Editorial 05.09.2021

Vawiin hi India ram chuan Zirtirtute ni a tana kan hman thin ni a ni, India ram President hlui, India rama chawimawina sang Bharat Ratna award hial te pawh lo dawng tawh Dr. Sarvepalli Radhakrishnan-a piancham a ni a. A pianni hi India ram pumpui ah Zirtirtute ni atan hman thin a ni.

Khawvela thiamnna leh finna lo sang chhho zelah mahni dinhmun dah pawimawhna a lo lian chho tial tial a, hetiang a lo nih rual hian zirtirtute kan zahna hi a hma aiin lang chhuak zel se, i chawimawi zel ang u. Zirtirtute pawimawhzia te, an dinhmun hlutnate i thirho dawn teh ang.

Zirtirtu hi mihringte puitlinga min siamtu pawimawh tak an ni. Mizovin kan ngaihsan IAS Officer te hi an tun dinhmuna awm tura kaihruai a, thiamna leh finna pe tu chu Zirtirtu a ni. Hetiang hian sawi ila a fiah awm e. Mihring a puitlin theihnan Pathian a pawimawh ber a, a dawt ah hringtu Nu leh Pa. A pathumna-ah Zirtirtu. Zirtirtu chuan a zirlai naupangte chu thiamna leh finna an neih theihnan a theihtawp a chhuahpui rualin, nunkawng dik a kawhhmuh thin. Thilsual ti lo turte, thiltha chauh ti turte, midangte tana malsawmna nitur tein a zirtir thin. A puitlin huna midangte tana entawntlaka a awm theihna turin a theih angin a tanpui a, nunkawng dik a kawhhmuh thin.

Zirtirtu chuan mi dinhmun hniam takte pawh taima taka zir a, thiamthei lo takte pawh beidawg mai lova beia, beinawn fo tura a zirtir leh a fuih chuan mi awhawm leh dinhmun sang zawkah a zirtir chu a awm phah thei.

Zirtirtu hna hi hna hahthlak tak a nih rualin, a ngaihsan awm a, a tha a, a hlu a ni. Zirtirtu te hi awm ta lo se hlawh nei lo leh hnathawh nei lovin mipui hi khawlaiah kan vak suau suau ang. Zirtirtute hi kan lei ro hlu, Pathianin kan nu leh pa te aiawha min pek an ni tih i hre thar leh ang u.

Leave a Reply