hriat phah zung zung bawk a, an chhuanawm hle.

Heng mi tlawmngai tak tak te in pekna a zarah vawiin ni ah chuan mi tlem te Positive kan awm ta, an lungrualna leh thawhho thatna te ah an fakawm tak zet a ni. Positive te nena awmho emaw kan lo contact hnaih avanga Quarantine ngai a awm hi hrehawm duh phian mai bawk a, karkhat chuang in a han inkhung ngat ngat mai chu rilru a nuamlo ve viau mai. Positive ve mai hlauh thawnawm ah kan awm ve bawk nen a, test hun nghakhlel ru ang reng tak, huphurh ru tak chung si in kan awm ngat ngat a, engtik nge kan in test ve theih ang le, tiin LLTF hruaitute kan han zawt deuh chhen hlawm bawk a, diktak chuan sample lak hi chak taka zawt leh sample lak vat vat chak tak erawh kan tlem hle awm e. Result chhuah hma zan chuan thenkhat tan chuan muttui har tak ani thei hial awm e. Negative result tih kan inhriat tluka nuam leh thawventhlak hi Home Quanrantine (Positive Contact) tan thu lawmawm kha avang viau ta awm e.

I awm hmun ah khan fimkhur tak in lo awmla, he hripui lak ah hian lo him hram hram ang che.

Leave a Reply