Editorial – 02.05.2021

Covid-19 chuan min luh chilh ta tak tak ta, tunkar liamta chhung in kan veng ah mi sawm chuangin an kai ta der mai, mihausa leh rethei a thliar lo, mifel leh sual pawh a thliar chuanglo, a manganthlak ta tak zet a ni.

Kan him theihna tur leh kai kan lo tlem theih zawkna turin Local Level Task Force te chuan theih tawpin hma an la a, hri kai hlau lo bik an nilo, in a tawm ve mai mai pawh an duh khawp ang. Amaherawh chu kan vengin kan mamawhna a nasat em avangin hlau chung chungin nitin an pen chhuak a, chhungte bula awm inthlahrunawm khawp in khawlai ah an tam a, an chhuanawm tak zet a ni.

Chutih rualin kan him theihna turin ruahmanna hrang hrang an siam a, veng chhungah an duh vang reng nilovin positive an awm a, Contact Tracing tih a ngai a, chhungte ruala chaw ei hman lovin an tal buai thin.

Chhungkaw tam tak Home Quarantine anlo ngai a, an kai ve leh kai ve loh hriatnan Sample lak alo ngai a, chumi piah lamah inkhuahkhirhna avanga harsatna tawk an awm em tiin veng chhungah beng chhi in an thli thlai reng bawk a, tanpui ngai tanpui in hun an hmang thin a ni.

Hetih lai a kan himna tur a ruahmanna an siam te zawm tha duhlo kan la awm thin hi chu kan hriat loh vang nilovin kan sual vang ni hian a hriat thin.

Hawh u, he hripui laka kan damkhawchhuah theih nan hian kan himna tur a thawktu te ruahmanna siamte hi thuawih takin i zawm hram hram ang u, tuna kan hrehawmna reilo te hi nakina kan la nawmna tur zawk a ni tih i hria in, thuawih kawng a tan la thar in, hemi kawngah hian mitin te i piangthar theuh ang u.

Leave a Reply