Editorial 09.01.2022

Khawvel hmun hrang hrangah mi maktaduai chuangin an thihpui tawh Coronavirus/Covid-19 chuan Omicron variant hmangin khawvel a rawn chawk buai thar leh ta, Mizoram chhungah ngei pawh mi 558 laiin an thihpui tawh a ni. Hri leng laka Mizoram venhim a nih theih nan sawrkar chuan hma a la a, ruahmanna hrang hrang a kalpui mek a ni.

Sawrkarin he hri leng laka Mizoram mipuite kan him theihna tur ngaihtuahin, khawvel ram dangten an lo tawrh dante zirchiang chungin Mizoram tana tha tura an ngaih hmangin mipuite himna atan ruahmanna a siam a, tunah hian mipuite pawna chhuak tam lo tur leh Mizoram pawn atanga lo hawte inkhung hrang turin ruahmanna a siam a, heng ruahmannate hi mipuite hian kan him tlanna tur a ni tih kan hriat a, tha taka he thupek kan zawm hi keimahni tan a ni tih kan hriat a tul hle a ni. He hrileng laka lo invenna tur hrang hrang sawrkarin a duante hi sawrkar leh khawtlang hruaitute hlâwkna tur a ni lova, he hrileng laka mipuite kan himna tur atana a duan a ni a, kan ramah emaw kan vengah te he hri a lo luh leh luh loh chungchangahte, kan rama he hri a darh nasat leh nasat loh tur chungchangahte mipuiten mawhphurhna kan nei sâng hle a, mipuiten kan tihtur kan tih loh avangin tawrhna nasa tak tuar thei kan ni a, kan tih loh tur kan tih avang pawhin nasa takin kan tuar thei dawn a ni. Chuvangin, sawrkar leh khawtlang hruaituten mipuite tih leh tih loh tur atana a duante hi zawm hram hram hi kan tih tur a ni tih i hre thar leh ang u.

Tunah pawh sawrkarin ruahmanna hi mipui tam zawkin an zawm that viau laiin, thupek zawm thalo leh palzut hriat tur leh hmuh tur kan awm leh zeuh thin a, tawng mawilo ni lo se, hetianga sawrkar ruahmanna zâwm thalotute hi a tlangpuiin khawvel ram dangin he hri leng an tawrh nasatzia leh kan rama a lo luh hlauhawmzia hre phaklote an ni tlangpui a, chuvangin sawrkar leh khawtlang hruaitute pawhin dân hmanga kan inkhap beh bakah an rilru hmin tur zawnga he hri leng hlauhawmzia leh a nghawng nat ziate pawh hi tun ai nasa zawka inhrilhhriatte pawh tum zel ila a tha awm e.

Leave a Reply