DAMKHAWCHHUAK ANG AW

– Lalrinzuala Chawngthu

Hmasanga atanga mihring leh thilsiam dangten kan zavaia kan tum chu damkhawchhuah a ni a. Damkhawchhuah loh chu thihna a ni.

Nu pum atanga kan pian chhuah phat atanga mahnia kan inenkawl zawh hma chu nu leh pa kutah kan awm a; mahnia inenkawl thei kan nih veleh kan kutah a awm thung. Lehkha zir te, ei leh in te, damdawia inenkawl te, taksa sawizawi te leh kan tih thin tam tak hi kan damkhawchhuahna atan a ni a, Kristianten Isua kan rin chhan pawh thih hnuah chatuana kan nunna atan a ni.

Nikum kum bul atangin kan ramah khawvel pum tibuaitu hripui a lo thleng ve a, nikum kum tawp atanga kumin kum bul lamah han ziaawm deuh mah se tunah erawh a hma aia nasa leh hlauhawm zawkin a rawn hluar leh ta mek.

Hripui len hma, nunphung pangngaia khawvel a awm lai, kan ram ngei pawh chutiang kan nih lai khan mi tin damkhawchhuak turin kan hmanhlel ni tin a. Hripui len hnu hian damkhawchhuah kan tum dan danglam ta hret mah se mihring nunphung tak tak mi tinin kan hriat chhuah phah zaw’lel thung.

Hripui len hma chuan khawvel hmasawnna mila damkhawchhuah ve tumin khawvel mihring tu pawh kan hmanhlel a; hripui len hnuah erawh a rethei a hausain he kan nunna hlu tak chan loa damkhawchhuah ve hram kan tum ta thung.

Damkhawchhuak tura kan mamawh pawh a danglam ta hle. Khawvel kalphung pangngaiah kha chuan finna, thiamna, hriatna, theihna, sum leh pai ten awmzia a neih laiin hripui karah erawh damkhawchhuak tura kan mamawh a tlem em em a, mi rethei ber tan pawh ban phak mai niin ‘invawn uluk leh fimkhur’ a ni tawl mai.

Hripui hian ‘mihringin kan mamawh hmasa ber chu kan nun ve theihna tur a ni a; a bak zawng chu nun nawm zawkna tur thil vek a lo ni’ tih a rawn pho lang chiangin mihring tan inenletna tur min pe a ni.

Tun kan dinhmunah chuan kan nun ve theihna tur a pawimawh ber a; nun nawm zawkna tur lam reng reng chu pahnihna a ni rih. Hei hi kan thliar hran thiam a tul hle. Mi tin kan fimkhur ta hle. Chutih rualin, he hri hi vanduai vangin kan kai thei tho. Chuvangin, fimkhur piah lamah hri kai ve palh pawha kan damkhawchhuah theih nan kan inbuatsaih tel a tul.

Naktuk/karleh/thlalehah emaw positive ka ni ve ta tih min la hrilh ve ang a, chumi hunah chuan engtin nge ka hmachhawn ve ang? Mi tam takin an damchhuahpui kha kei pawhin ka damchhuahpui ve thei tih kan hriat reng a pawimawh. Pathian ruahmanna chu eng pawh lo ni se, a ruahmanna a thlak ve fo avangin keimahni’n mawhphurhna sang tak kan nei.

Damkhawchhuak ang aw.

Leave a Reply