EARTH DAY (22nd April) 2010

EARTH DAY (22nd April) 2010 – A Dr. S.S. GARBYAL, PRINCIPAL CHIEF CONSERVATOR OF FORESTS LEH SECRETARY, ENVIRONMENT & FORESTS DEPTT. THUCHAH

April 22 hi Earth Day (kan chenna Lei leh a chhehvel Humhalhna Ni) atan khawvel pumah kum 1970 atang khan hman a ni thin a. Mizoramah pawh kum 1990 atang khan kan hmang tan ve a, kan chenna khawvel leilung leh min hual veltu Pathian thil siam hrang hrangte hi mamawh inphuhrutawn tura siam kan nih angin an chunga lainatna lantir chunga humhalh a pawimawhzia inzirtir nan kan hmang thin a ni.

Mihringten hmasawnna leh changkanna kawng kan zawh chho zel emaw kan intih lai leh, khawl hmanga hnathawh leh thilsiam chhuah kan thiam atangin kan chenna khawvel leh min hualveltu hi kan tikhawlo tan a, chung kan khawl hmuhchhuahte chuan boruak chhia leh leilung tibawlhhlawh thei hrang hrang a tihchhuah tel avangin harsatna leh chhiatna namenlo kan tawh phahin, kan chenna khawvel hi kan tibawrhbang chho ta a. Kum 1970-a Earth Day hmasa ber an hman tan atanga kum 40-naah pawh chhiatna leh harsatna hrang hrang kan tawh zingah khawvel sik leh sa inthlak danglam chak lutuk (climate change) hi ralpui phiara phiar ngai khawpa harsatna min thlentu anih tawh lai hian he Earth Day kan hman hi khawvel lo la awm leh zel tur atan khawvel hrisel zawk, nuam leh chhenfakawm zawk bakah Siamtu kutchhuak – Ni zung, thli leh tui tha chakna hmanga khawl tha chakna thianghlim zawk leh chhawrnaawm zawk siam thiam tura ngaihtuahna leh hmachhawp felfai siam theihna hun tha a ni ve thung a ni. Climate Change tiziaawm tur hian kan lo tih ve nghal mai theih chu thingphun uar a, nungcha humhalh that hi a ni.

Earth Day 2010 hi khawvel sik leh sa mumal tak kan neih theihna atana hmachhawp siam nan te, boruak chhia tichhuak tlem leh chhawrnaawm zawka kan khawl hman thinte tihchangtlun te, Siamtu kut chhuak tha chakna hrang hrang – Ni zung, tui leh thli tha chakna hmang thiam tura tan lakna hun remchang a ni. Hei hi ram roreltu leh sorkar hmachhawp (policy) duangtuten hmang nghal thei se a duhawm hie. Tin, kan nitin khawsakna atanga bawlhhlawh kan siam hrang hrang- ei leh in tur siamna atanga bawlhhlawh te, motor chhe siamna atanga hriak (oil) chhia leh hmanraw chhia atang te, damdawi In thli atanga bawlhhlawh te, rannung thahna hlo kan hman bang te, polythene, plastic atanga siam bungraw chhia te bakah mobile phone, sana battery leh battery pangngai chhia te hi I paih fimkhur ang u. Heng hnawmhnawk leh bungraw chhia te hian leilung a tihchhiat bakah kan tui in tur a tibawlhhlawh a, natna hrang hrang kan tuar phah thin.

Ka lawm e.

Leave a Reply