Editorial – 18.04.2021

MIDANG TANA THIL THA TIH

Kan hriat angin kum 2010-ah khan Branch YMA hmingin thisen Unit 101 zet kan lo pe tawhin kuminah unit 60 zet kan pe leh thei hi a ropui hle a ni. Hei bakah hian YMA Day lawmna pual emaw, Krismas denchhen emaw tein damlo/mi hausa zawkte hnenah tanpuinate pek thin a ni a. Hetiang dinhmu kan thlen theihna chhan hi vengchhung mite leh YMA member te kan zavaia kan tanrualna rah a ni.

Hetianga midang tana thiltha kan tih hian a tirah kan hek/insengso deuh angin lang thin mahse hun a lo kal zel angin kan lawmna pawh a pung ve zel thin a ni. Mi tana thil tha kan tih hian a hlawkna teltu va hre kher lo mah ila tu emaw chuan nasa taka lawmna a chan phah ngei ngei thin a. Thil tha titu pawhin eng emaw kawngah malsawmna a dawn phah fo thin bawk a ni.

Mi tana thil tha kan tih mek leh kan lo tih tawhteah khan lungawia duhtawk tawh mai tur kan ni lo tih erawh kan hriat reng fo a dik ang. Nakina YMA hruaitu la ni lehzel turte pawhin tun aia uar zawka mi tana thil tha tih hi chhunzawm zel thei sela a duhawm hle mai.

Chutianga ke kan pen thei a nih phawt chuan Branch YMA hian kalsual tik ni a nei ngai lovang. Chu chuan veng chhung inlungrualna pawh thui takin a thlen ngei ngei dawn bawk a ni. Chutianga thil tha tih chu Pathiain he khawvela min siam ve nachhan pawh a ni tih i hre reng ang u.

Mi tana thil tha ti ngailote ai chuan thil tha ti thintu nun chu a hlim zawk em em a, tanpuina dawngtu lawmna aiin tanpuitu lawmna a nep zawk ngai bawk hek lo.

Leave a Reply