Editorial 05.12.2021

Kum 2022 chhung a tana Nursery Veng Branch YMA hruaitu tur te chu hripui karah Pathian in hun tha min pe a, member thahnem tak kal khawm in, thlan fel alo ni ta. A lawmawm tak zet a ni.

Kum kalta lamah hripui vangin inthlang theilo in kan awm a, Hruaitu ngai ten tlawmngaih chhuahin an keng tlang leh a nih kha. An peih vang pawh nilo in YMA rilru pu chunga tlawmngaih chhuah in an hmazawn a thil awm te an sutlang leh hram hram a ni. An fakawm thlawt.

Tuna kan thlan chhuah thar leh tak mi paruk te pawh hian an mahni chauh chuan Branch YMA hi an khai ding zo dawn lo, member-ten theih tawp a an kaizatha kan ven leh an ngai dawn a, ‘chumi kha mi chu ti tura kan thlan tlin a lawm’ ti mai lovin, hma hruaitu tura kan thlan tlin te hnung zui chu member-te mawhphurhna a ni tih i hre reng ang u.

Kum alo thar ang a, tih tur tam takin alo hmuak nghal dawn, kum danga kan hmachhawn thin thil pangai piah lam ah Pathian zarah kan dam chuan nakum hi Nursery Veng Branch YMA kum 25 tlinna, Silver Jubilee kan lawm hun tur a ni. Kan hruaitu te hian chumi lawm thei tur chuan anmahni chauhin hma anla thei dawn lo, member-te min mamawh tak zet dawn a, chumi ah chuan hmanraw pawimawh tak ni theuh turin YMA Member-te kan in sawm lawk a ni.

Kan thlan chhuah thar a te pawh hian hei hi an thinlungah vawng reng se ava tha dawn em. ‘YMA ten Hruaitu kan tih hi chu hotu mai ni lovin, kaihruaitu, hmahruaitu mi kilkawitu an ni. Midangte entawn tlaka insiamte hi hruaitu tha an ni. Thil engemaw atana inbuatsaih thiam hi a tawk mai lova; hruaitu tha chuan amah ngeiin thil (thar) engemaw a ngaihtuah chhuak thin.’

Eng pawh nise Nursery Veng Branch YMA, YMA Member-te hian hruaitu thar te kaihhruaina hnuai ah hmasawn turin kum thar i hmuak theuh ang u.

Leave a Reply