Editorial 03.10.2021

Min ti chaktu pakhat chu fuihna thu hi a ni. Mangâng leh beidâwng mêk ten fuihna an dawnin, chakna thar an lo nei leh thin. Hlawhchham mek ten fuihna thu avangin phûr takin bul an tan thar leh theia, mi hlawhtling te pawh hian fuihna an mamawh reng tho. Heti khawpa pawimawh ni si hi, mi dangte fuihna kan sawi tam tawk lo hle. Tan la thar deuh teh ang u.

Fuihna hi mi dangte hrilh tur chauh a ni lo tih hriat atha, mahni ngei hi kan nun hman dan turah infuih phûr hmasak a ngai. Engamah hmaa kan peih lo nghal te, kan zuam loh nghal te leh, huphurhna rilru kan put nghal hi chuan hmasawnna a thleng dawn reng reng lo. “Pathian rin-chhanin ka ti thei ang, mi pawhin an theih chuan anni aia tha zawkin ka ti thei ang..” tih zawnga rilru kan puta, mahni kan infuih phur hian, kan hmaa thil awmte kan paltlang thei a ni. Kan tawngkam bakah, kan khawsa zia hi mi dangte tan fuihna tha a nih theih vangin kan fimkhura, kan inthlahdah loh hi a tha em em a ni.

Mi dangte fuih theilo, fuih duh lo te hi kan awm tlat, a pawi khawp mai. Thenkhat chuan an chhiatna lai kan zawnga, an tlin tawk lohnate sawi nuam kan ti a. Mahni rilrua vawn reng mai awm, kan thlen tawpna apiangah sawi zel kan ching lehghal. Hetiang tih ching, ringtua inngai hi chuan lungawina tur a hmu mâng mâng lo. Mi dangte thatna a duh loh ang bawkin, ama tana tha tur, fuihna tha tak tak pawh a hnâwl mai thin. Fimkhur ang u, kan chên mêkna khawvel hi a zau a, mahni chauhva khawsa thei kan nih loh hi. A nihna takah chuan, mi dangte thatna tur, an hlimna tur, hma an sawnna tur kan ngaihtuah hian keimahni tan pawh kan ngaihtuah tel a ni. A chhan chu inmamawh tawn vek kan ni miaua. Mahni chauh hlawhtling ila, mahni chauh hausa ila, kan duh leh mamawh engkim nei ila, khawvelah hian nuam kan ti hauh lo ang. Mi dangte nen hlawhtling tlâng ila, mi dangte pawhin an duh leh mamawh nei ve sela, chu chu a ni zawk kan hlimna belhchhah tur chu.

Leave a Reply