DAM REINA

– Lalrinmawia, M Section

Mihringte dam hun chhung hi kum 70 a ni tih Bible-ah kan hmu a, he kan dam hun chhung reiloteah hian eng ang takin nge mi nunah thu kan sawi ve le?.Hepa/he nu hi chu eiru nasa lutuk a nia min ti nge, a rapthlak tawn tawn a nia, a rui chhe thei lutuk, kutkem a nei a, min ti le? Nge ni a, a fel khawp mai, pa/nu entawn tlak tak a ni, kohhran leh khawtlang tana mi tangkai a ni a, a chhunte innghahna a ni min ti le? Eng ang mi pawh lo ni i la, insiamthat nan khua hi tlai lua a awm lo, keimahni a ro phum ruk hi keimahni vek bak hian pho lang a, ti vul tu tur dang kan nei chuang lo. Pathian hian a duhtaka a siam mihringte ah hian chem kalna bik riau min pein min neihtir theuh a, a then in mathematics harsa an tih ber lain thenkhat tan Hindi bu tluka bag a ah peihawmloh hi a awm lo, rawng hnawih thiam an awm a, a kah a kap thiam an awm bawk , rawng lama ZERO tak, lungrem lama ‘hero’ tak an awm bawk a, a pawimawh ta ber chu kan themthiamna wmaw, thiam thil zawn theuhhi taima leh rinawm taka kan thawh a kan tih hi a pawimawh hle a ni.

Pathian ram leh kan khawtlang, kan ram tana mi chhenfakawm ni tur hian hna sang ber ber kan thawh kher a ngailo. Lumettu chu a lumehsakpa duh dan thlap a a meh chuan fak a hlawh a, a pan nawn leh thin. Tumahin ‘lumet mai mai, ti’ana met tur hi a ni ren alawm’ an ti ngailo. Pastor leh Doctorte, Engineer leh a dangte hi an hna chelh avanga mi chung en chu an ni nameuh mai, mahsela hemi avang ringawt hian an thih hnu thlengin an hming a dai dawnlo a ni reng reng lo. Thih hnu thlenga dam kan duh chuan kan hring chan lai reiloteah hian engemaw kawng tala thil tha kan tih a ngai a ni. Chu thil ti tur chuan in dap ina cheng atanga concrete in liantaka chengte hian tihtur in ang vek kan nei a, sum in a lei theihloh hi kan banphak theuh a awm a ni.

Thu ziaktu lar Kaphleia chuan ‘Kan dam chhung rei leh reilohte hi kum te, thla te, nit e hian a hrillo e,kan thu leh kan thiltihin a hril ber zawk, miffing leh mahni ram tana thiltha ti tute erawh chu khawvelah hian nung reilo mahse an thih hnu pawhin an nung reng ang, chu chu a ni damrei chu’ tiin a lo sawi tawh kha. A ni pawh hi November 13, 1940 khan TB natna avangin chatuan ram a pan tawh. Kum 30 chauh he khawvelah a taksa hi dam mahse a thu leh hlate avang hian vawiin ni thlengin a la nung reng a ni.

Engtin nge keini hi ni ve ang le?. Kei chu ka thu leh hla hi buh tin khat hmunah pawh theh mah ila paihper khat chauh a to anga, a to zinga uihum chauh a puitling maithei tiin kan hnual em ni? Kan fate, kan tute hi an lo thanglian anga, miten ‘e! chumi/khami fapa/fanu chu I ni maw?’ an tih hunah nula leh tlangval inngai veng veng ang maia min chhuan ruk veng vengna tur khawpin engemaw kawng talin mite tan meichher kan chhi tawh em le?

Kumin kum tir lamah Pu RL Mangkhuma kan chan a, kohhran leh YMA chanchinbu-ah a thih hma lawka a thu ziak, a thih hnua an rawn chhuah te kha ‘a va ropui ve’. Thu ziahte hi thil awlai leh pang tinem neilo a nih zia chu a ziak thinte bawk hian an hria ang.Tar chakvaklo tawh pawhin a thahnem ngaihna avanga pen hum a a la thai kawi peih te kha keini taksa leh rilru lama la chak zawkte tan hian chona min va siam tam em. A lei taksa chu nung tawhlo mahse a thu tha tak tak ziahte avang khan a thi ngailo ang. A tu leh fate tan in chhuanna tham a va ni bike m!. Midang tamtak pawh kan veng hian kan ngah, kan sawi vek seng lo ang, mahsela kan rilru chuan a tin zawn thei awm e. Keini la chakvak leh la damte hian hlen chhuah loh leh tih loh kan va ngah em.

Mitin hian kan line theuhah hian midangte tana kawng en tu leh malsawmna nih tum ila, kan khawtlang nun chu awlsam tein kan siantha dawn zuk lo ni reng a. Mizote zingah ngei pawh hian fam chang tawh, mahse la thi theilo hi kan nei ve nual tawh, kan veng nu chhuanvawr Lalsangzuali Sailo te, Kamlala, Zikpuii Pa (KC Lalvunga), Rokunga, PS Chawnthu te leh hman ni lawka boral Upa Bonny Lalrindika leh midang tamtakte hi an thi tawh ngailo ang.
Hring la chang zingah pawh KL Liana, HT Sangliana, Santhankima,El Bethela, Tetea Hmart leh midang tamtak kohhran, khawtlang, fahrah, Mizoram tana malsawmna thlentute leh mi rinawm mi dikte hi kum lo vein lo fam ta pawh ni se an thi tawh ngai dawnlo a ni.

Heng kan sawi tak mi hrang pui pui ho pawh hian an ni dawn tih an inhre lawk biklo a ni. Pathian in ang khat a a siam vek kan ni, keini pawh hian anni tihtheih hi kan ti ve thei a ni tih hi I hre thar ang u. Sum neih a ngailo, hmelthat a ngailo, kan kawng kal mai mai pawh hian thu a sawi tam em em a ni. Zoram thar din a sual um bo tur hian zu leh damdawi lo lut ru hi kan dang seng dawn lo, mitin hian kan thinlungah damrei nih hi tum in that in thawh siak ila, sualna chu a rang a rangin kan um bo ngei ang,

‘Mitin pumpelh theihloh thihna chu kan hlau lo a, thlan thim pawh kan hlau heklo. Mahse khawvela thiltih tur pawimawh tak tak a tam tehlul nen pakhatmah tilo a kan liam tur hian min tilungngai ber a ni’ – Kaphleia (1910 -1940).

Leave a Reply