Editorial 06.12.2020

Pathian kaihhruaina a zarah Pawltlak thla kan lo chuangkai ve leh ta, kum dangah chuan kum thar atan a hruaitu thar thlang leh hunpui hmang tura inbuatsaih in kan phusa leh tawh viau in a rinawm.

Tun kum erawh a dan a dang ta, CYMA atanga thu kan hmuh angin hruaitu thar thlan chungchang chu Covid-19 avangin Branch Executive Committee kutah a rawn dah a, Committee chuan ngun taka ngaihtuah in tun a kan hruaitu nilai mek te hian tlawmngai a he hna zahawm tak hi thawk chhunzawm leh turin a beisei a, Committee beiseina chu insit tak chungin an pawm a, a lawmawm tak zet a ni.

Kan hruaitu te hi mihring ve tho, chaklo thei, chauh ni nei, kawng zawh sual ve thei an ni a, chumi a nih avang chuan member ten theih tawpa an hnung kan dawl a ngai a ni. Anlo tluk palh pawh a kai tho leh tu tur chu member te kan ni a, an tluk loh nan a lo khalh ngil tu tur te, sawi leh sel an kai lohna tur a tan a veng himtu tur pawh member te tho kan ni.

An ni paruk chauh hian Branch YMA hi a ti nung zo dawn lo a, hma an hruaina kawng hrang hrang a hlawhtlin zel theih nan YMA member tha tak tak te hian kan thiam kan finna hmang tangkai in an hnung i dawl zel ang u.

Tlawmgngaihna, Zonun Ze-mawi lan chhuah tir tu tur ber YMA hi a vul zel theih nan nang leh kei hi kan pawimawh ber a, ka tello chuan YMA hi a kal theilo a ni tih kan rilru ah chiang thar leh rawh se.

Member naupang zawk te tel chakna, Lusun chhungte tan a thla-muanna, rethei chhumchhia te tan a innghahna tlak ah YMA hi i siam thar leh zel ang u. YMA Vul zel rawh se.

Leave a Reply