Editorial 09.05.2021

Thil engkim hian hlutna an nei theuh a, amaherawhchu hlu lo reng reng an awm lo tihna erawh a ni lo. Hlutna reng reng neilo ni awm tak, hlu lo mai pawh ni lova hnawksak zawk tlat an awm thin. Enge a chhan ni ta ang le?

Hlutna hi mawinaah te, sum leh pai ah te, ropuinaah te, changkannaah te, thiamnaah te hian a awm ngawt lo va. A man tam apiang hi a hlu a ni vek kher lo. Hlutna awmna chu nihnaah a ni.Thil reng reng hi a nih dan tur ang taka a nih hian a hlu a, a mawi a, a zahawm thin. Nihna chu mawhphurhna hlenchhuahna ah a awm a, hlutna awmna chu mawhphurhna hlenchhuahna ah a ni a tih theih ang.

Kan duh reng vang ni lovin, mihringa kan lo pian vang hrim hrim zawkin tihhlawhtlin tur mawhphurhna kan nei a.Tui taka emaw tui vak lova kan mut lai te pawh hian chung mawhphurhnate chuan min delh betin reng a ni. Kan hlut lehzual nan ti hian i han in ngaihtuah lawk i la. Eng hun nge ka tawn mek hi? Enge ka tuizawng ni a, enge ka tih theih zawng?

Ramhuai be mai mai nge ka nih a, Pathian nung be tu? Eng kawngah nge ka ram leh hnam hian min mamawh? tih te leh adangte hi hriat chian a tul a. Chutianga mahni inhriatchian a mahni hma lam kawng thlir thiam, mahni tihtur dik tak hmu fiah thei,mahni tih loh turah inrawlh lo mi nih chu a tul. Mahni inhrechianglo te chu mihring hlu an ni ngai lo.Puitling si naupang chhe awma awm, hlawhtling si lo hlawhtling thawka thaw, thiamna nei si lo mi thiam len a leng,
nei si lo nei awm a awm, hre si lo hre ber anga in sawi thin te hi mihring hlu an ni ngai lo va,mi hnawksak an ni zawk. Chutiang bawkin kan tunlai boruak te a that tawh loh zia hria in mahni theuh hlu lehzual turin hun i hmang zel ang u.

Leave a Reply