Editorial 07.11.2021

Mizoram hi ram chhengchhia leh hmunhma rem lo tak ni mahse biodiversity lamah hian ram hausa tak kan ni a, kan ramngaw leh kan nungcha te kan humhalh tha lova, kan tichereu nasa viau chung pawh hian hemi kawnga ram hausa tak kan la ni thei hi a vanneihthlak hle a, chutihrualin, kan ramngaw leh nungcha te tichereu zawnga kan kal reng a nih chuan helama kan ram ngaw hausakna hian tawp chin erawh a la nei ngei dawn tih kan hriat a tul takzet a ni.

Khawvela nungcha, thil to zawng zawngte hi inmamawh tawn, inring tawn, inzawmna / inkungkaihna nei vek kan ni tih mithiamten an sawi a, hei vang hian kan ram ngaw leh nungcha te kan humhalh that chuan keimahni tan nghawng tha a nei ang a, kan humhalh that loh a, kan tihchereu zel a nih chuan he rama chêng mihringte bawk hi a tuartu tur chu kan ni dawn a, chuvangin kan ram hausakna neih sa tipung zel tur hian theihtawp kan chhuah a tul hle a ni.

Tunah hian kan hma lawkah thlasik hun, Mizoten ‘sachhe thau hun’ an tih, tun hma atanga Mizoten sapelna hun, ram chhuah leh lui kal hun atana kan hman thin, nghafuan ven hun atana kan hman thinte kan hmang chho leh tan mek a, hemi rual hian tun hnai thla hmasa mai pawh khan Wildlife Week hman a lo ni nghe nghe a, he hunah hian nungcha humhalh a tulziate leh a thara nasa lehzualin mipuite hnenah zirtirna pek a ni a, hei mai bakah hian kan rama nungchate venhim kawngah pawh tan lak zual theih nise a duhawm khawp mai.

Nungchate, ramngaw, thing leh mau hlutziate leh an tel lova mihringte kan khawsak theih lohzia hi hre thar leh ila, humhalhna kawngah nasa zawka tan kan lakna kum lo ni thar mawlh rawh se. Nungchate zalen tirtu leh humhalhtu i ni theuh ang u.

Leave a Reply