CYMA Hruaituten Political Party-te an Kawm

Mizoram Legislative Assembly inthlan, November 28, 2018 a neih tur chu dik, felfai leh muanawm taka neih a nih theihnan leh, hnam inpumkhatna ti chhe zawnga chetna a awmloh nan Central YMA chuan hma a la mek a, hemi denchhen hian CYMA hruaitute chuan Political Party hrang hrangte kawmin CYMA leh NGO Coordination Committee in a duh dante an sawipui a ni. Central YMA hruaitute hi Party pali- Bharatia Janata Party (BJP), Indian National Congress, Mizo National Front (MNF) leh Zoram People Movement (ZPM) Pisa-ahte inthlan chungchang sawipui hian an leng tawh a ni.

CYMA hruaitute hi October 29 khan BJP Pisa-ah lengin Mizoram BJP General Secretary in a lo dawng sawng a, he hunah hian CYMA hruaitute chuan inthlanna thianghlim awm se an duh thu sawiin, chi bing ang zawnga kallo tur leh ther hlo leh sum leh pai hmanga voter-te lei tumlo turin BJP hotute chu an chah a, Mizorama vote thlak tura Tripura-a awm tuikukte phurh an remtihloh thu an sawi bawk a ni.

October 30 khan CYMA hruaitute hi MNF pisa, Mizo Hnam Runah leng lehin MNF hruaituten an President ho in an lo dawng sawng a, he inkawmna ah hian CYMA hruaitute hian inthlanna thianghlim leh dik an duh thute, chi bil zawnga campaign an duh loh thute sawiin an thu hriatte an sawi a, tu pawh sawrkar se ram leh hnam tana thawh tlan CYMA in a duh thu an sawi a ni.

November 1 khan CYMA hruaitute hi ZPM leh Congress Pisa-ahte an leng leh a. ZPM Pisa a an lenna ah hian CYMA hruaitute hian inthlanpui lo awm tura CYMA duhdante sawiin, Social Media leh Media hrang hrang hmanga in beihna nasa tak karah thu belhchian dawllo leh mipuite ti chiai thei thu laka fimkhur a tul thu an sawi a, hel pawl thawhpui an duhloh thu leh ruai theh leh sum chelek a awm an hlauh thu an sawi bawk a ni.

Hemi ni vek hian CYMA hruaitute hi Congress Pisa-ah an leng bawk a, MPCC hruaitu te leh an President in an lo dawng sawng a ni. He tah hian CYMA hruaitute chuan mipuiten ralmuang taka vote an thlak an duh thute, sum leh therhlo sem an duhloh thu leh Tripura Relief Camp-a Bru awmte an awmna hmuna vote thlak tir tumna awm chu an duhloh thu sawiin an do dal tlat thu an sawi a ni.

Central YMA hruaitute hi an lenna apiangah Party hruaituten tha takin an lo dawngsawng zel a, CYMA hruaitute hian YMA duhdante tlang taka sawiin, Mizoramah inthlanna dik leh fel fai a awm chu an duh ber a nih thu leh, tu party mah an ep loh thu an sawi a. Party hrang hrang hruaitute pawh hian YMA duh dan chu zahawm an tih thu leh inthlanna muanawm leh fel fai tak neih an duh thu an sawi hlawm ani. Heng Political Party hrang hrangte nena an inkawmna hian rah tha tak a chhuah CYMA chuan a beisei a ni.

Leave a Reply