CYMA THUCHHUAH

Ni 31.07.2021 (Inrinni) (Press Release) Ni 26.7.2021 (Thawhlehni) tlaia Mizoram leh Assam ramri hrul, Mizoram chhunga Assam Police ten Mizoram Police Camp an luh chhuah avanga inkahna thleng chungchangah, Mizoram MP (Rajya Sabha) zahawm tak, Pu K. Vanlalvena’n huaisen taka ram leh hnam chhanna tura a tawng chhuak hi YMA chuan lawmawm kan tiin, a thlamuan thlak kan ti a. Kan ram leh hnam tana theihtawpa chhuaha huaisen taka ke pen zel turin duhsakna kan hlan a ni.

Hetihlaia a thusawi avanga kan MP zahawm takin, vauna a tawk leh Assam sawrkarin man tuma New Delhi-a Police hotute tira hma a la hi kan dem tak zet a, Assam sawrkar hi kan MP chunga a hmalakna zawng zawng hnuk kir vek turin kan ngen a ni.

Kan MP zahawm tak chungah hian engpawh thleng sela, YMA chu theihtawpin a thlavang hauh tur leh a tul anga hmala turin a inhuam reng a ni.

Ni 26.07.2021(Thawhtanni) Central YMA chuan Mizo mipuite duhsakna chibai a buk a che u. Mizoram leh Assam ramri buaina vanga Central YMA Executive Committee Vawkhniahzawnthla 26, 2021 (Thawhtanni) zana thukhawm chuan, ramria buaina chhuak chungchang ngun takin a ngaihtuah a. Hetiang hian thuchhuah a siam : –

1. Mizoram leh Assam ramri buaina thleng mek chungchanga Mizoram sawrkar leh Vairengte khawtlang hmalaknaah lawmthu kan sawi a. Ralthuam keng Assam Police- te huaisen taka lo hmachhawntu, Vairengte khawtlang leh Mizoram Police-te kan chhuang tak zet zet a ni.

2. Ramri buaina vanga harsatna thleng thei hrang hrangte hmachhawn tur leh mamawh semzai leh renchem zawnga hmala turin Mizo mipuite kan inngen a ni.

3. Ramri buaina vanga thil man tisang lo tur leh chheprelh lo turin kan inngen a ni.

4. Ramri buaina vanga Mizoram chhunga hnamdang awm ten kut palh an tawrh lohna turin, Mizo mipui ten dawhtheihna i lan tir zel ang u.

5. Ramin hun harsa kan tawh mek lai hi tanrual hun tak a nih avangin, Political Party leh Pawl dang ten thangthat lak tum mai lo tur leh indem mai lova, tangrual tlat turin kan inngen e.

Sd/-
Prof. LALNUNTLUANGA
General Secretary,
Central YMA

Sd/-
VANLALRUATA
President,
Central YMA

Leave a Reply