Editorial 06.06.2021

Mizote’n a Zirna Kawtchhuah kan tih mai Pawl Sawm (matric) result- 2021 chu a chhuak leh ta.

Hlawhtling zawng zawngte kan lawmpui rualin, la hlawhtling ve hrih lote pawh beidawng mai lo va, beih hram hram a tha khawp mai. Matric pass tharte tan hian hmalam hun tur siam thiam a tul khawp mai. Nu leh pate paw’n kan fate rilru sukthlek kan hriatchian a ngai.

Mi fate’n an zir ang hi kan fate tan a fuh ve kher lo thei. Duhthlan sual palh chuan damchhung atan a pawi thei tih hria a, kan fate kawng tur ngaihtuah uluk a ngai hle. Chutih rual chuan naupangte pawn kan tui zawng leh kan thiam zawng kan hriatchian a ngai. Thiante nena inrawt phura, admission tih ngawt chi a ni lo.Tin, hlawhtlingte kan lawmpui rual hian mi dangte tana hmuh hrehawm khawpa khawsak loh a mawi khawp mai.

Mizote hi lehkhathiam chi kan ni tih hi chu a pawm awm reng. Thiam hle tur kan nih laiin khawiah emaw hian tikhawlhkhamtu a awm tlat a ni. Chu lai tak chu hmu chhuak thiam awm se a va tha dawn em aw! Khuavel kan chhin theihna awm chhun chu Zirna hi a ni tih kan hmuh thiamna a la rei lo. Pathianin a hnam anga talent min pek pawh a ni ti pawh ni ila a sual lo ang. Miss leh Modelling lama lar viau tur hian min ti lo a ni mai thei!

A nihna takah chuan Sports lam te pawh hi han ti viau thin dawn mah ila kan pianphung a ruakhai tawk lo a, in chher chhuahna hmun tha nei turin kan ram economy in ala tlin bawk lo a ni tih kan hria. Lehkha thiamna erawh chu kan sut fuh phawt chuan el phak loh bik kan neih ka ring lo. Kan talent a ni tlat. Theih tawpin zirna lamah hma ila thar leh ang u.

Leave a Reply