COVID ATANG HIAN I DAM CHIANG TAWH EM?

– Dr. C. Lalchhandama, Pathologist,
Civil Hospital, Aizawl.

Mizoram ah hian Covid-19 hripui len tirh atanga positive zawng zawng chu mi 23,000 kan chuang ta. Hmuh chhuah lemloh, dam zui ve ta mai eng zat tak awm ang maw? Heti zat positive kan awm tawh laiin vanneihthlak takin mi 19,000 chuang kan dam chhuak thung. Dama chhuak te hi kan dam chiang tak tak em? Nge ni a, kan negative ringawt? Taksa lamah harsatna kan la nei em? I neih loh chuan vannei tawp ah lo in ngai rawh, covid vei hnua taksa a khawih zui dan hi khawvel buaipui a ni leh ta tlat. “Covid test negative hnua kan taksa leh awm danah ngai kan la awh mai theihloh hi Covid hri ina a ken tel a ni zawk thei em?” tih zawhna pawimawh tâk hi mithiamte zinga inhnialna thar chu a lo ni leh ta zel a. Chutiang a awm te chu “Post Covid Syndrome” emaw “Long Covid” ti a koh an lo ni ta hial.

Covid virus hian kan taksa bung hrang hrang a khawih nasa em em a, a bikin kan lung (heart), chuap, kal, thin leh hriatna thazam lamte, kan taksa pum a khawih ti ila a sual awm love. Hote anga ngaih theih sam tla leh rei tak chhung aw lâwi atangin lungphuchawl thleng a thlen thei a ni tih hmuhchhuah zel a ni.

Post Covid Symptoms lar zual te chu:
1. Chauh ngawih ngawih
2. Lungphu ri dup dup emaw lungphu rang.
3. Awm bawr na
4. Thaw kham lo
5. Khuh reh theilo
6. Lu na
7. Chet vel harsat
8. Khur der der
9. Hriatna hloh/memory loss
10. Ngaihtuahna/rilru mang
11. Hlauhthawnna a khah
12. Depression
A mal te te chuan kan sawi seng lovang, mahse kan hriattur leh hma kan lo lak ve theihna tur âwm te han sawi dawn ila.

1. Lung(Heart) leh chuap lama harsatna: Covid hian kan lung leh chuap hi a khawih pawi berte zing ami ani. Test tha tak tak te atang lo chuan a khawih pawi dan a hriat mai loh. Kan intihhliam palh a, kan taksa hliam lai dam tumin a lo tih sen tul a, a rawn tur deuh ut ut thin ang chiah hian kan lung leh chuap te hi he hri hian a hliam thei ani. Chu bakah kan thisenzam, a bikin lung leh chuap ami a khawih tela, hri hian thisen hrim hrim hi a ti chhah a, chuvangin hliam a lo awm phei chuan thisen khang a in siam hma bik ta em em mai a ni. Kan chuap leh lung chhungril a thisen zam, kan sam tiat lek lek te kha heng thi khang te hian ti phuiin chu chuan harsatna a thlen thin, kan fimkhur loh phei chuan lungphuchawl a thlen thei a ni. Chuvangin, covid i negative hnua i lungphu nangmah tibuai khawpa a rik dup dup emaw, boruak kham khawp hmu lova i thaw a hah renga, i awm bawr a nat thin chuan doctor râwn a ngai tihna a nih chu. Thenkhatin a zia leh mai beiseiin kan lo tuara, hnar a boruak hip luh kham khawp ta lo chu, ka lam nen tang kawpin a zia deuh tiin kan lo awm vel mai mai thei. A bikin lung natna neisa, lung damdawi ei lai ah te leh asthma nei sa hovah hian a pawi thei hle. A pawi thui hmain doctor entir ngei ang che. I lo tha vek te anih tak leh i awmdan nena inmil tawk, exercise ho te te lak a dampui thei pawh a ni thei.

Chutih laiin ngai awh hma tum lutuk avanga exercise lo la ta vak vak kan awm thei. Kan lung leh chuap khawih chhiat a nih dan kan hrelo kan tih tawh kha, negative mah ila kan lunga tihrawl te kha an lo la dam chiang lo thei, kan ti na zual zawk anga a tawpah heart attack neih palh a hlauhawm. Chuvangin mithiam te chuan covid negative hnu thla 2-3 chu exercise over taka lak a tha lo an lo ti rêng a. Thenkhat chuan exercise tha taka lak chuan kan immunity a in siam tha leh vat turah kan ngai a ni thei. Symptoms nei miahlo tha taka dam chhuakah chuan a dik maithei, mahse covid dam leh ah chuan risk lak loh a pawilo zawk. Hah lutuk lova exercise lak erawh a poilo ang.

2. Chau ngawih ngawih: Covid dam leh te insawiselna langsar ber chu chauh ngawih ngawih hi a ni. Chau reng lo mahse hnathawh tui laia han nghilh dup te, chauh ngawih ngawih te an nei duh bik, a chhan lian ber pakhat chu thisen thlum (blood sugar) a hniam thut thut vang a ni deuh ber. Hetiang aia chau pawhin a awm theih, hna chu sawi loh inchhung dung han kal ringawt pawh ti hlei thei lo khawpin a chauh theih. Doctor inentir ngei ngei la, in lama blood sugar test na nei i neih chuan test vat thin ila, a lo hniam viau chuan glucose powder emaw thil thlum han ei khan a ziaawm thei. Chutiang kan nih lem loh a, hna kan thawk duh bawk si a nih chuan kan mamawh te ban phak maia dah leh kan nunphung thlak ngai te thlak rih mai a tul thei. Tih luih viau chi a ni lemlo. Thla 3 – 6 thleng harsatna dang em em awm lem lovin chau ngawih ngawihin a awm reng theih a ni. Chutih rualin hah lutuk lo tawka exercise lak reng erawh a pawimawh.

3. Rilru lam: Covid veite kan en dan kan hre tlang vek. Tun dinhmunah chuan kan inenkawl mek dan baka tha hi a la awm miau si lo hi a buaithlak lai chu a ni. Sual vang pawh ni lova chhungte laka in khung hran ngai ringawt pawh thil hrehawm a nih tawh laiin hmun hran ah min la khung khawm a ngai zui a. Rilru no deuh tan phei chuan ât theihna tur hial a tling a ni. Tuar thiam viau emaw kan tih te pawh mut hmunah chuan ngaihtuah loh tur tamtak an ngaihtuah thin ngei ang. A awm lutuk tlat, he hri hian thihna a thlen thei tlat a lawm!! Dam chhuak te hi an chhungte leh an thianten kan lo dawm thiam an ngai khawp mai. Doctor te chu rawn ngei tur ania, mahse a tawpah chuan an chenpuite leh thianten nun pangngai a nung leh thuai tura kan lo puih an ngai takzet, chuti lo chu hlauhthawnna a khatin an awm anga, depression neih mai an awlsam bik.

Leave a Reply